AKP ស្វាយរៀង ថ្ងៃទី១៦ ខែកញ្ញា ឆ្នាំ២០២៦ -- លោក រិទ្ធ ឌីកា នាយកបច្ចេកទេសក្លឹបបាល់ទាត់ព្រះខ័នរាជស្វាយរៀងពិតជាមានក្តីរំភើបរីករាយជាខ្លាំង នៅពេលដែលឃើញទីលានបាល់ទាត់ព្រះខ័នរាជស្វាយរៀង មានស្តង់ដាអន្តរជាតិ និងសោភណ្ឌភាពស្រស់ស្អាត។

លោក រិទ្ធ ឌីកា នាយកបច្ចេកទេស ក្លឹបបាល់ទាត់ព្រះខ័នរាជស្វាយរៀងព

នេះជាការលើកឡើងនៅក្នុងបទសម្ភាសន៍ដោយឡែកមួយជាមួយទីភ្នាក់ងារសារព័ត៌មានកម្ពុជា AKP កាលពីពេលថ្មីៗនេះ ក្នុងឱកាសដែលក្រុមបាល់ទាត់ព្រះខ័នរាជស្វាយរៀងធ្វើម្ចាស់ផ្ទះទទួលក្រុមភ្ញៀវ ក្រុមកងយោធពលខេមរភូមិន្ទ នៃក្របខ័ណ្ឌជម្រើសជើងឯកខេមបូឌានព្រីមៀរលីគ សប្តាហ៍ទី២ រដូវកាល ២០២៦-២០២៧ នៅកីឡដ្ឋានក្លឹបព្រះខ័នរាជស្វាយរៀង ស្ថិតនៅក្រុងស្វាយរៀង ខេត្តស្វាយរៀង។

យុវតី ឆាំ ស្រីនូ និងយុវជន តុង ឆាយ អ្នកគាំទ្រ

លោក រិទ្ធ ឌីកា ពន្យល់ថា កីឡាដ្ឋានក្លឹបព្រះខ័នរាជស្វាយរៀងត្រឹមត្រូវតាមស្តង់ដារ AFC ប៉ុន្តែនៅមានបញ្ហាត្រង់ថាត្រូវមានស្តង់ដាខាងក្រៅផ្សេងៗទៀត ដូចជាព្រលានយន្តហោះ និងសណ្ឋាគារលំដាប់ស្តង់ដាមិននៅជិតកីឡដ្ឋាននេះ ដោយត្រូវការអភិវឌ្ឍបន្តបន្ទាប់ទៀត។ នេះមិនទាន់ឆ្លើយតបទៅនឹងការរៀបចំធ្វើម្ចាស់ផ្ទះអន្តរជាតិនៅឡើយ ប៉ុន្តែយើងអាចរៀបចំការប្រកួតលក្ខណៈមិត្តភាពអន្តរជាតិបាន។

លោក រិទ្ធ ឌីកា បន្ថែមថា កីឡដ្ឋានព្រះខ័នរាជស្វាយរៀងប្រកបដោយស្តង់ដា និងភាពស្រស់ស្អាតនេះនឹងជួយជំរុញបន្ថែមដល់ការលើកទឹកចិត្តដល់យុវជនលេងចូលរួមលេងកីឡាកាន់តែច្រើន។ រីឯកីឡាករមានប្រាក់ខែកាន់ខ្ពស់កាន់តែមានតម្លៃក្នុងសង្គម មិនដូចកាលពីលោកនៅជាកីឡាករនោះទេ។ នាយកបច្ចេកទេសរូបនេះបន្ថែម នៅពេលមានប្រកួតរបស់ព្រះខ័នរាជស្វាយរៀងនៃលីគកំពូលកម្ពុជាធ្វើឱ្យក្រុងស្វាយរៀងមានសភាពអ៊ូអរជាមួយការទស្សនាបាល់ទាត់កាន់តែជក់ចិត្តបន្ថែមទៀត។

ជាមួយគ្នានេះ យុវជន តុង ឆាយ ដែលអ្នកគាំទ្រក្លឹបព្រះខ័នរាជស្វាយរៀងបង្ហាញក្តីរីករាយចំពោះសមិទ្ធផលក្លឹបព្រះខ័នរាជស្វាយរៀង ដែលក្រុមអ្នកគាំទ្រទាំងឡាយនឹងបន្តការគាំទ្រផ្តល់កម្លាំងចិត្តដល់គ្រប់ការប្រកួតរបស់ ម្ចាស់ផ្ទះមួយនេះ ដែលជាក្រុមការពារតំណែងជើងឯកលីគជាច្រើនរដូវកាលនេះ។ «ខ្ញុំពិតជាប្លែកភ្នែកខ្លាំងណាស់ ដែលយើងអាចមើលឃើញនូវទស្សនីភាពដ៏ត្រជាក់ភ្នែកជាមួយភាពស្រស់ស្អាតខ្លាំង។ ចាប់អារម្មណ៍ខ្លាំង ប្លែកភ្នែកខុសពីកីឡដ្ឋានមុន។ យើងខ្ញុំពិតជាសប្បាយចិត្តណាស់ ដែលខេត្តស្វាយរៀងរបស់យើងមានកីឡដ្ឋានដ៏ប្រណិត»។

រីឯអ្នកគាំទ្រម្នាក់ទៀតរបស់ក្លឹព្រះខ័នរាជស្វាយរៀង គឺយុវតី ឆាំ ស្រីនូ បាននិយាយថា៖ ខ្ញុំប្លែកភ្នែក រីករាយនឹងទិដ្ឋភាពដ៏ស្រស់ស្អាត ស្តង់ដា។ សម្រាប់កីឡដ្ឋានខេត្តព្រះខ័នរាជស្វាយរៀង ស្ថិតនៅក្នុងខេត្តអាចធ្វើបានល្អបែបនេះ ខ្ញុំពិតជាមានមោទនភាពណាស់ ក្នុងនាមជាពលរដ្ឋម្នាក់ដែលមានកំណើតនៅខេត្តស្វាយរៀងនេះផ្ទាល់។ កាលពីរដូវកាលមុន ដែលព្រះខ័នរាជស្វាយរៀងខកខានការធ្វើម្ចាស់ផ្ទះ នៅកីឡដ្ឋាននេះ ដោយសារការជួសជុលកែលម្អយ៉ាងណាក្តី ក៏នាងខ្ញុំនៅតែតាមដានទស្សនាគាំទ្រតាមប្រព័ន្ធអនឡានរបស់ក្លឹបគ្រប់ការប្រកួតទាំងអស់ផងដែរ»៕

ដោយ ហេង ណាលីន (រូបភាពក្លឹប)