AKP បន្ទាយមានជ័យ ថ្ងៃទី១២ ខែកញ្ញា ឆ្នាំ២០២៦---     

ការចុះទៅដល់មូលដ្ឋាន ដើម្បីស្តាប់ដោយផ្ទាល់នូវបទពិសោធន៍ បញ្ហាប្រឈម និងតម្រូវការរបស់ប្រជាកសិករ ព្រមទាំងពិនិត្យមើលលទ្ធផលជាក់ស្តែងនៅតាមស្រែ គឺជាមូលដ្ឋានសំខាន់សម្រាប់ការរៀបចំវិធានការគាំទ្រឱ្យចំគោលដៅ។

ក្នុងស្មារតីនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទា យមានជ័យ បានបន្តចុះជួបផ្ទាល់ជាមួយប្រជាពលរដ្ឋនៅស្រុកអូរជ្រៅ ខេត្តបន្ទាយមានជ័យ ដើម្បីស្តាប់ពីបទពិសោ ធន៍ បញ្ហាប្រឈម និងពិនិត្យវឌ្ឍនភាពស្រែបង្ហាញ ព្រមទាំងការផ្ទេរបច្ចេកទេសរបស់មន្ត្រីកសិកម្មឃុំ-សង្កាត់ជូនប្រជាពលរដ្ឋ។

កាលពីរសៀលថ្ងៃទី១១ ខែកញ្ញា ឆ្នាំ២០២៦ ឯកឧត្តម ឌិត ទីណា បានអញ្ជើញជួបសំណេះសំណាលជាមួយបងប្អូនប្រជាពលរដ្ឋ ដោយផ្តោតសំខាន់លើការស្តាប់ពីស្ថានភាពជាក់ស្តែងរបស់កសិករ និងការអនុវត្តបច្ចេកទេសកសិក ម្មនៅមូលដ្ឋាន។

ការចុះពិនិត្យផ្ទាល់នេះ ក៏ជាឱកាសសម្រាប់ពិនិត្យមើលវឌ្ឍនភាពស្រែបង្ហាញ ដែលមានតួនាទីជាកន្លែងសាកល្បង និងបង្ហាញបច្ចេកទេសកសិកម្មឱ្យកសិករបានឃើញជាក់ស្តែង មុននឹងយកទៅអនុវត្តក្នុងស្រែរបស់ខ្លួន។

ក្នុងជំនួបជាមួយប្រជាពលរដ្ឋ ឯកឧត្តម ឌិត ទីណា បានផ្តោតការយកចិត្តទុកដាក់លើការធ្វើឱ្យការងារកសិកម្មនៅមូលដ្ឋានកាន់តែមានប្រសិទ្ធភាព តាមរ យៈការធ្វើឱ្យមន្ត្រីកសិកម្មឃុំ-សង្កាត់ក្លាយជាអ្នកផ្តល់ចំណេះដឹង និងបច្ចេកទេសដែលកសិករអាចយកទៅប្រើប្រាស់បានជាក់ស្តែង។ ការផ្ទេរបច្ចេកទេសមិនគួរឈប់ត្រឹមការណែនាំទូទៅនោះទេ ប៉ុន្តែត្រូវឆ្លើយតបនឹងបញ្ហាជាក់ស្តែងរបស់កសិករនៅតាមតំបន់នីមួយៗ។

ឯកឧត្តមរដ្ឋមន្ត្រីបានលើកឡើងជាបន្តប ន្ទាប់ពីសារៈសំខាន់នៃការនាំយកចំណេះដឹង និងបច្ចេកទេសទៅដល់កសិករដោយផ្ទាល់ ព្រោះការអភិវឌ្ឍវិស័យកសិកម្មមិនអាចផ្អែកតែលើការផ្តល់ធាតុចូល ឬការជួយដោះស្រាយបញ្ហារយៈ ពេលខ្លីនោះទេ ប៉ុន្តែត្រូវធ្វើឱ្យកសិករមានសមត្ថភាពចេះដឹង និងអាចសម្រេចចិត្តបានត្រឹមត្រូវក្នុងការផលិត។

តាមរយៈស្រែបង្ហាញ កសិករអាចរៀនសូ ត្រពីការអនុវត្តជាក់ស្តែង ចាប់ពីការរៀបចំដី ការជ្រើសរើសពូជ ការប្រើប្រាស់ជី និងធាតុចូលឱ្យសមស្រប ការគ្រប់គ្រងទឹក និងការថែទាំដំណាំ រហូតដល់ការប្រមូលផល។ ចំណុចសំខាន់ គឺធ្វើឱ្យបច្ចេកទេសក្លាយជាចំណេះដឹងដែលកសិករអាចអនុវត្តបានដោយខ្លួនឯង និងអាចកាត់បន្ថយចំណាយ ខណៈពេលដែលបង្កើនផលិតភាព និងគុណភាពផលិតផល។

