AKP ថ្ងៃទី៣០ ខែសីហា ឆ្នាំ២០២៦ -- ក្រសួងអប់រំ យុវជន និងកីឡា និងអង្គការពិព័រណ៍វិទ្យាសាស្រ្តកម្ពុជា សូមអញ្ជើញសាធារណជន ជាពិសេសលោកគ្រូ អ្នកគ្រូ មាតាបិតា អាណាព្យាបាល និងសិស្សានុសិស្ស ចូលរួមទស្សនា និងគាំទ្រកម្មវិធីប្រកួតប្រជែងរ៉ូបូតទិចកម្ពុជាឆ្នាំ២០២៦ ដើម្បីផ្ដល់កម្លាំងចិត្ត ក៏ដូចជាលើកកម្ពស់ការអប់រំស្ទែម រ៉ូបូតទិច និងភាពច្នៃប្រឌិតនៅក្នុងប្រទេសកម្ពុជា។

បើតាមការបញ្ជាក់ពីក្រសួងអប់រំ យុវជន និងកីឡា និងអង្គការពិព័រណ៍វិទ្យាសាស្រ្តកម្ពុជាចំពោះបេក្ខជនចូលរួមប្រកួតនឹងមានឱកាសបញ្ចេញសមត្ថភាព ព្រមទាំងធ្វើជាតំណាងប្រទេសកម្ពុជានៅក្នុងកម្មវិធីរ៉ូបូតទិចអូឡាំព្យាដពិភពលោក ដែលគ្រោងនឹងរៀបចំឡើងនៅព័រតូរីកូ សហរដ្ឋអាម៉េរិក នាខែធ្នូខាងមុខនេះ។

សូមជម្រាបថា កម្មវិធីប្រកួតប្រជែងរ៉ូបូតទិចកម្ពុជាឆ្នាំ២០២៦នេះនឹងប្រព្រឹត្តទៅនៅថ្ងៃទី៥ ខែកញ្ញា ឆ្នាំ២០២៦ ពេលវេលាម៉ោង៨:០០នាទីព្រឹក ដល់៤:០០រសៀល នៅផ្សារទំនើបអ៊ីអនមានជ័យ (សាលជាន់ទី១)៕

ដោយ ចាន់ សុភឿន (ប្រភព៖ ក្រសួងអប់រំ)