AKP ភ្នំពេញ ថ្ងៃទី២ ខែសីហា ឆ្នាំ២០២៦--ឯកឧត្តម ងុយ រិទ្ធ រដ្ឋលេខាធិការ ក្រសួងការងារនិងបណ្តុះបណ្តាលវិជ្ជាជីវៈ បានអញ្ជើញជាអធិបតីក្នុងវគ្គបណ្តុះបណ្តាលស្តីពី "ការលើកកម្ពស់ការយល់ដឹងស្ដីពីការបង្ការនិងទប់ស្កាត់ហិង្សានិងការបៀតបៀននៅកន្លែងធ្វើការ" នាព្រឹកថ្ងៃទី១ ខែកញ្ញា ឆ្នាំ២០២៦ នៅសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC)។

វគ្គបណ្តុះបណ្តាលនេះ ត្រូវបានរៀបចំឡើងក្រោមកិច្ចសហការរវាងវិទ្យាស្ថានជាតិការងារ និងសមាគម TAFTAC ពីថ្ងៃទី១ ដល់ថ្ងៃទី៤ ខែកញ្ញា ឆ្នាំ២០២៦ ដែលការចូលរួមពីតំណាងមកពីសហគ្រាស ក្រុមហ៊ុន និងរោងចក្រប្រមាណ ៣៩០០នាក់។  វគ្គបណ្តុះបណ្តាលមានគោលបំណងលើកកម្ពស់ការយល់ដឹងអំពីសិទ្ធិនិងកាតព្វកិច្ចរបស់ភាគីពាក់ព័ន្ធ ព្រមទាំងជំរុញការកសាងបរិយាកាសការងារប្រកបដោយសុវត្ថិភាព សេចក្ដីថ្លៃថ្នូរ និងការគោរពគ្នាទៅវិញទៅមក។

ថ្លែងទៅកាន់អង្គពិធី ឯកឧត្តមរដ្ឋលេខាធិការបានគូសបញ្ជាក់ពីសារៈសំខាន់នៃការបញ្ជ្រាបនិងលើកកម្ពស់ការយល់ដឹងអំពីសិទ្ធិនិងកាតព្វកិច្ចដល់គ្រប់ភាគីពាក់ព័ន្ធ ជាពិសេសបុគ្គលិករដ្ឋបាល អ្នកបកប្រែ អ្នកគ្រប់គ្រងធនធានមនុស្ស ប្រធានផ្នែកផលិតកម្ម និងថ្នាក់ដឹកនាំក្រុមហ៊ុន រោងចក្រ សហគ្រាស ដើម្បីចូលរួមបង្ការ​និង​ទប់ស្កាត់អាកប្បកិរិយានិងពាក្យសម្ដីមិនសមរម្យនៅកន្លែងធ្វើការ។

ឯកឧត្តមបានបញ្ជាក់ថា ការបង្ការនិងទប់ស្កាត់សកម្មភាពទាំងនេះ ត្រូវអនុវត្តស្របតាមក្របខ័ណ្ឌច្បាប់ជាតិ និងគោលការណ៍នៃបទដ្ឋានអន្តរជាតិខាងការងារ ដែលផ្តោតលើការការពារមនុស្សគ្រប់រូបក្នុងពិភពការងារ ពីអំពើហិង្សានិងការបៀតបៀនទាំងផ្លូវកាយ ផ្លូវចិត្ត ផ្លូវភេទ សេដ្ឋកិច្ច និងអំពើហិង្សានិងការបៀតបៀនដោយផ្អែកលើយេនឌ័រ។

ឯកឧត្តមបានកត់សម្គាល់ថា ទោះបីបញ្ហាទាំងនេះត្រូវបានកាត់បន្ថយគួរឱ្យកត់សម្គាល់ក៏ដោយ ក៏ករណីមួយចំនួននៅតែបន្តកើតមាន និងអាចបង្កឱ្យមានវិវាទការងារ កូដកម្ម ឬការតវ៉ា ដែលជះផលប៉ះពាល់ដល់ទំនាក់ទំនងវិជ្ជាជីវៈ ផលិតកម្ម និងកេរ្តិ៍ឈ្មោះរបស់សហគ្រាស។

ក្នុងន័យនេះ ឯកឧត្តមបានជំរុញឱ្យគ្រប់ភាគីចូលរួមសហការជាមួយក្រសួងការងារនិងបណ្តុះបណ្តាលវិជ្ជាជីវៈ ដើម្បីរួមគ្នាលើកកម្ពស់លក្ខខណ្ឌការងារនិងបរិយាកាសការងារ ព្រមទាំងប្រែក្លាយសហគ្រាសមួយជាសហគមន៍សុខសាន្តមួយ។

ឯកឧត្តមរដ្ឋលេខាធិការ បានលើកទឹកចិត្តដល់ម្ចាស់ ឬនាយកសហគ្រាស ក្រុមហ៊ុន និងរោងចក្រទាំងអស់ ឱ្យណែនាំដល់គណៈគ្រប់គ្រងនិងប្រធានផ្នែកផលិតកម្មរបស់ខ្លួន ជាពិសេសបុគ្គលដែលធ្វើការដោយផ្ទាល់ជាមួយកម្មករនិយោជិត ឱ្យប្រកាន់ខ្ជាប់នូវការគោរពសិទ្ធិការងារ សេចក្ដីថ្លៃថ្នូរ និងតម្លៃរបស់មនុស្ស ព្រមទាំងហាមឃាត់និងទប់ស្កាត់ជាដាច់ខាតនូវរាល់ទម្រង់នៃការជេរប្រមាថ ការគំរាមកំហែង អំពើហិង្សា និងការបៀតបៀននៅកន្លែងធ្វើការ។

ជាមួយគ្នានេះ ក្រសួងក៏បានអំពាវនាវដល់បងប្អូនកម្មករនិយោជិតទាំងអស់ឱ្យប្រកាន់ខ្ជាប់នូវវិន័យការងារ បំពេញកាតព្វកិច្ចរបស់ខ្លួន គោរពសិទ្ធិនិងសេចក្ដីថ្លៃថ្នូររបស់អ្នកដទៃ និងរាយការណ៍ជូនអធិការការងារឬអាជ្ញាធរមានសមត្ថកិច្ច ប្រសិនបើបានឃើញ ឬទទួលរងអាកប្បកិរិយាឬពាក្យសម្ដីមិនសមរម្យណាមួយនៅកន្លែងធ្វើការ។ ឯកឧត្តមបានណែនាំឱ្យអធិការការងារបន្តពង្រឹងការត្រួតពិនិត្យ និងចាត់វិធានការយ៉ាងម៉ឺងម៉ាត់ ដោយឈរលើគោលការណ៍យុត្តិធម៌ តម្លាភាព និងមិនលម្អៀង៕

ដោយ៖ ប៊ុនរិទ្ធ , ប្រភព៖ ក្រសួងការងារ