AKP បន្ទាយមានជ័យ ថ្ងៃទី១២ ខែកញ្ញា ឆ្នាំ២០២៦---

ក្នុងគោលបំណងបង្ការ និងទប់ស្កាត់ការរីករាលដាលនៃជំងឺដែលបង្កឡើងដោយមូសខ្លា ជាពិសេសជំងឺគ្រុនឈាម និងជំងឺគ្រុនឈីក មន្ទីរសុខាភិបាលនៃរដ្ឋបាលខេត្តបន្ទាយមានជ័យ បានបន្តយកចិត្តទុកដាក់លើការងារអប់រំសុខភាព និងអន្តរាគមន៍ជាក់ស្តែងនៅតាមមូលដ្ឋាន ជាពិសេសក្នុងរដូវវស្សាដែលជារដូវអំណោយផលដល់ការកើនឡើងនៃប្រភពបង្កាត់ពូជមូសខ្លា។

ជាក់ស្តែង នៅថ្ងៃទី១១ និងថ្ងៃទី១២ ខែកញ្ញា ឆ្នាំ២០២៦ មន្ទីរសុខាភិបាលខេត្តបន្ទាយមានជ័យ តាមរយៈកម្មវិធីគ្រុនចាញ់ គ្រុនឈាម និងដង្កូវព្រូន បានសហការជាមួយការិយាល័យសុខាភិ បាលស្រុកប្រតិបត្តិម៉ាឡៃ មណ្ឌលសុ ខភាព អាជ្ញាធរឃុំ-ភូមិ និងកម្លាំងប្រជាការពារភូមិ ចុះអប់រំផ្សព្វផ្សាយអំពីវិធានការបង្ការជំងឺ ព្រមទាំងអន្តរាគមន៍បាញ់ថ្នាំកម្ចាត់មូស នៅក្នុងភូមិសាស្ត្រស្រុកម៉ាឡៃ ខេត្តបន្ទាយមានជ័យ។

សកម្មភាពនេះបានបង្ហាញពីការយកចិត្តទុកដាក់របស់មន្ត្រីសុខាភិបាល និងអាជ្ញាធរមូលដ្ឋាន ក្នុងការចូលរួមការពារសុខភាពប្រជាពលរដ្ឋ តាមរយៈការឆ្លើយតបទាន់ពេលវេលាចំពោះហានិភ័ យនៃជំងឺដែលអាចកើតមាន និងរីករាលដាលតាមរយៈមូសខ្លា។

លោកវេជ្ជបណ្ឌិត ឡេ ច័ន្ទសង្វាត ប្រធានមន្ទីរសុខាភិបាលខេត្តបន្ទា យមានជ័យ បានសម្តែងការកោតស រសើរចំពោះមន្ត្រីសុខាភិបាល អាជ្ញាធរមូលដ្ឋាន កម្លាំងប្រជាការពារភូមិ និងប្រជាពលរដ្ឋ ដែលកន្លងមកបានចូលរួមយ៉ាងសកម្មក្នុងការកម្ចាត់មូស និងលុបបំបាត់ជម្រកបង្កាត់ពូជមូសខ្លា ដើម្បីការពារសុខភាពគ្រួសារ និងសហគមន៍។

លោកវេជ្ជបណ្ឌិតបានគូសបញ្ជាក់ថា ការបាញ់ថ្នាំកម្ចាត់មូស គឺជាវិធានការឆ្លើយតបបន្ថែមតែប៉ុណ្ណោះ ខណៈការចូលរួមរបស់ប្រជាពលរដ្ឋក្នុងការសម្អាតបរិស្ថាន និងលុបបំបាត់វត្ថុដែលអាចដក់ទឹកបានជាប្រចាំ គឺជាវិធានការស្នូល និងមានប្រសិទ្ធភាពក្នុងការកាត់ផ្តាច់វដ្តនៃការបង្កាត់ពូជមូសខ្លា។

លោកបានអំពាវនាវដល់ប្រជាពលរដ្ឋគ្រប់គ្រួសារ ត្រូវចូលរួមពិនិត្យ និងសម្អាតជុំវិញផ្ទះជាប្រចាំ ដោយយកចិត្តទុកដាក់លើវត្ថុដែលអាចក្លាយជាប្រភពដក់ទឹក ដូចជា សំបកកង់រថយន្ត សំបកកង់ម៉ូតូ ចានស្នោរ អំបែង និងវត្ថុផ្សេងៗទៀតដែលអាចប្រមូលទឹកភ្លៀងបាន។

លោកវេជ្ជបណ្ឌិត ឡេ ច័ន្ទសង្វាត បានសង្កត់ធ្ងន់ថា ការកម្ចាត់ជម្រកបង្កាត់ពូជមូសខ្លា មិនមែនជាកិច្ចការរបស់មន្ត្រីសុខាភិបាលតែប៉ុណ្ណោះទេ ប៉ុន្តែជាការទទួលខុសត្រូវរួមរបស់គ្រួសារ សហគមន៍ អាជ្ញាធរមូលដ្ឋាន និងគ្រប់ភាគីពាក់ព័ន្ធ។ ប្រសិនបើគ្រប់គ្រួសារចូលរួមសម្អាតបរិស្ថាន និងលុបបំបាត់វត្ថុដក់ទឹកជាប្រចាំ នោះនឹងអាចកាត់បន្ថយប្រភពបង្កាត់ពូជមូសខ្លា និងបន្ថយហានិភ័យនៃការឆ្លងជំងឺបានយ៉ាងមានប្រសិទ្ធភាព។

ជាមួយគ្នានេះ លោកបានលើកយកសារដ៏សំខាន់មួយថា «គ្មានដង្កូវ ទើបគ្មានមូសខ្លា និងគ្មានជំងឺគ្រុនឈាមរាតត្បាតក្នុងសហគមន៍» ដែលជាការរំលឹកដល់ប្រជាពលរដ្ឋឱ្យយល់ថា ការការពារជំងឺ គ្រុនឈាម និងគ្រុនឈីក ត្រូវចាប់ផ្តើមពីការកម្ចាត់ប្រភពបង្កាត់ពូជមូសនៅជុំវិញផ្ទះ និងសហគមន៍ មុនពេលមូសកើត និងបង្កការចម្លងជំងឺ។

ការចុះអប់រំ និងបាញ់ថ្នាំកម្ចាត់មូសនៅស្រុកម៉ាឡៃនេះ មិនត្រឹមតែជាការឆ្លើយតបចំពោះស្ថានភាពជំងឺនៅមូលដ្ឋានប៉ុណ្ណោះទេ ប៉ុន្តែថែមទាំងជាការជំរុញឱ្យមានការចូលរួមពីប្រជាពលរដ្ឋក្នុងការការពារសុខភាពដោយខ្លួនឯង និងបង្កើតបរិស្ថានរស់នៅស្អាត មានសុវត្ថិភាព និងកាត់បន្ថយហានិភ័យនៃជំងឺដែលបណ្តាលមកពីមូសខ្លា។

ដូច្នេះ ការបន្តចូលរួមរបស់ប្រជាពលរដ្ឋក្នុងការសម្អាតបរិស្ថាន លុបបំបាត់ជម្រកដក់ទឹក និងអនុវត្តវិធានការបង្ការជំងឺជាប្រចាំ គឺជាគន្លឹះសំខាន់ក្នុងការរួមគ្នាកាត់ផ្តាច់វដ្តបង្កាត់ពូជមូស និងការពារសុខភាពរបស់គ្រួសារ និងសហគមន៍ឱ្យបានកាន់តែប្រសើរ៕

ដោយ៖ឈុនសារ៉ាត