AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៦ -- កាលពីថ្ងៃអាទិត្យ លោកនេលសុន រ៉ាម៉ាអ៊ុតវ៉ាណា (Nelson Ramaotwana) រដ្ឋមន្ត្រីក្រសួងយុត្តិធម៌និងសេវាពន្ធនាគាររបស់ប្រទេសបុតស្វាណា បានថ្លែងអំណរគុណដល់ដៃគូសហការមកពីប្រទេសចិន ដែលបាននាំយកបច្ចេកវិទ្យា ការផ្ទេរជំនាញ និងការងារជូនដល់សហគមន៍នៅក្នុងប្រទេសអាហ្វ្រិកភាគខាងត្បូងមួយនេះ។

លោក រ៉ាម៉ាអ៊ុតវ៉ាណា បានមានប្រសាសន៍ថា «មិនត្រឹមតែពាណិជ្ជកម្មប៉ុណ្ណោះទេ ប៉ុន្តែយើងកំពុងកសាងអាជីវកម្ម កសាងទំនាក់ទំនង និងកសាងភាពជាដៃគូ»។ លោកបានថ្លែងបែបនេះនៅក្នុងពិធីជួបជុំមួយនៅឯឧទ្យានWheelbarrow ដែលជាឧទ្យានធម្មជាតិមួយស្ថិតនៅភាគនិរតីនៃទីក្រុងហ្គាបូរូន រដ្ឋធានីរបស់ប្រទេសបុតស្វាណា ដើម្បីអបអរសាទរពិធីបុណ្យប្រពៃណីចិន «ពាក់កណ្តាលរដូវស្លឹកឈើជ្រុះ» (Mid-Autumn Festival) ដែលឆ្នាំនេះត្រូវនឹងថ្ងៃទី២៥ ខែកញ្ញា។

លោកក៏បានកោតសរសើរចំពោះកម្មវិធីសហប្រតិបត្តិការរវាងអាជីវកម្មនិងអាជីវកម្ម (B2B) មុនពេលចាប់ផ្តើមពិធីអបអរសាទរនេះ ដោយកត់សម្គាល់ថាទំនាក់ទំនង និងកិច្ចសហប្រតិបត្តិការរវាងប្រទេសបុតស្វាណានិងចិន កំពុងតែរីកចម្រើនយ៉ាងខ្លាំងក្លាពីមួយថ្ងៃទៅមួយថ្ងៃ។

លោកបានអំពាវនាវឱ្យសហគ្រិនបុតស្វាណា សហការជាមួយសហគមន៍ធុរកិច្ចចិន ដើម្បីបង្កើតការបណ្តាក់ទុនរួមគ្នា និងផលប្រយោជន៍រួមដោយបញ្ជាក់ថា «តួនាទីរបស់អស់លោកអ្នកគឺមានសារៈសំខាន់ណាស់ក្នុងការប្រែក្លាយកិច្ចព្រមព្រៀងនានាទៅជាគម្រោងជាក់ស្តែង និងប្រែក្លាយគម្រោងទាំងនោះទៅជាជីវភាពរស់នៅដ៏ល្អប្រសើរសម្រាប់ប្រជាជននៅតំបន់ជុំវិញ» រួមទាំងការផ្តល់អំណោយជូនដល់មនុស្សចាស់ជរាផងដែរ។

លោក​ ហ្វាន់ យ៉ុង (Fan Yong) ឯកអគ្គរដ្ឋទូតចិនប្រចាំនៅប្រទេសបុតស្វាណា បានមានប្រសាសន៍ថា លោកឯកភាពជាមួយរដ្ឋមន្ត្រីចំពោះ «ពាក្យសម្តីដ៏កក់ក្តៅអំពីទំនាក់ទំនងរបស់យើង អំពីតួនាទីរបស់ប្រជាជនចិននៅទីនេះក្នុងប្រទេសបុតស្វាណា ក្នុងការជួយដល់ប្រទេសនេះ ការអភិវឌ្ឍប្រទេសនេះ និងការតភ្ជាប់ប្រទេសនេះជាមួយមាតុភូមិរបស់យើង»។

លោកបានកត់សម្គាល់ថា នៅឆ្នាំនេះ ប្រជាជនបុតស្វាណាជាច្រើនបានចូលរួមក្នុងព្រឹត្តិការណ៍ប្រពៃណីចិនដ៏សំខាន់នេះ ដែលមានសារៈសំខាន់ខ្លាំងណាស់សម្រាប់ការផ្លាស់ប្តូររវាងប្រជាជន និងប្រជាជន និងការកសាងសហគមន៍ដែលមានអនាគតរួមគ្នាសម្រាប់មនុស្សជាតិ៕

ដោយ៖ មូល មិនា (ប្រភព៖ ភីបផលដេលី)