AKP ភ្នំពេញ ថ្ងៃទី៩ ខែកញ្ញា ឆ្នាំ២០២៦---

លោកជំទាវ និន សាផុន ប្រធានគណៈកម្មការសាធារណការ ដឹកជញ្ជូន អាកាសចរណ៍ស៊ីវិល ប្រៃសណីយ៍ ទូរគមនាគមន៍ ឧស្សាហកម្ម វិទ្យាសាស្រ្ត បច្ចេកវិទ្យា នវានុវត្តន៍ រ៉ែ ថាមពល ពាណិជ្ជកម្ម រៀបចំដែនដី នគររូបនីយកម្ម និងសំណង់ (គណៈកម្មការទី៩) នៃរដ្ឋសភា បានអញ្ជើញដឹកនាំរៀបចំពិធីដង្ហែ «ព្រះពុទ្ធបដិមា» យកទៅតម្កល់ក្នុងបុស្បុកជាទីសក្ការៈ នៅវត្តសីហរតនារាម ស្ថិតក្នុងក្រុងដូនកែវ ខេត្តតាកែវ ប្រកបដោយបរិយាកាសជ្រះថ្លា និងអធិកអធមបំផុត នៅព្រឹកថ្ងៃទី៩ ខែកញ្ញា ឆ្នាំ២០២៦។

ពិធីនេះត្រូវបានរៀបចំឡើងក្រោមគំនិតផ្តួចផ្តើម និងកម្លាំងសទ្ធាជ្រះថ្លារបស់គណៈកម្មការទី៩ នៃរដ្ឋសភា ដោយមានការចូលរួមចំណែកយ៉ាងថ្លៃថ្លាពី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ក្នុងគោលបំណងទ្រទ្រង់ លើកស្ទួយវិស័យព្រះពុទ្ធសាសនា និងរួមចំណែកកសាងសមិទ្ធផលនានាក្នុងទីអារាម ទុកជាទីសក្ការបូជានៃពុទ្ធបរិស័ទជិតឆ្ងាយ។

លក្ខណៈពិសេសនៃព្រះពុទ្ធបដិមា និងបុស្បុក ជាព្រះពុទ្ធរូបទ្រង់ព្រះសមាធិមុទ្រៈ ដកស្រង់ចេញពីថ្មកែវ ខេត្តពោធិ៍សាត់។ ទម្រង់ព្រះភ័ក្ត្រ និងកាយវិការ (មុទ្រ) ត្រូវបានពិភាក្សា និងត្រួតពិនិត្យយ៉ាងល្អិតល្អន់ពីថ្នាក់ដឹកនាំក្រសួងធម្មការ និងសាសនា ព្រមទាំងគណៈ សង្ឃនាយក ដើម្បីធានាឱ្យត្រឹមត្រូវតាមក្បួនខ្នាតព្រះពុទ្ធសាសនា និងការអភិរក្សរចនាប័ទ្មសិល្បៈខ្មែរ។

សម្រាប់បុស្បុក ត្រូវបានដឹកនាំសាងសង់ដោយ ឯកឧត្តម លី រស្មី រដ្ឋលេខាធិការក្រសួងរៀបចំដែន ដី នគរូបនីយកម្ម និងសំណង់ ដែលជាស្ថាបត្យករឆ្នើមធ្លាប់បានចូលរួមសាង សង់អគារ និងហេដ្ឋារចនាសម្ព័ន្ធធំៗរបស់ជាតិ។

សារៈសំខាន់ និងអត្ថន័យ នៃព្រះពុទ្ធប្បដិមា មិនត្រឹមតែជារូបសំណាកតំណាងឱ្យព្រះសមណគោតមប៉ុណ្ណោះទេប៉ុន្តែជានិមិត្តរូប នៃព្រះធម៌ ព្រះប្រាជ្ញាញាណ សន្តិភាព និងក្តីមេត្តាធម៌។ ការតម្កល់ ព្រះពុទ្ធរូបនេះ នឹងជួយដាស់តឿនស្មារតីពុទ្ធបរិស័ទ ឱ្យមានសតិរលឹកឃើញនូវព្រះគុណូបការៈ និងប្រកាន់ខ្ជាប់នូវការរស់នៅក្នុងផ្លូវសច្ចធម៌៕

ដោយ៖ ប៊ុនរិទ្ធ, ប្រភព៖ រដ្ឋសភា