AKP ភ្នំពេញ ថ្ងៃទី៣១ ខែសីហា ឆ្នាំ២០២៦ -- ប្រធានាធិបតីកូរ៉េខាងត្បូង លោក លី ជេម្យុង បានតែងតាំងអនុរដ្ឋមន្ត្រីក្រសួងហិរញ្ញវត្ថុ លោក លី ហ៊ីយ៉ាំង-អ៊ីល ជារដ្ឋមន្ត្រីថ្មីនៃក្រសួងហិរញ្ញវត្ថុ និងតែងតាំងរដ្ឋមន្ត្រីចំនួនប្រាំរូបទៀតជារដ្ឋមន្ត្រីថ្មីនៅក្នុងការរុះរើគណៈរដ្ឋមន្ត្រីដ៏ធំមួយ។ នេះបើយោងតាមមន្ត្រីប្រធានាធិបតីម្នាក់បាននិយាយកាលពីថ្ងៃអាទិត្យ។

ប្រធានបុគ្គលិកប្រធានាធិបតី លោក កាង ហ៊ូន-ស៊ីក បានប្រកាសពីការរុះរើនេះនៅក្នុងសន្និសីទសារព័ត៌មានមួយ ដែលរួមមានការតែងតាំងអតីតមេបញ្ជាការរងនៃបញ្ជាការកងកម្លាំងចម្រុះកូរ៉េខាងត្បូង-សហរដ្ឋអាមេរិកលោក កាង ស៊ីន-ជុល ជារដ្ឋមន្ត្រីថ្មីនៃក្រសួងការពារជាតិ។

អនុរដ្ឋមន្ត្រីក្រសួងដីធ្លី លោក ហុង ជី-ស៊ុន ត្រូវបានតែងតាំងជារដ្ឋមន្ត្រីថ្មីនៃក្រសួងដីធ្លី លោក គីម សឹង-វ៉ុន មកពីគណបក្សប្រជាធិបតេយ្យ (DP) កំពុងកាន់អំណាច ជារដ្ឋមន្ត្រីថ្មីនៃក្រសួងយុត្តិធម៌ លោក យ៉ុង យេ-អ៊ីនថ្នាក់ដឹកនាំមកពីគណបក្សចំណូលមូលដ្ឋាន ជារដ្ឋមន្ត្រីថ្មីនៃក្រសួងសមភាពយេនឌ័រ និងលោក លី សូ-យ៉ាំង មកពីគណបក្ស​ DP ជារដ្ឋមន្ត្រីថ្មីនៃក្រសួងសហគ្រាសធុនតូច និងមធ្យម។

លោក កាង បានកត់សម្គាល់ថា ទន្ទឹមនឹងនេះ លោក លី វ៉ុន-ជូ មន្ត្រីជាន់ខ្ពស់នៅក្រសួងបរិស្ថាន ត្រូវបានតែងតាំងជាជំនួយការប្រធានាធិបតីសម្រាប់គំនិតផ្តួចផ្តើម «Megaproject» ដែលជាមុខតំណែងដែលទើបនឹងបង្កើតថ្មី។

ក្រោមគំនិតផ្តួចផ្តើមវិនិយោគ ដែលបានបង្ហាញកាលពីចុងខែមិថុនារដ្ឋាភិបាលនឹងធ្វើការជាមួយសម្ព័ន្ធក្រុមហ៊ុនបច្ចេកវិទ្យា ដើម្បីលើកកម្ពស់ការវិនិយោគទ្រង់ទ្រាយធំក្នុងការផលិតឧបករណ៍អេឡិចត្រូនិក និងគ្រឿងបរិក្ខារទាក់ទងនឹងបញ្ញាសិប្បនិម្មិត (AI) ដោយផ្តោតសំខាន់ទៅលើវិស័យក្នុងតំបន់។

ការតែងតាំង​នេះ ​គឺជា​ការរុះរើ​គណៈរដ្ឋមន្ត្រី​ដ៏សំខាន់ជា​លើកដំបូង​ចាប់តាំងពី​លោក លី ចូលកាន់តំណែង​ជាប្រធានាធិបតី​កាលពីខែមិថុនាឆ្នាំមុន ហើយ​វា​កើតឡើង​នៅពេលដែល​ការវាយតម្លៃ​​របស់លោក​ទើបតែ​ធ្លាក់ចុះ​ដល់​កម្រិត​ទាបបំផុត​នាពេលថ្មីៗនេះ ចំពេល​ដែលមានការព្រួយបារម្ភ​កាន់តែខ្លាំងឡើង​អំពី​តម្លៃ​លំនៅឋាន​ដែល​កើនឡើង​ខ្ពស់ និង​ការប្រែប្រួល​ទីផ្សារភាគហ៊ុន។

លោក កាង បានពិពណ៌នាអំពីការរុះរើ​នេះ​ថា ជាការជ្រើសរើស​មេដឹកនាំ​ថ្មី​ដែល​មានភាពស្វាហាប់ និង​ជំនាញ ដែលនឹង​ផ្តល់​ការផ្លាស់ប្តូរ​ជាក់ស្តែង​សម្រាប់​ប្រជាជន និង​ដឹកនាំ​ប្រទេស​ឆ្ពោះទៅរក​ការលោតផ្លោះ​ដ៏អស្ចារ្យ​មួយ​ទៅមុខ។

​បេក្ខភាព​រដ្ឋមន្ត្រី​ដែល​ត្រូវបានតែងតាំង​នឹង​ឆ្លងកាត់​ការបញ្ជាក់​នៅ​រដ្ឋសភា។

​ក្រោម​ការរុះរើ​នេះ អតីត​អភិបាលខេត្ត​គ្យុងសាង​ខាងត្បូង លោក គីមឃ្យុងស៊ូ ត្រូវបានតែងតាំង​ជា​ជំនួយការ​ពិសេស​របស់លោក លី សម្រាប់​កិច្ចការ​នយោបាយ ខណៈ​ដែល​តំណាងរាស្ត្រ លោក លី ហៃមីន មកពី​គណបក្ស​កសាង​កូរ៉េ​ឡើងវិញ ត្រូវបានតែងតាំង​ជា​លេខាធិការ​ប្រធានាធិបតី​សម្រាប់​គោលនយោបាយ AI និង​ផែនការ​អនាគត៕

ដោយ៖ យា ចិន្ដាខន្ដី (ប្រភព៖ យ៉ុនហាប់)