AKP បន្ទាយមានជ័យ ថ្ងៃទី៣១ ខែសីហា ឆ្នាំ២០២៦--ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួង មហាផ្ទៃ បានអញ្ជើញជាអធិបតីភាពក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារស្នងការដ្ឋាននគរបាលខេត្តបន្ទាយមានជ័យថ្មី ចំនួន១ខ្នង កម្ពស់ ៣ជាន់ ស្មើនឹង១៦បន្ទប់ នៅព្រឹកថ្ងៃទី៣១ ខែសីហា ឆ្នាំ២០២៦ ដោយ មានការចូលរួមពីថ្នាក់ដឹកនាំខេត្ត មន្ត្រីរាជការ និងកងកម្លាំងនគរបាលជាច្រើនរូប។    
ក្នុងឱកាសនេះ ឯកឧត្តមអភិសន្តិបណ្ឌិត ស សុខា បានផ្តោតការយកចិត្តទុកដាក់លើសារៈសំខាន់នៃការកសាង និងកែលម្អហេដ្ឋារចនាសម្ព័ន្ធរបស់ស្ថាប័ននគរបាល ដោយចាត់ទុកថា ការមានទីកន្លែងបំពេញការងារសមរម្យ និងមានលក្ខណៈទំនើប គឺជាផ្នែកមួយដែលអាចជួយគាំទ្រដល់ការបំពេញភារកិច្ចរបស់មន្ត្រីនគរបាលឱ្យកាន់តែមានប្រសិ ទ្ធភាព ស្របតាមតម្រូវការរបស់សង្គម និងការរីកចម្រើនរបស់ខេត្ត។     
ឯកឧត្តមអភិសន្តិបណ្ឌិតបានគូសប ញ្ជាក់ថា សមិទ្ធផលដែលកើតមានឡើង មិនគួរត្រូវបានវាស់វែងត្រឹមតែតម្លៃ ឬទំហំអគារនោះទេ ប៉ុន្តែត្រូវមើលទៅលើប្រសិទ្ធភាពនៃការប្រើប្រាស់ ដើម្បីបម្រើផលប្រយោជន៍សាធារណៈ និងប្រជាពលរដ្ឋ។ ដូច្នេះ អគារថ្មីនេះត្រូវប្រើប្រាស់ឱ្យបានត្រឹមត្រូវ មានប្រសិទ្ធ ភាព និងត្រូវភ្ជាប់ជាមួយការបង្កើនគុណភាពការងារ និងសេវាសាធារណៈ។  

ឯកឧត្តមអភិសន្តិបណ្ឌិត ស សុខា ក៏បានណែនាំដល់ថ្នាក់ដឹកនាំ និងមន្ត្រីនគរបាលគ្រប់ជាន់ថ្នាក់ ត្រូវបន្តពង្រឹង ស្មារតីទទួលខុសត្រូវ វិន័យ សីលធម៌វិជ្ជាជីវៈ និងការបម្រើប្រជាពលរដ្ឋ ដោយត្រូវចាត់ទុកសន្តិសុខ សណ្តាប់ធ្នាប់សាធារណៈ និងសុវត្ថិភាពរបស់ប្រជាពលរដ្ឋ ជាភារកិច្ចស្នូលដែលត្រូវយកចិត្តទុកដាក់ជាប្រចាំ។    
ក្នុងន័យនេះ ការសម្ពោធអគារស្នងការដ្ឋាននគរបាលខេត្តបន្ទាយមានជ័យ មិនមែនគ្រាន់តែជាពិធីបង្ហាញសមិទ្ធ ផលរូបវន្តមួយប៉ុណ្ណោះទេ ប៉ុន្តែជាការបង្ហាញពីការយកចិត្តទុកដាក់លើការ បង្កើតលក្ខខណ្ឌការងារឱ្យបានល្អប្រសើរ សម្រាប់មន្ត្រីនគរបាលដែលត្រូវប្រឈមមុខនឹងភារកិច្ចដ៏ស្មុគស្មាញជារៀងរាល់ថ្ងៃ ក្នុងការរក្សាសន្តិសុខ សណ្តាប់ធ្នាប់ និងសុវត្ថិភាពសង្គម។  

