AKP ភ្នំពេញ ថ្ងៃទី០៩ ខែកញ្ញា ឆ្នាំ២០២៦ -- វេទិកា Gulangyu ឆ្នាំ២០២៦ជាវេទិកាពិភាក្សាតុមូលរបស់ថ្នាក់ដឹកនាំធុរកិច្ចពិភពលោកសម្រាប់ការវិនិយោគជាសកល ដែលត្រូវបានប្រារព្ធឡើងកាលពីពេលថ្មីៗនេះនៅទីក្រុងសៀមិន ខេត្តហ្វ៊ូជៀន គឺជាព្រឹត្តិការណ៍ក្រៅឆាកនៃពិព័រណ៍អន្តរជាតិចិនសម្រាប់ការវិនិយោគ និងពាណិជ្ជកម្ម (CIFIT) លើកទី២៦ ដោយបានប្រមូលផ្តុំអ្នកតំណាងជាង ៤០០នាក់មកពីរដ្ឋាភិបាល សមាគមធុរកិច្ច ស្ថាប័នវិជ្ជាជីវៈ និងក្រុមហ៊ុនឈានមុខគេ ដើម្បីពិភាក្សាអំពីការគ្រប់គ្រងហានិភ័យក្នុងការវិនិយោគនៅក្រៅប្រទេស។

វេទិកានេះបានបង្ហាញនូវសុន្ទរកថាសំខាន់ៗ កិច្ចសន្ទនាកម្រិតខ្ពស់ ការលើកកម្ពស់ការវិនិយោគ ការផ្គូផ្គងធនធានឆ្លងដែន និងកិច្ចព្រមព្រៀងសហប្រតិបត្តិការមួយចំនួន។ វាគ្មិនមួយចំនួនបានចែករំលែកការយល់ដឹងអំពីឱកាសធុរកិច្ចសកលលោក យុទ្ធសាស្ត្រពង្រីកនៅក្រៅប្រទេស និងការគ្រប់គ្រងហានិភ័យ ខណៈដែលព្រឹត្តិការណ៍នេះបានផ្តល់នូវវេទិកាសម្រាប់កិច្ចសហប្រតិបត្តិការឆ្លងដែន និងការផ្គូផ្គងគម្រោងវិនិយោគនានា។

នៅក្នុងសុន្ទរកថា លោក វូ យ៉ុងហួ នាយកប្រតិបត្តិ និងជាសហនាយកប្រតិបត្តិនៃក្រុមហ៊ុន Anta Group បាននិយាយថា សកលភាវូបនីយកម្មលែងជាជម្រើសទៀតហើយ ប៉ុន្តែជាភាពចាំបាច់។ លោកបានចែករំលែកវិធីសាស្រ្តរបស់ក្រុមហ៊ុន Anta ក្នុងការរួមបញ្ចូលគ្នានូវផែនការជាសកលជាមួយនឹងប្រតិបត្តិការក្នុងស្រុក ដោយផ្តល់នូវការយល់ដឹងជាក់ស្តែងសម្រាប់ក្រុមហ៊ុនដែលកំពុងពង្រីកអាជីវកម្មនៅក្រៅប្រទេស។

ក្នុងអំឡុងពេលនៃកិច្ចសន្ទនាកម្រិតខ្ពស់ វាគ្មិនមកពីក្រុមហ៊ុន TUV Rheinland និងក្រុមហ៊ុន DMCC ព្រមទាំងស្ថាប័នដទៃទៀត បានពិភាក្សាអំពីការអនុលោមតាមច្បាប់នៅក្រៅប្រទេស ហានិភ័យនៃការវិនិយោគឆ្លងដែន និងយុទ្ធសាស្ត្រខ្សែសង្វាក់ផ្គត់ផ្គង់ជាសកល។ កិច្ចព្រមព្រៀងសហប្រតិបត្តិការក៏ត្រូវបានចុះហត្ថលេខារវាងសភាពាណិជ្ជកម្មអន្តរជាតិសៀមិន (CCPIT) និងសមាគមអាជីវកម្មក្រៅប្រទេសមួយចំនួនផងដែរ ដែលពង្រីកបណ្តាញអាជីវកម្មអន្តរជាតិរបស់ទីក្រុងនេះបន្ថែមទៀត។

វេទិកា Gulangyu ត្រូវបានធ្វើឡើងចំនួន ២៥លើក។ វាមានគោលបំណងពង្រឹងកិច្ចសន្ទនាវិនិយោគអន្តរជាតិ លើកកម្ពស់កិច្ចសហប្រតិបត្តិការជាក់ស្តែង និងគាំទ្រក្រុមហ៊ុននានាក្នុងការបន្តការអភិវឌ្ឍជាសកលដែលមានគុណភាពខ្ពស់៕

ដោយ៖ យា ចិន្ដាខន្ដី (ប្រភព៖ ឆាយណាដេលី)