ការចុះមូលដ្ឋានរបស់ឯកឧត្តម ឌិត ទីណា ក៏បង្ហាញពីការផ្តោតលើវិធីសាស្ត្រ «ស្តាប់បញ្ហាពីកសិករ ដើម្បីដោះស្រាយបញ្ហាជាមួយកសិករ» ដោយមិនមើលតែតួលេខ ឬលទ្ធផលនៅលើក្រដាសនោះទេ ប៉ុន្តែពិនិត្យមើលស្ថានភាពនៅក្នុងស្រែ និងស្តាប់បទពិសោធន៍ពីអ្នកដែលកំពុងប្រកបរបរកសិកម្មផ្ទាល់។

ក្នុងបរិបទដែលកសិករត្រូវប្រឈមមុខនឹ ងបញ្ហាជាច្រើន ដូចជា ថ្លៃដើមផលិតកម្ម ការគ្រប់គ្រងទឹក ការប្រែប្រួលអាកាស ធាតុ គុណភាពផលិតផល និងទីផ្សារ ការពង្រឹងសមត្ថភាពបច្ចេកទេសកសិករមានសារៈសំខាន់យ៉ាងខ្លាំង។ កសិករដែលមានចំណេះដឹង និងទទួលបានការណែនាំត្រឹមត្រូវ អាចកាត់បន្ថយការប្រើប្រាស់ធាតុចូលដែលមិនចាំបាច់ និងជ្រើសរើសវិធីផលិតដែលសមស្របទៅនឹងស្ថានភាពជាក់ស្តែង។

ជាមួយគ្នានេះ ការដាក់ឱ្យមន្ត្រីកសិកម្មឃុំ-សង្កាត់ចុះធ្វើការជាមួយកសិករជាប្រចាំ ក៏ជាការពង្រឹងខ្សែសង្វាក់ផ្ទេរបច្ចេកទេសពីក្រសួងទៅមូលដ្ឋាន និងពីមូលដ្ឋានទៅកាន់កសិករ។ ប្រសិនបើដំណើរការនេះអាចធ្វើបានជាប់លាប់ នោះបញ្ហារបស់កសិករនឹងត្រូវបានប្រមូល និងបញ្ជូនត្រឡប់ទៅកាន់ថ្នាក់ជំនាញ ដើម្បីស្វែងរកដំណោះស្រាយបានកាន់តែឆាប់រហ័ស និងចំគោលដៅ។

ជាក់ស្តែង ការចុះពិនិត្យស្រែបង្ហាញ និងស្តាប់បទពិសោធន៍ពីប្រជាពលរដ្ឋនៅស្រុកអូរជ្រៅ នាពេលនេះ មិនត្រឹមតែជាការពិនិត្យលទ្ធផលការងារនោះទេ ប៉ុន្តែជាការប្រមូលធាតុចូលពីមូលដ្ឋាន ដើម្បីកែលម្អការងារផ្ទេរបច្ចេកទេស និងធ្វើឱ្យការគាំទ្រផ្នែកកសិកម្មកាន់តែមានប្រសិ ទ្ធភាព។

សកម្មភាពនេះក៏បង្ហាញថា ការអភិវឌ្ឍវិស័យកសិកម្មត្រូវការការចូលរួមពីគ្រប់ភាគី ជាពិសេសមន្ត្រីជំនាញ អាជ្ញាធរមូលដ្ឋាន និងកសិករ ដោយផ្តោតលើគោលដៅរួម គឺធ្វើឱ្យការផលិតកាន់តែមានប្រសិទ្ធភាព កាត់បន្ថយថ្លៃដើម បង្កើនគុណភាព និងប្រាក់ចំណូលរបស់គ្រួសារកសិករ។

តាមរយៈការចុះមូលដ្ឋានជាបន្តបន្ទាប់របស់ឯកឧត្តម ឌិត ទីណា ការងារកសិកម្មត្រូវបានជំរុញឱ្យផ្តោតលើ «បញ្ហាជាក់ស្តែងរបស់កសិករ និងដំណោះស្រាយដែលអាចអនុវត្តបាន»។ នេះជាវិធីសាស្ត្រដែលអាចជួយភ្ជាប់គោលនយោបាយជាមួយការអនុវត្តនៅមូលដ្ឋាន និងធ្វើឱ្យចំណេះដឹងបច្ចេកទេសក្លាយជាឧបករណ៍សំខាន់សម្រាប់កសិករក្នុងការបង្កើនផលិតភាព និងពង្រឹងជីវភាពគ្រួសាររបស់ខ្លួន៕

ដោយ៖ ឈុនសារ៉ាត