AKP ភ្នំពេញ ថ្ងៃទី៣១ ខែសីហា ឆ្នាំ២០២៦ -- ទីក្រុង Varna ត្រូវបានកំណត់ឱ្យដើរតួនាទីនៅក្នុងអាទិភាពជាតិថ្មីនៃបច្ចេកវិទ្យាអវកាស និងបច្ចេកវិទ្យាប្រើប្រាស់បានពីរយ៉ាង ក្រោមយុទ្ធសាស្ត្រនវានុវត្តន៍សម្រាប់ជំនាញឆ្លាតវៃឆ្នាំ២០២១-២០២៧ ដែលបានធ្វើបច្ចុប្បន្នភាពរបស់ប្រទេសប៊ុលហ្គារី។ នេះបើយោងតាមមជ្ឈមណ្ឌលព័ត៌មានទីក្រុង Varna (RIC)។

តំបន់ថ្មីនេះគ្របដណ្តប់លើប្រព័ន្ធផ្កាយរណប ការសង្កេតផែនដី ប្រព័ន្ធស្វយ័ត និងគ្មានមនុស្សបើក សន្តិសុខតាមអ៊ីនធឺណិត កម្មវិធីសមុទ្រ និងអវកាស និងបច្ចេកវិទ្យាជាមួយនឹងការប្រើប្រាស់ទាំងស៊ីវិល និងការពារជាតិ។ ការធ្វើបច្ចុប្បន្នភាពនេះ មានគោលបំណងធ្វើឱ្យអាទិភាពជំនាញឆ្លាតវៃរបស់ប្រទេសប៊ុលហ្គារីស្របគ្នាជាមួយនឹងការផ្លាស់ប្តូរបច្ចេកវិទ្យា និងសេដ្ឋកិច្ចយ៉ាងឆាប់រហ័ស គោលនយោបាយសហភាពអឺរ៉ុបដែលកំពុងវិវត្តន៍និងសារៈសំខាន់កាន់តែខ្លាំងឡើងនៃស្វ័យភាពយុទ្ធសាស្ត្រ និងសន្តិសុខសេដ្ឋកិច្ច។ សេចក្តីព្រាងយុទ្ធសាស្ត្រនេះ បើកចំហសម្រាប់ការពិគ្រោះយោបល់ជាសាធារណៈរហូតដល់ថ្ងៃទី២០ ខែកញ្ញា ឆ្នាំ២០២៦ ហើយអាទិភាពរបស់វាត្រូវបានភ្ជាប់ដោយផ្ទាល់ទៅនឹងការចូលប្រើប្រាស់កម្មវិធីផ្តល់មូលនិធិរបស់អឺរ៉ុប។

មជ្ឈមណ្ឌល RIC បានសង្កត់ធ្ងន់ថា «ទីក្រុង Varna មានជំហរល្អក្នុងការចូលរួមចំណែក ដោយសារសមត្ថភាពសមុទ្រ វិទ្យាសាស្ត្រ និងការពារជាតិដ៏រឹងមាំរបស់ខ្លួន រួមទាំងសាលាកងទ័ពជើងទឹក ចង្កោមសមុទ្រ និងប្រព័ន្ធអេកូឡូស៊ី ការស្រាវជ្រាវ និងអភិវឌ្ឍន៍ ដែលបានបង្កើតឡើង» ដោយបានបន្ថែមថា អង្គការចំនួនប្រាំមួយនៅក្នុងតំបន់នេះ បច្ចុប្បន្នត្រូវបានចុះបញ្ជីនៅក្នុងវិស័យនេះរួចរាល់ហើយ។ មជ្ឈមណ្ឌល RIC ក៏បានចង្អុលបង្ហាញផងដែរថា តំបន់ភាគឦសានរបស់ប្រទេសប៊ុលហ្គារីមានសហគ្រាសចំនួន៥២.៦៦១ និងបង្កើតទិន្នផលជិត ៩ពាន់លានអឺរ៉ូ។ នេះបើយោងតាមទិន្នន័យឆ្នាំ២០២០ ដែលប្រើប្រាស់ក្នុងការវិភាគសេដ្ឋកិច្ចសង្គមរបស់យុទ្ធសាស្ត្រ។ វាក៏រក្សាតុល្យភាពពាណិជ្ជកម្មវិជ្ជមានផងដែរ ជាមួយនឹងការនាំចេញចំនួន ២ពាន់លានអឺរ៉ូ និងនាំចូលចំនួន ១,៧ពាន់លានអឺរ៉ូ ដែលភាគច្រើនជំរុញដោយសកម្មភាពផ្លូវសមុទ្រ កសិ-ម្ហូបអាហារ គីមី និងឧស្សាហកម្មផលិតកម្ម៕

ដោយ៖ យា ចិន្ដាខន្ដី (ប្រភព៖ BTA)