AKP ភ្នំពេញ ថ្ងៃទី៣០ ខែសីហា ឆ្នាំ២០២៦​ -- ឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម នាថ្ងៃអាទិត្យទី៣០ ខែសីហា ឆ្នាំ២០២៦នេះ បានដឹកនាំក្រុមការងារជំនាញ និងទីប្រឹក្សាបច្ចេកទេស ចុះត្រួតពិនិត្យជាក់ស្តែងអំពីប្រសិទ្ធភាពនៃប្រព័ន្ធរំដោះទឹកចេញពីស្ទឹងសែន តាមរយៈស្ទឹងស្លាប់ ស្ថិតក្នុងភូមិសាស្ត្រខេត្តកំពង់ធំ។

ឯកឧត្តមបញ្ជាក់ថា មកទល់ពេលនេះ ស្ថានភាពទឹកស្ទឹងសែនក្នុងភូមិសាស្ត្រក្រុងស្ទឹងសែន រក្សាបាននូវសុវត្ថិភាព និងមិនមានបញ្ហារាំងស្ទះឡើយ ដោយកម្រិតកម្ពស់ទឹកមានស្ថិរភាពជាធម្មតា។ លទ្ធផលវិជ្ជមាននេះ សម្រេចបានដោយសារប្រព័ន្ធរំដោះទឹកត្រង់ចំណុចស្ទឹងស្លាប់ បានបំពេញតួនាទីយ៉ាងមានប្រសិទ្ធភាពក្នុងការបង្វែរ និងសម្រួលលំហូរទឹក ដែលជាតំបន់ភូមិសាស្ត្រយុទ្ធសាស្ត្រមានសក្តានុពល និងសារសំខាន់។

ឯកឧត្តមរដ្ឋលេខាធិការបានបន្ថែមថា ដើម្បីឆ្លើយតបទៅនឹងការប្រែប្រួលអាកាសធាតុ ក្រសួងធនធានទឹក និងឧតុនិយម កំពុងយកចិត្តទុកដាក់ខ្ពស់លើការធ្វើទំនើបកម្មវិស្វកម្មប្រព័ន្ធប្រឡាយរំដោះទឹក និងប្រឡាយរង ដើម្បីបន្ធូរសម្ពាធទឹកជំនន់ចេញពីស្ទឹងសែន ព្រមទាំងទាញយកទឹកមកប្រើប្រាស់សម្រាប់ស្រោចស្រពលើវិស័យកសិកម្ម ដំណាំរួមផ្សំ និងបម្រើឱ្យការអភិវឌ្ឍពហុវិស័យប្រកបដោយចីរភាព និងប្រសិទ្ធភាពខ្ពស់៕

ដោយ ពេជ្រ សំអឿន (ប្រភព៖ ក្រសួងធនធានទឹកនិងឧតុនិយម)