AKP ភ្នំពេញ ថ្ងៃទី៣១ ខែសីហា ឆ្នាំ២០២៦ -- ប្រធានាធិបតីស្តីទីរបស់ប្រទេសវេណេស៊ុយអេឡា លោកស្រី Delcy Rodríguez បានប្រកាសពីកិច្ចព្រមព្រៀងប្រេងរយៈពេល ២៥ឆ្នាំជាប្រវត្តិសាស្ត្រជាមួយសហរដ្ឋអាមេរិក ដែលមានគោលបំណងជំរុញការផលិតប្រចាំថ្ងៃលើសពី១,៥លានបារ៉ែល។ កិច្ចព្រមព្រៀងនេះគ្របដណ្តប់លើវាលប្រេងឆៅចំនួនប្រាំបីនៅក្នុងតំបន់ Orinoco Belt ដែលត្រូវបានគេព្យាករថានឹងបង្កើតប្រាក់ចំណូលជាង ២០៩ពាន់លានដុល្លារអាម៉េរិកសម្រាប់ប្រទេសវេណេស៊ុយអេឡា ដោយផ្អែកលើតម្លៃ ៦៥ដុល្លារអាម៉េរិកក្នុងមួយបារ៉ែល ដោយប្រទេសនេះរក្សាអធិបតេយ្យភាព និងទទួលបានប្រហែល ១៩ដុល្លារអាម៉េរិកក្នុងមួយបារ៉ែលដែលលក់បាន។ លោកស្រី Rodríguez បានបង្ហាញពីផែនការពង្រីកប្រតិបត្តិការបន្ថែមទៀតជាមួយក្រុមហ៊ុនថាមពលយក្សពិភពលោក ដូចជាក្រុមហ៊ុន Chevron ក្រុមហ៊ុន Repsol និងក្រុមហ៊ុន Shell ជាដើម ដើម្បីស្តារវិស័យថាមពលរបស់ប្រទេសនេះឡើងវិញ។

ក្រោមក្របខ័ណ្ឌនេះ សហរដ្ឋអាមេរិកនឹងផ្គត់ផ្គង់ដើមទុន បច្ចេកវិទ្យានិងសមត្ថភាពប្រតិបត្តិការ ដើម្បីស្តារហេដ្ឋារចនាសម្ព័ន្ធប្រេងដែលខូចខាតដោយទណ្ឌកម្មរបស់ប្រទេសវេណេស៊ុយអេឡា ដោយលោក Marco Rubio រដ្ឋមន្ត្រីការបរទេសសហរដ្ឋអាមេរិកបានប៉ាន់ប្រមាណថា កិច្ចព្រមព្រៀងនេះនឹងទាក់ទាញការវិនិយោគឯកជនជិត ១០០ពាន់លានដុល្លារអាម៉េរិក។ ប្រធានាធិបតីសហរដ្ឋអាមេរិក លោក Donald Trump បានសាទរចំពោះប្រតិបត្តិការនេះថា ជាប្រតិបត្តិការដ៏ធំបំផុតក្នុងប្រវត្តិសាស្ត្រពិភពលោក ដោយកត់សម្គាល់ថា វាត្រូវបានសម្រេចដោយគ្មានការចំណាយរបស់អ្នកជាប់ពន្ធ និងធានាការគ្រប់គ្រងភាគច្រើនលើប្រេងទុនបម្រុងចំនួន៦៥ពាន់លានបារ៉ែល។ លោក Trump បានថ្លែងថា ភាពជាដៃគូនេះនឹងធ្វើឱ្យតម្លៃប្រេងឥន្ធនៈរបស់សហរដ្ឋអាមេរិកធ្លាក់ចុះយ៉ាងខ្លាំង ខណៈដែលវាកំពុងជំរុញការងើបឡើងវិញនៃសេដ្ឋកិច្ចនៅក្នុងប្រទេសវេណេស៊ុយអេឡា។

កិច្ចព្រមព្រៀងនេះធ្វើឡើងបន្ទាប់ពីលោកស្រី Rodríguez បានចូលកាន់តំណែងជាប្រធានាធិបតីបណ្តោះអាសន្នកាលពីក្នុងខែមករា បន្ទាប់ពីប្រតិបត្តិការយោធារបស់សហរដ្ឋអាមេរិកបានចាប់ខ្លួនលោកប្រធានាធិបតីNicolás Maduro ដែលជាសញ្ញានៃការផ្លាស់ប្តូរយ៉ាងឆាប់រហ័សរវាងទីក្រុងវ៉ាស៊ីនតោន និងទីក្រុងការ៉ាកាស។ លោកស្រី Rodríguez បានសន្យាថានឹងមានតម្លាភាពពេញលេញទាក់ទងនឹងការវិនិយោគ ផលិតកម្ម និងប្រាក់ចំណូលរដ្ឋ។ លោកស្រីបានថ្លែងអំណរគុណដល់លោក Trump និងលោក Rubio ចំពោះតួនាទីរបស់ពួកគេក្នុងការបញ្ចប់លក្ខខណ្ឌ ដែលរួមមានអត្រាកម្រៃជើងសារអប្បបរមា ១៦% និងអត្រាពន្ធលើប្រាក់ចំណូល ៣៤% ដើម្បីពន្លឿនស្ថិរភាពសេដ្ឋកិច្ចដ៏ទូលំទូលាយរបស់ប្រទេសវេណេស៊ុយអេឡា៕

ដោយ៖ យា ចិន្ដាខន្ដី (ប្រភព៖ AA-AKP)