AKP អង់ការ៉ា ថ្ងៃទី១៥ ខែកក្កដា ឆ្នាំ២០២៦ -- នៅក្នុងពិធីបើកវគ្គបណ្តុះបណ្តាល ស្តីពី «សារព័ត៌មានក្នុងសមរភូមិ» លើកទី៣០ នៅទីក្រុងអង់ការ៉ា ប្រទសតួកគី កាលពីព្រឹកថ្ងៃទី១៤ ខែកញ្ញា ឆ្នាំ២០២៦ លោក BuğraAydın អនុប្រធានទីភ្នាក់ងារសហប្រតិបត្តិការ និងអភិវឌ្ឍន៍តួកគី (TIKA)បានថ្លែងថា វគ្គបណ្តុះបណ្តាលនេះបានក្លាយជាម៉ាកយីហោដ៏គួរឱ្យចាប់អារម្មណ៍នៅលើឆាកអន្តរជាតិ ហើយលើកនេះជាលើកដំបូងហើយនៅក្នុងវគ្គទី៣០ របស់ខ្លួន ដែលអ្នកសារព័ត៌មានមកពីតំបន់អាស៊ីអាគ្នេយ៍ និងអាស៊ីប៉ាស៊ីហ្វិកបានចូលរួមក្នុងវគ្គបណ្តុះបណ្តាលនេះ។

លោក Aydın បានថ្លែងថា គំនិតផ្តួចផ្តើមភ្ជាប់ទំនាក់ទំនងឡើងវិញជាមួយអាស៊ីរបស់ប្រទេសតួកគី បានចាប់ផ្តើមនៅក្នុងឆ្នាំ២០១៩ ដែលមានគោលបំណងពង្រឹងទំនាក់ទំនងជាមួយតំបន់នេះបន្ថែមទៀត ហើយក៏បានរំលឹកដល់អ្នកសារព័ត៌មានដែលបានបាត់បង់ជីវិតរបស់ពួកគេក្នុងពេលបំពេញកាតព្វកិច្ច ដើម្បីជូនដំណឹងដល់ពិភពលោកអំពីអ្វីដែលកំពុងកើតឡើងនៅក្នុងតំបន់ហ្គាហ្សា។

លោក Aydın បានបន្ថែមថា នៅក្នុងវិសាលភាពនៃការបណ្តុះបណ្តាលនេះ អ្នកចូលរួមនឹងឆ្លងកាត់ការធ្វើតេស្តផ្សេងៗ ដែលនឹងជំរុញដែនកំណត់រាងកាយ និងផ្លូវចិត្តរបស់ពួកគេ ហើយអ្នកឆ្លើយឆ្លងព័ត៌មានក្នុងសមរភូមិនឹងទទួលបានជំនាញក្នុងការធ្វើការសម្រេចចិត្តដ៏ត្រឹមត្រូវ និងធានាសុវត្ថិភាពរបស់ពួកគេក្រោមលក្ខខណ្ឌដ៏លំបាក។ លោកបានបន្តថា បទពិសោធន៍ជាសកលជាងមួយសតវត្សរបស់ទីភ្នាក់ងារសារព័ត៌មានអាណាដូលូ (AA) ស្ថាប័នជំនាញនៃបណ្ឌិត្យសភានគរបាលតួកគី និងបទពិសោធន៍សហប្រតិបត្តិការអន្តរជាតិរបស់ TIKA ត្រូវបានរួមបញ្ចូលគ្នានៅក្នុងវគ្គបណ្តុះបណ្តាលពិសេសនេះ។

លោក Aydın បានមានប្រសាសន៍ថា លោកជឿជាក់ថា បទពិសោធន៍ដែលទទួលបាន និងមិត្តភាពដែលបានបង្កើតឡើងក្នុងអំឡុងពេលបណ្តុះបណ្តាលនេះ នឹងរួមចំណែកដល់ការសន្ទនាដោយសន្តិវិធី និងស្ថាបនារវាងប្រទេសនានា ដោយលោកបានបន្ថែមថា «សច្ចភាពជារឿយៗត្រូវបានលាក់នៅពីក្រោយមនសិការដែលមិនលំអៀង និងម៉ឺងម៉ាត់ក្នុងកាលៈទេសៈដ៏លំបាក។ ភាពក្លាហាន និងការលះបង់វិជ្ជាជីវៈដែលអ្នកបានបង្ហាញដោយការចូលរួមក្នុងការបណ្តុះបណ្តាលនេះសមនឹងទទួលបានការសរសើរទាំងអស់»។

លោក Aydın បានថ្លែងអំណរគុណដល់អគ្គនាយកដ្ឋានទីភ្នាក់ងារសារព័ត៌មាន AA ការិយាល័យសម្របសម្រួលនៃទីភ្នាក់ងារ AAគណៈប្រធានបណ្ឌិត្យសភានគរបាលតួកគី និងគ្រូបង្វឹកមកពីស្ថាប័នសាធារណៈផ្សេងទៀត ដែលនឹងចូលរួមក្នុងការបណ្តុះបណ្តាលសម្រាប់ការចូលរួមចំណែកចំពោះការអនុវត្តកម្មវិធីនៃវគ្គបណ្តុះបណ្តាលនេះ៕

ដោយ៖ យា ចិន្ដាខន្ដី