AKP តាកែវ ថ្ងៃទី៣០ ខែសីហា ឆ្នាំ២០២៦ -- ដើម្បីបង្ខិតការផ្ដល់សេវាធ្វើអត្តសញ្ញាណប័ណ្ណសញ្ជាតិខ្មែរ ជូនបងប្អូនប្រជាពលរដ្ឋឱ្យកាន់តែជិតមូលដ្ឋាន លោក អ៊ុំ ចំរើន អភិបាលនៃគណៈអភិបាលស្រុកទ្រាំង រួមជាមួយលោកអភិបាលរងស្រុក និងមន្ត្រីការិយាល័យជំនាញពាក់ព័ន្ធ បានអញ្ជើញចុះពិនិត្យនិងតាមដានដោយផ្ទាល់ នូវដំណើរការនៃការចុះចល័ត បំពេញបែបបទ ផ្តល់សេវា ធ្វើអត្តសញ្ញាណប័ណ្ណសញ្ជាតិខ្មែរ ជូនដល់បងប្អូនប្រជាពលរដ្ឋនៅស្រុកទ្រាំង។ការចុះផ្ដល់សេវាធ្វើអត្តសញ្ញាណប័ណ្ណសញ្ជាតិខ្មែរ ជូនបងប្អូនប្រជាពលរដ្ឋក្នុងពេលនេះ ដោយមន្ត្រីនគរបាលជំនាញ ផ្នែកអត្តសញ្ញាណកម្ម នៃអធិការនគរបាលស្រុកទ្រាំង។ការចុះត្រួតពិនិត្យនេះធ្វើឡើង នៅភូមិដឹកម៉ៃ ឃុំអង្កាញ់ និងភូមិស្គុល ឃុំស្មោង ស្រុកទ្រាំងខេត្តតាកែវ កាលពីព្រឹកថ្ងៃសៅរ៍ ទី២៩ ខែសីហា ឆ្នាំ២០២៦។

មានប្រសាសន៍សំណេះសំណាលក្នុងឱកាសនោះ លោក អ៊ុំ ចំរើន អភិបាលនៃគណៈអភិបាលស្រុកទ្រាំង បានថ្លែងថា ការចុះពិនិត្យនេះក្នុងគោលបំណងធានាឱ្យបាននូវភាពរលូន និងបង្កលក្ខណៈងាយស្រួល ស្របតាមគោលនយោបាយគាំពារ និងបម្រើសេវាសាធារណៈ ជូនប្រជាពលរដ្ឋនៅមូលដ្ឋានផ្ទាល់។    

លោកអភិបាលស្រុកទ្រាំង ក៏បានកោតសរសើរ ចំពោះការខិតខំប្រឹងប្រែងរបស់កងកម្លាំង និងមន្ត្រីជំនាញផ្នែកអត្តសញ្ញាណកម្ម នៃអធិការនគរបាលស្រុកទ្រាំង។ជាមួយគ្នានេះដែរ លោកក៏បានផ្តល់ការណែនាំ និងជំរុញបន្ថែមដល់មន្ត្រីជំនាញទាំងអស់ ត្រូវបន្តបំពេញតួនាទីភារកិច្ចរបស់ខ្លួន ដោយស្មារតីយកចិត្តទុកដាក់ និងទទួលខុសត្រូវខ្ពស់។

លោក អ៊ុំ ចំរើន ក៏បានណែនាំដល់មន្ត្រីជំនាញទាំងអស់ ត្រូវតែបន្តផ្តល់សេវាជូនប្រជាពលរដ្ឋ ដោយផ្អែកលើគោលការណ៍តម្លាភាព ប្រសិទ្ធភាព និងភាពងាយស្រួល។ ត្រូវធ្វើយ៉ាងណាឱ្យបងប្អូនប្រជាពលរដ្ឋ ទទួលបានសេវាសាធារណៈមួយនេះ ប្រកបដោយគុណភាព និងទាន់ពេលវេលា។សកម្មភាពចុះជម្រុញនេះ បានស្តែងឱ្យឃើញពីការយកចិត្តទុកដាក់ខ្ពស់ របស់អាជ្ញាធរស្រុកទ្រាំង ក្នុងការនាំយកសេវាសាធារណៈដ៏ចាំបាច់នេះ ឱ្យកាន់តែខិតជិតផ្ទះរបស់ប្រជាពលរដ្ឋ។ជួយកាត់បន្ថយទាំងពេលវេលា និងការចំណាយផ្សេងៗ របស់បងប្អូនប្រជាពលរដ្ឋផងដែរ។

លោក អ៊ុំ ចំរើន បានធ្វើការណែនាំនិងសំណូមពរដល់បងប្អូនប្រជាពលរដ្ឋ ដែលបានចូលរួមនៅក្នុងថ្ងៃនេះ សូមជួយណែនាំនិងផ្សព្វផ្សាយ ដល់បងប្អូនប្រជាពលរដ្ឋទាំងអស់ ត្រូវពិនិត្យមើលសុពលភាព នៃអត្តសញ្ញាណប័ណ្ណសញ្ជាតិខ្មែររបស់ខ្លួន ឱ្យបានច្បាស់លាស់។ប្រសិនបើផុតកំណត់ឬជិតផុតកំណត់ ត្រូវប្រញាប់មកធ្វើថ្មីឬទាក់ទងអាជ្ញាធរភូមិ-ឃុំ ដើម្បីទទួលបានការសម្របសម្រួល។អត្តសញ្ញាណប័ណ្ណសញ្ជាតិខ្មែរ គឺជាឯកសាររដ្ឋបាលដ៏មានសារៈសំខាន់និងចាំបាច់បំផុត សម្រាប់ប្រជាពលរដ្ឋគ្រប់ៗរូប។ក្នុងការយកទៅប្រកបរបររកស៊ី ការប្រើប្រាស់ផ្សេងៗស្របតាមផ្លូវច្បាប់តម្រូវ ការទទួលសេវាសាធារណៈ និងការប្រើប្រាស់សិទ្ធិនយោបាយជាដើម៕

តាកែវ អ៊ុច សៀង