AKP កំពង់ធំ ថ្ងៃទី៣០ ខែសីហាឆ្នាំ២០២៦ -- លោកស្រី រ៉េន ស៊ីណាត បុគ្គលិកអង្គការសកម្មភាពដើម្បីអភិវឌ្ឍន៍(AFD)និងក្រុមការងារកាលពីថ្ងៃទី២៩ ខែសីហា ឆ្នាំ២០២៦បានចុះពង្រឹងដល់គណៈកម្មការ ធនាគារជ្រូកកណ្ដុរ និងចម្ការកសិរុក្ខកម្មរបស់សហគមន៍ព្រៃឈើអូរសោម ក្នុងគម្រោង “ការប្រើប្រាស់ដីនិងការការពារធនធានធម្មជាតិជនជាតិដើមភាគតិច"ក្រោមជំនួយគាំទ្រពីSDCនិង Ireland តាមរយៈអង្គការ DCA ដែលអនុវត្តដោយអង្គការសកម្មភាពដើម្បីអភិវឌ្ឍន៍នៅភូមិសាលាវិស័យឃុំសាលាវិស័យស្រុកប្រាសាទបល្ល័ង្កខេត្តកំពង់ធំ។

លោកស្រី រ៉េន ស៊ីណាតបានលើកឡើងពីសារៈសំខាន់នៃការចូលរួមរបស់គណៈកម្មការសហគមន៍ព្រៃឈើអូរសោម ក្នុងការថែរក្សានិងអភិវឌ្ឍធនាគារជ្រូកកណ្ដុរ ព្រមទាំងការបន្តពង្រីកសកម្មភាពកសិរុក្ខកម្មនៅក្នុងតំបន់។លោកស្រីបានស្នើឱ្យគណៈកម្មការសហគមន៍យកចិត្តទុកដាក់ថែរក្សាពូជជ្រូកកណ្ដុរឱ្យបានល្អ ដើម្បីធានាដល់ការបន្តអភិវឌ្ឍសកម្មភាពចិញ្ចឹមជ្រូករបស់សហគមន៍។

ជាមួយគ្នានេះដែរលោកស្រីបានណែនាំឱ្យសហគមន៍ បន្តពង្រីកការដាំដុះដំណាំបន្ថែមនៅចម្ការកសិរុក្ខកម្មឱ្យបានច្រើនជាងមុន ដើម្បីជួយបង្កើនសកម្មភាពផលិតកម្មនិងរួមចំណែកដល់ការពង្រឹងជីវភាពរបស់ប្រជាជនក្នុងសហគមន៍និងស្នើឱ្យមានការរៀបចំផែនការសកម្មភាពបន្តដើម្បីឱ្យសហគមន៍អូរសោមមានការរីកចម្រើននិងមានសកម្មភាពអភិវឌ្ឍកាន់តែប្រសើរឡើង។

លោក សន យាងសមាជិកគណៈកម្មការសហគមន៍ព្រៃឈើអូរសោម បានសំណូមពរដល់អង្គការសកម្មភាពដើម្បីអភិវឌ្ឍន៍ (AFD)ពង្រឹងសមត្ថភាពដល់គណៈកម្មការនិងបន្តផ្តល់បច្ចេកទេសពាក់ព័ន្ធនឹងការចិញ្ចឹមជ្រូកកណ្ដុរដល់សមាជិកសហគមន៍ដើម្បីឱ្យការចិញ្ចឹមអាចដំណើរការបានកាន់តែល្អប្រសើរ ព្រមទាំងស្នើសុំអណ្ដូងទឹកស្អាត ដើម្បីប្រើប្រាស់សម្រាប់ស្រោចស្រពដំណាំនិងផ្គត់ផ្គង់ទឹកសម្រាប់ជ្រូកកណ្ដុរផង។

ការចុះពង្រឹងសមត្ថភាពដល់គណៈកម្មការ ធនាគារជ្រូកកណ្ដុរ និងចម្ការកសិរុក្ខកម្មនេះ បានបង្ហាញពីការយកចិត្តទុកដាក់លើការពង្រឹងជីវភាពរបស់សហគមន៍តាមរយៈការចិញ្ចឹមសត្វ និងការដាំដំណាំ ព្រមទាំងការរៀបចំផែនការសកម្មភាពបន្តសម្រាប់ការអភិវឌ្ឍសហគមន៍ព្រៃឈើអូរសោមឱ្យមានភាពរីកចម្រើនជាងមុន៕

ដោយ ស៊ុម វណ្ណា