AKP ភ្នំពេញ ថ្ងៃទី៩ ខែកញ្ញា ឆ្នាំ២០២៦--អនុវត្តន៍តាមអនុសាសន៍ របស់ឯកឧត្តម សុខ លូ ប្រធានគណៈកម្មាធិការសាខាកាកបាទក្រហមកម្ពុជា ខេត្តបាត់ដំបង នៅព្រឹកថ្ងៃទី៩ ខែកញ្ញា ឆ្នាំ២០២៦ លោកឡុង សុភឺន ប្រធានស្តីទីគណៈកម្មាធិការអនុសាខាកាកបាទក្រហមកម្ពុជា ស្រុកមោងឬស្សី និងសហការីបានចុះសួរសុខទុក្ខ និងនាំយកអំណោយ មនុស្សធម៌របស់សប្បុរសជន ផ្តល់ជូនគ្រួសារ ងាយរងគ្រោះបំផុតដែលកំពុងជួបការលំបាកក្នុងជីវភាពរស់នៅប្រចាំថ្ងៃ ចំនួន ១៣គ្រួសារ មកពី ឃុំមោង និងឃុំគារ ស្រុកមោងស្សី ខេត្តបាត់ដំបង។
លោក ឡុង សុភឺន បាននាំយក នូវប្រសាសន៍ផ្តាំផ្ញើរបស់ឯកឧត្តម សុខ លូ អភិបាលខេត្តនិងជាប្រធានគណៈកម្មាធិការសាខាខេត្តពិសេស សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលផ្ដាំផ្ញើសួរសុខទុក្ខ ក្តីនឹករលឹក អាណិតស្រឡាញ់ យ៉ាងជ្រាលជ្រៅ និងគិតគូរជានិច្ច ចំពោះសុខទុក្ខរបស់ បងប្អូនប្រជាពលរដ្ឋ ដែលជួបការលំបាក ដោយមិន ប្រកាន់ពីនិន្នាការណាមួយឡើយ។

ដើម្បីជួយសម្រាលការលំបាកដល់ជីវភាពរស់នៅរបស់ក្រុមគ្រួសារ អនុសាខាកាកបាទក្រហមកម្ពុជាស្រុក បាននាំយកអំណោយផ្តល់ជូនរួមមាន៖
-អង្ករ២៥គក្រ -ទឹកត្រី១យួរ -ទឹកស៊ីអ៊ីវ១យួរ -មី១កេស -ឃីត១កញ្ចប់ (មុង១, ភួយ១, កន្ទេល១, ខ្នើយ១, ក្រមា១, សារ៉ុង១)
-និងថវិកាមួយចំនួន
-ដោយឡែក១គ្រួសារកុមារីឈ្មោះ ម៉ន វណ្ណា ភេទ ស្រី អាយុ ១៣ ឆ្នាំរស់នៅភូមិកោះថ្កូវ ឃុំគារ ទទួលបានបន្ថែម: កង់១គ្រឿង (ឧបត្ថម្ភដោយអង្គការOEC)ផងដែរ ។

ដោយ៖ ពេជ្រ សំអឿន(ប្រភព៖កាកបាទក្រហមកម្ពុជា)