AKP ភ្នំពេញ ថ្ងៃទី៩ ខែកញ្ញា ឆ្នាំ២០២៦--សាកលវិទ្យាធិការនៃសាកលវិទ្យាល័យជាតិឆុនប៊ុកកូរ៉េចង់ឃើញនិស្សិតកម្ពុជាបន្តសិក្សាជំនាញឯកទេសផ្នែកផលិតផលពាក់កណ្តាលសម្រេចសឺមុីកុងឌុចទ័រ  (Semi-conductor) បញ្ញាសិប្បនិម្មិតរូបវន្ត (Physical AI) និងកសិកម្មឱ្យបានច្រើន។

 ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ បានអញ្ជើ ញជួបសំណេះសំណាល និងពិភាក្សាការងារជាមួយលោកបណ្ឌិត O-Bong Yang សាកលវិទ្យាធិការនៃសាកលវិទ្យាល័យជាតិឆុនប៊ុក (Jeonbuk National University) នៅសាកលវិទ្យាល័យជាតិឆុនប៊ុក ក្នុងខេត្តឆុនប៊ុក សាធារណរដ្ឋកូរ៉េកាលពីថ្ងៃទី៧  ខែកញ្ញា ឆ្នាំ២០២៦។ 

សាកលវិទ្យាល័យជាតិឆុនប៊ុក ជាសាក លវិទ្យាល័យជាប់លំដាប់ថ្នាក់ទី៣ ក្នុងចំណោមសាកលវិទ្យាល័យជាតិរបស់កូរ៉េ មានជំនាញឯកទេសផ្នែក Semi-conductor, Physical AI និងកសិកម្ម ហើយក៏ជាសាកលវិទ្យាល័យដែលមាននិស្សិតកម្ពុជាបន្តការសិក្សាច្រើនជាងគេក្នុងចំណោមសាកលវិទ្យាល័យទាំងអស់ក្នុងប្រទេសកូរ៉េផងដែរ។

ក្នុងឱកាសនៃជំនួប លោកបណ្ឌិត Yang បានជម្រាបជូនឯកឧត្តមឯកអគ្គរាជទូតថា សាកលវិទ្យាល័យមានកិច្ចសហប្រតិបត្តិការជាមួយសាកលវិទ្យាល័យមួយចំនួនក្នុងប្រទេសកម្ពុជា និងបានបង្ហាញពីបំណងចង់ពង្រីកកិច្ចសហប្រតិបត្តិការបន្ថែមជាមួយសាកលវិទ្យាល័យដទៃទៀតនៅកម្ពុជា។ 

លោកបញ្ជាក់ថា លោកចង់ឃើញនិស្សិតកម្ពុជាកាន់តែច្រើនអាចបន្តការសិក្សារបស់ខ្លួនក្នុងសាកលវិទ្យាល័យជាតិឆុនប៊ុក ពិសេសលើមុខវិជ្ជា Semi-conductor និង Physical AI ។

ឯកឧត្តមឯកអគ្គរាជទូត បានថ្លែងអំ ណរគុណចំពោះសាកលវិទ្យាល័យដែលបានផ្តល់ឱកាសសិក្សាសម្រាប់និស្សិតកម្ពុជាទាំងអាហារូបករណ៍ និងបង់ថ្លៃ។

ឯកឧត្តមបានជម្រាបលោកបណ្ឌិតថា មុខវិជ្ជា Semi-conductor និង Physical AI ជាមុខវិជ្ជាដែលប្រទេសកម្ពុជាត្រូវការក្នុងការអភិវឌ្ឍសេដ្ឋកិច្ចជាតិក្នុងពេលបច្ចុប្បន្ន និងអនាគត។

ឯកឧត្តមក៏សង្ឃឹមថានិស្សិតកម្ពុជាកាន់ តែច្រើនអាចមកសិក្សាលើមុខវិជ្ជាទាំង ពីរនេះនៅសាកលវិទ្យាល័យជាតិឆុនប៊ុកផងដែរ។ 

ឆ្លៀតក្នុងឱកាសនោះ ឯកឧត្តមក៏បានអញ្ជើញលោកបណ្ឌិតសាកលវិទ្យាធិការ ទៅបំពេញទស្សនកិច្ចនៅប្រទេសកម្ពុជា ហើយបានជម្រាបថាស្ថានទូតរីករាយនឹងជួយសម្របសម្រួលជំនួបជំនួបរវាងសាកលវិទ្យាល័យនិង ក្រសួង-ស្ថាប័នកម្ពុជា ក្នុងឱកាសទស្សនកិច្ចរបស់លោកបណ្ឌិតក្នុងប្រទេសកម្ពុជាផងដែរ។

បន្ទាប់ពីជំនួបខាងលើ ឯកឧត្តមឯកអគ្គរាជទូត ក៏បានជួបសំណេះសំណាល​ និងសួរសុខទុក្ខប្អូនៗនិស្សិតកម្ពុជា​ ដែលកំពុងបន្តការសិក្សានៅសាកលវិទ្យាល័យជាតិឆុនប៊ុកប្រមាណ ៧០នាក់ ដែលប្អូនៗភាគច្រើនកំពុងសិក្សាថ្នាក់មូលដ្ឋានភាសាកូរ៉េ មុននឹងបន្តឈានទៅជ្រើសរើសមុខជំនាញសិក្សានៅឆ្នាំក្រោ យ។ 

ឯកឧត្តមបានលើកឡើងថា សាកលវិទ្យាជាតិឆុនប៊ុក ជាសាកលវិទ្យាល័យដែលជំនាញ Semi-conductor និង Physical AI ហើយវាក៏ជាមុខវិជ្ជាដែលកម្ពុជាត្រូវការសម្រាប់អភិវឌ្ឍប្រទេសផងដែរ ដូច្នេះសង្ឃឹមថាប្អូនៗនឹងជ្រើស រើសយកមុខវិជ្ជាទាំងពីរសម្រាប់ថ្នាក់សិក្សាជំនាញរបស់ប្អូនៗ។​ 

ឯកឧត្តមក៏បានលើកទឹកចិត្តប្អូនៗនិស្សិតកម្ពុជា​ ឱ្យខិតខំរៀនសូត្រទាំងភាសាកូរ៉េ និងជំនាញឯកទេស និងឆ្លៀតពេលធ្វើកម្មសិក្សានៅតាមស្ថាប័ននានា ដើម្បីទទួលបទពិសោធន៍ការងារជាក់ស្តែង ព្រមទាំងយកចិត្តទុកដាក់ថែរក្សាសុខភាព និងមើលថែគ្នាទៅវិញ ទៅមក៕

ដោយ៖ ប៊ុនរិទ្ធ