AKP ភ្នំពេញ ថ្ងៃទី០៣ ខែកញ្ញា ឆ្នាំ២០២៦--ឯកឧត្តម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជាបានគូសបញ្ជាក់ថា ការប្រកួតកីឡាអាស៊ី នៅប្រទេសជប៉ុន ក្នុងខែកញ្ញា ឆ្នាំ២០២៦នេះ គឺសហព័ន្ធត្រៀមបញ្ជូនកីឡាករ២នាក់ចូលរួមប្រកួត គឺកីឡាករ វី សុភ័ស ប្រកួតទម្ងន់៧០គ.ក្រ និងកីឡាករ ណេស្រេឌីនូវ អាន់វ៉ា លេងក្នុងទម្ងន់ ៨០គ.ក្រ ដោយព្រឹត្តិការណ៍ដ៏ធំរៀងរាល់៤ឆ្នាំម្តងនេះមានសារៈសំខាន់ ក្នុងការពង្រឹងគុណភាពជម្រើសជាតិឆ្ពោះទៅប្រកួតវគ្គជម្រុះកីឡាអូឡាំពិក នាឆ្នាំ២០២៨ នៅសហរដ្ឋអាមេរិក។

ប្រធានសហព័ន្ធរូបនេះលើកឡើងថា សម្រាប់ការប្រកួតកីឡាអាស៊ី មានកម្រិតខ្ពស់ជាងឆ្ងាយដែរពីស៊ីហ្គេម ដោយសារតែស៊ីហ្គេម មាន១១ប្រទេស ប៉ុន្តែកីឡាអាស៊ីមាន៤៥ប្រទេស ខណៈកីឡាករប្រដាល់សកលក្នុងទ្វីបអាស៊ីនេះភាគច្រើនសុទ្ធសឹងតែជាកីឡាករលំដាប់ពិភពលោកតែម្តង ដូចជាកីឡាករមកពីប្រទេសកាហ្សាក់ស្ថាន អ៊ូសបេគីស្ថាន ហ្វីលីពីនជាដើម។

ឯកឧត្តម ប៊ុយ សុភ័ណ្ឌ បានសង្កត់ធ្ងន់ថា សម្រាប់កីឡាករកម្ពុជាត្រៀមចូលរួមប្រកួតកីឡាអាស៊ី ឆ្នាំ២០២៦ នៅក្នុងខែកញ្ញានេះ គឺសហព័ន្ធបានត្រៀមខ្លួនឱ្យពួកគាត់ទាំងពីរនាក់ហ្វឹកហាត់តាំងពីដើមឆ្នាំមក។ ជាមួយនឹងការត្រៀមខ្លួននេះ សហព័ន្ធក៏បានឱ្យកីឡាករ ចូលរួមប្រកួតជាច្រើនមកដែរ ដើម្បីពង្រឹងគុណផលបច្ចេកទេសរបស់គាត់ឱ្យបានល្អ ហើយយើងរំពឹងថា ពួកគាត់នឹងអាចធ្វើបានល្អ នៅក្នុងព្រឹត្តិការណ៍ដ៏ធំរៀងរាល់៤ឆ្នាំងម្តង ប្រចាំទ្វីបអាស៊ីមួយនេះ។ បេក្ខភាពកីឡាករជម្រើសជាតិ ដែលត្រៀមខ្លួនចូលរួមប្រកួតកីឡាអាស៊ីនេះ គឺសហព័ន្ធបានឱ្យពួកគាត់ទាំងពីរនាក់ហ្វឹកហាត់ពិសេសជាមួយគ្រូបង្វឹកបរទេស ដែលជាគ្រូស្ម័គ្រចិត្តរបស់សហព័ន្ធ និងក៏ជាអតីតកីឡាករប្រដាល់សកលអាជីពផងដែរ។

ឯកឧត្តម ប៊ុយ សុភ័ណ្ឌ បន្ថែមថា ជាការសង្កេតឃើញថា ពួកគាត់បង្កើនបានគុណភាពបច្ចេកទេសបន្ថែមបានច្រើន។ ចំពោះប្រទេសដែលជាឧបសគ្គធំសម្រាប់ព្រឹត្តិការណ៍នេះ គឺកីឡាករមកពីប្រទេសកាហ្សាក់ស្ថាន អ៊ូសបេគីស្ថាន ជាដើម ដែលជាម្ចាស់មេដាយមាសអូឡាំពិកហ្គេមច្រើនជាងគេ ជាពិសេអូឡាំពិកហ្គេម នៅទីក្រុងប៉ារីស ប្រទេសបារាំង កាលពីឆ្នាំ២០២៤កន្លងទៅ។ យើងគិតថា បណ្តាប្រទេសទាំងនេះគឺជាឧបសគ្គធំសម្រាប់ការប្រកួតរបស់កីឡាករជម្រើសជាតិកម្ពុជា។ បើទោះបីជា ជម្រើសជាតិកម្ពុជានឹងប៉ះជាមួយកីឡាករអន្តរជាតិកម្រិតពិភពលោកក៏ដោយ ក៏យើងចាត់ទុកថា នោះជាឱកាសមួយ ក្នុងការពង្រឹងបច្ចេកទេសបន្ថែមរបស់យើង ពីព្រោះគោលដៅធំរបស់សហព័ន្ធ គឺមិនត្រឹមតែការប្រកួតកីឡាអាស៊ីនេះប៉ុណ្ណោះទេ ប៉ុន្តែថែមទាំងការត្រៀមចូលរួមប្រកួតជម្រុះកីឡាអូឡាំពិក នៅឆ្នាំ២០២៧ខាងមុខ ដើម្បីទទួលបានសិទ្ធិឆ្ពោះទៅអូឡាំពិកហ្គេម ឆ្នាំ២០២៨ នៅទីក្រុង Los Angeles សហរដ្ឋអាមេរិកផងដែរ៕

ដោយ ហេង ណាលីន