AKP បន្ទាយមានជ័យ ថ្ងៃទី១២ខែកញ្ញា ឆ្នាំ២០២៦---

ក្នុងស្មារតី «សមរភូមិក្រោយ គាំទ្រសមរភូមិមុខ» និង «ខ្មែរជួយខ្មែរ» គណៈប្រតិភូក្រសួងកសិកម្ម រុក្ខាប្រមាញ់ និងនេសាទ ដឹកនាំដោយ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១១ខែកញ្ញាឆ្នាំ២០២៦នេះបានអញ្ជើញចុះសួរសុខទុក្ខ និងរឹតចំណង «សម្ព័ន្ធមេត្រីភាព» ជាមួយកងការពារព្រំដែនលេខ ៥០៣ ដែលកំពុងឈរជើងបំពេញបេសកកម្មការពារព្រំដែនក្នុងខេត្តបន្ទាយមានជ័យ ក្នុងឱកាសបុណ្យភ្ជុំបិណ្ឌ ឆ្នាំ២០២៦ ខាងមុខនេះ។

ក្នុងឱកាសនោះ ឯកឧត្តម ឌិត ទីណា បានពាំនាំនូវការផ្តាំផ្ញើសួរសុខទុក្ខ និងក្តីនឹករលឹកពីសំណាក់ សម្តេចអគ្គមហា សេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជូនចំពោះនាយទាហាន នាយ ទាហានរង និងពលទាហាន នៃកងការពារព្រំដែនលេខ ៥០៣ ដែលកំពុងបំពេញបេសកកម្មយ៉ាងអង់អាចក្លាហាន ដើម្បីការពារបូរណភាពទឹកដី អធិបតេយ្យភាពជាតិ និងសុខសុវត្ថិភាពជូនប្រជាពលរដ្ឋ។

ឯកឧត្តមរដ្ឋមន្ត្រីបានសម្តែងនូវការកោត សរសើរ និងការដឹងគុណយ៉ាងជ្រាល ជ្រៅចំពោះកងកម្លាំងការពារព្រំដែន ដែលបានលះបង់កម្លាំងកាយចិត្ត ពេលវេលា និងជីវិតផ្ទាល់ខ្លួន ដើម្បីបំពេញភារកិច្ចដ៏ឧត្តុង្គឧត្តមជូនជាតិ និងប្រជាជន។ ការលះបង់របស់វីរយុទ្ធជននៅសមរភូមិមុខ គឺជាកម្លាំងដ៏សំខាន់ដែលធានាឱ្យប្រជាពលរដ្ឋនៅសមរភូមិក្រោយអាចរស់នៅ ប្រកបរបររកស៊ី និងអភិវឌ្ឍសង្គមប្រកបដោយភាពសុខសាន្ត។

ជាមួយគ្នានេះ ឯកឧត្តម ឌិត ទីណា បានបញ្ជាក់ពីសារៈសំខាន់នៃការរួមចំណែករបស់ស្ថាប័នស៊ីវិល ក្នុងការគាំទ្រដល់កងកម្លាំងនៅជួរមុខ។ តាមរយៈស្មារតី «ខ្មែរជួយខ្មែរ» ក្រសួងកសិកម្ម រុក្ខាប្រមា ញ់ និងនេសាទ បានចងភ្ជាប់ចំណងមនោសញ្ចេតនា និងសម្ព័ន្ធមេត្រីភាពជាមួយអង្គភាពជួរមុខ ដោយផ្តល់ការគាំទ្រ ការឧបត្ថម្ភ ព្រមទាំងចំណេះដឹង និងបច្ចេកទេសកសិកម្ម ដើម្បីជួយបង្កើនផលិតភាព និងផលិតកម្មកសិកម្មនៅនឹងកន្លែង។

ការចុះសួរសុខទុក្ខ និងគាំទ្រដល់កងការពា រព្រំដែននាពេលនេះ មិនត្រឹមតែជាការផ្តល់កម្លាំងចិត្តដល់កងទ័ពប៉ុណ្ណោះ ទេ ប៉ុន្តែថែមទាំងជាការបង្ហាញពីការយកចិត្តទុកដាក់ចំពោះជីវភាពរស់នៅរបស់វីរយុទ្ធជន និងក្រុមគ្រួសារកងទ័ពផងដែរ។ នេះជាការឆ្លុះបញ្ចាំងថា អ្នកនៅជួរមុខមិនត្រូវបានទុកឱ្យនៅតែម្នាក់ឯងឡើយ ព្រោះស្ថាប័នស៊ីវិល និងប្រជាជននៅសមរភូមិក្រោយ តែងតែឈរនៅក្បែរ និងចូលរួមគាំទ្រជានិច្ច។

ឯកឧត្តមរដ្ឋមន្ត្រីបានលើកឡើងថា ការរួមគ្នារវាងកងកម្លាំងប្រដាប់អាវុធ និងស្ថាប័នស៊ីវិល គឺជាកម្លាំងសាមគ្គីភា ពដ៏មានតម្លៃសម្រាប់ការកសាងខឿនការពារជាតិឱ្យកាន់តែរឹងមាំ។ ជាពិសេស ការជួយគាំទ្រផ្នែកកសិកម្ម និងការលើកកម្ពស់ជីវភាពនៅតំបន់ព្រំដែន អាចរួមចំណែកធ្វើឱ្យគ្រួសារកងទ័ពមានជីវភាពកាន់តែប្រសើរ និងជួយពង្រឹងភាពធន់របស់សហគមន៍នៅតំបន់ព្រំដែន។

តាងនាមថ្នាក់ដឹកនាំ និងមន្ត្រីរាជការនៃក្រសួងកសិកម្ម រុក្ខាប្រមាញ់ និងនេសាទ ឯកឧត្តម ឌិត ទីណា បានសម្តែងនូវការកោតសរសើរ និងការដឹងគុណយ៉ាងជ្រាល ជ្រៅបំផុតចំពោះនាយទាហាន នាយទាហានរង និងពលទាហានទាំងអស់ ដែលបានលះបង់កម្លាំងកាយចិត្ត និងសាច់ស្រស់ឈាមស្រស់ ដើម្បីការពារបូរណភាពទឹកដី និងអធិបតេយ្យភាពជាតិ។

ការរឹតចំណង «សម្ព័ន្ធមេត្រីភាព» រវាងក្រសួងកសិកម្ម និងកងការពារព្រំដែនលេខ ៥០៣ នៅក្នុងឱកាសបុណ្យភ្ជុំបិ ណ្ឌនេះ គឺជាសារដ៏មានអត្ថន័យមួយបញ្ជាក់ថា សាមគ្គីភាពជាតិ និងការចូលរួមរបស់ប្រជាជនទាំងមូល គឺជាមូលដ្ឋានដ៏រឹងមាំក្នុងការគាំទ្រអ្នកការពារជាតិ។ ពោលគឺ ខណៈកងកម្លាំងនៅជួរមុខបំពេញភារកិច្ចការពារទឹកដី សមរភូមិក្រោយក៏ត្រូវរួមគ្នាគាំទ្រ លើកទឹកចិត្ត និងជួយសម្រាលបន្ទុក ដើម្បីឱ្យវីរយុទ្ធជនមានភាពកក់ក្តៅ និងមានកម្លាំងចិត្តបន្តបំពេញបេសកកម្មដ៏ឧត្តុង្គឧត្តមរបស់ខ្លួន៕

ដោយ ៖ឈុនសារ៉ាត