 អគារស្នងការដ្ឋាននគរបាលខេត្តថ្មីនេះ មានចំនួន១ខ្នង កម្ពស់៣ជាន់ ស្មើនឹង ១៦បន្ទប់ ដែលនឹងក្លាយជាកន្លែងសម្រាប់បំពេញការងារ សម្របសម្រួល និងដឹកនាំប្រតិបត្តិការរបស់កងកម្លាំងនគរបាលខេត្តឱ្យកាន់តែមានប្រសិទ្ធ ភាព។ ការមានហេដ្ឋារចនាសម្ព័ន្ធសមស្រប ក៏ជួយបង្កើនលក្ខខណ្ឌការងារ និងបរិយាកាសបំពេញភារកិច្ចរបស់មន្ត្រីនគរបាល ដែលជាកត្តាសំខាន់មួយក្នុងការលើកកម្ពស់គុណភាពការងារ។     
ជាមួយគ្នានេះ ឯកឧត្តមអភិសន្តិបណ្ឌិត ស សុខា បានសង្កត់ធ្ងន់ពីសារៈសំខាន់នៃការរក្សាឱ្យបាននូវសន្តិសុខ និងសណ្តាប់ធ្នាប់សាធារណៈ ជាពិសេសនៅតំបន់ដែលមានសកម្មភាពសេដ្ឋកិច្ច ប្រ ជាជនរស់នៅ និងការធ្វើដំណើរឆ្លងកាត់ច្រើន។ ក្នុងនាមជាខេត្តជាប់ព្រំដែន ខេត្តបន្ទាយមានជ័យត្រូវការកងកម្លាំងនគរ បាលដែលមានសមត្ថភាព មានវិន័យ និងមានការសហការល្អជាមួយអាជ្ញាធរ និងកងកម្លាំងពាក់ព័ន្ធ ដើម្បីឆ្លើយតបចំពោះបញ្ហាសន្តិសុខ និងបទល្មើសគ្រប់ប្រភេទ។    

ជាពិសេស មន្ត្រីនគរបាលត្រូវបន្តពង្រឹងការបង្ការ ទប់ស្កាត់ និងបង្ក្រាបបទល្មើស ព្រមទាំងបង្កើនការទំនាក់ទំនងជាមួយប្រជាពលរដ្ឋ ដើម្បីឱ្យការងាររក្សាសន្តិសុខមូលដ្ឋានមានប្រសិទ្ធភាព និងទទួលបានការចូលរួមពីសហគមន៍។
  «អគារថ្មី ត្រូវភ្ជាប់ជាមួយការងារថ្មី និងប្រសិទ្ធភាពថ្មី» គឺជាអត្ថន័យសំខាន់ដែលអាចសរុបបានពីការដាក់ឱ្យប្រើប្រាស់សមិទ្ធផលថ្មីនេះ ពោលគឺ ការវិនិយោគលើហេដ្ឋារចនាសម្ព័ន្ធត្រូវបន្តបង្កើតជាលទ្ធផលជាក់ស្តែងក្នុងការ បម្រើប្រជាពលរដ្ឋ មិនមែនបញ្ចប់ត្រឹមពិធីសម្ពោធនោះឡើយ។      
 សម្រាប់ខេត្តបន្ទាយមានជ័យ ការទទួលបានអគារស្នងការដ្ឋានថ្មីនេះ ក៏ជាសញ្ញាមួយបង្ហាញពីការបន្តពង្រឹងមូលដ្ឋានសម្រាប់ការងារសន្តិសុខនៅមូលដ្ឋាន។ ទន្ទឹមនឹងការមានកន្លែងធ្វើការល្អប្រសើរ ការទទួលខុសត្រូវរបស់មន្ត្រីនគរបាលក្នុងការបំពេញភារកិច្ចប្រកបដោយវិជ្ជាជីវៈ និងភាពស្មោះត្រង់ ក៏ជាចំណុចដែលត្រូវដើរទន្ទឹមគ្នា។

     
ពិធីសម្ពោធនាព្រឹកថ្ងៃទី៣១ ខែសីហា ឆ្នាំ២០២៦នេះ បានក្លាយជាព្រឹត្តិការណ៍មួយដែលមិនត្រឹមតែបង្ហាញពីសមិទ្ធផលផ្នែកហេដ្ឋារចនាសម្ព័ន្ធប៉ុណ្ណោះទេ ប៉ុន្តែថែមទាំងបង្កើតជាកម្លាំងចិត្ត និងលក្ខខណ្ឌការងារថ្មីសម្រាប់កងកម្លាំងនគរបាលខេត្តបន្ទាយមានជ័យ ក្នុងការបន្តបំពេញ ភារកិច្ចរក្សាសន្តិសុខ សណ្តាប់ធ្នាប់សាធារណៈ និងការពារសុវត្ថិភាពជូនប្រជាពលរដ្ឋ ឱ្យកាន់តែមានប្រសិទ្ធភាព និងទទួលបានទំនុកចិត្តពីប្រជាពលរដ្ឋ៕
ដោយ៖ឈុនសារ៉ាត