AKP ភ្នំពេញ ថ្ងៃទី៣១ ខែសីហា ឆ្នាំ២០២៦ -- មន្ត្រីថាមពលមកពីកូរ៉េខាងត្បូង និងសហរដ្ឋអាមេរិក បានពិភាក្សាគ្នាអំពីវិធីពង្រឹងកិច្ចសហប្រតិបត្តិការទ្វេភាគីក្នុងវិស័យថាមពល ចំពេលដែលមានភាពមិនប្រាកដប្រជានៃទីផ្សារសកលកើនឡើង។ នេះបើយោងតាមក្រសួងអាកាសធាតុរបស់ទីក្រុងសេអ៊ូល បានចេញផ្សាយនៅថ្ងៃចន្ទនេះ។

យោងតាមក្រសួងអាកាសធាតុ ថាមពល និងបរិស្ថាន បានឱ្យដឹងថា អនុរដ្ឋមន្ត្រីអាកាសធាតុទីពីររបស់កូរ៉េខាងត្បូង លោក លី ហូ-ហ្យឹង បានជួបជាមួយសមភាគីសហរដ្ឋអាមេរិក លោក ឃត ខូកខូឌ្រីល ជំនួយការរដ្ឋមន្ត្រីស្តីទី នៅទីក្រុងសេអ៊ូល ដើម្បីពិភាក្សាអំពីវិធានការគោលនយោបាយ ដែលមានគោលបំណងធានាបាននូវខ្សែសង្វាក់ផ្គត់ផ្គង់ថាមពល និងការផ្គត់ផ្គង់ថាមពលដែលមានស្ថេរភាព។

ក្រសួងបាននិយាយថា ពួកគេក៏បានផ្លាស់ប្តូរទស្សនៈគ្នាទៅលើបញ្ហាសន្តិសុខថាមពលសំខាន់ៗ ដែលតម្រូវឱ្យមានការឆ្លើយតបរួមគ្នា រួមទាំងការធានាសុវត្ថិភាពនៃបណ្តាញអគ្គិសនី ចំពេលដែលមានតម្រូវការអគ្គិសនីកើនឡើងយ៉ាងឆាប់រហ័ស និងការពង្រីកប្រព័ន្ធផ្ទុកថាមពល (ESSs)។

លោក លី បាននិយាយថា «ការធានាបាននូវខ្សែសង្វាក់ផ្គត់ផ្គង់ថាមពល និងការផ្គត់ផ្គង់ថាមពលដែលមានស្ថេរភាព គឺជាឆ្អឹងខ្នងនៃការប្រកួតប្រជែងឧស្សាហកម្មរបស់ប្រទេស។ យើងរំពឹងថា កិច្ចប្រជុំនេះនឹងជួយប្រទេសទាំងពីររួមគ្នាឆ្លើយតបទៅនឹងភាពមិនប្រាកដប្រជានៃទីផ្សារដែលកំពុងកើនឡើង និងពង្រឹងកិច្ចសហប្រតិបត្តិការថាមពលទ្វេភាគី»៕

ដោយ៖ យា ចិន្ដាខន្ដី (ប្រភព៖ យ៉ុនហាប់)