AKP ភ្នំពេញ ថ្ងៃទី៣០ ខែសីហា ឆ្នាំ២០២៦ -- អតីតមន្រ្តីក្រសួងការបរទេសម្នាក់ ឈ្មោះ ថូ សំណាង និង បក្ខពួកពីរនាក់ផ្សេងទៀតដែលពាក់ព័ន្ធទៅនឹងការប្រព្រឹត្តិអំពើពុករលួយលើករណី Online Scam ត្រូវបានអង្គភាពប្រឆាំងអំពើពុករលួយបង្ហាញពីលទ្ធផលបង្រ្កាបក៏ដូចជាការចាប់ដាក់ឃុំខ្លួនដើម្បីដាក់ពន្ធនាគារផងដែរ។

យោងតាមអង្គភាពប្រឆាំងអំពើពុករលួយ បានបញ្ជាក់ថា ក្នុងប្រតិបត្ដិការនេះ បានធ្វើឡើងដោយមានកិច្ចសហការជាមួយក្រសួងការបរទេស និងសហប្រតិបត្តិការអន្តរជាតិ, និងក្រសួងមហាផ្ទៃ (អគ្គនាយកដ្ឋានអន្តោប្រវេសន៍)។អង្គភាពប្រឆាំងអំពើពុករលួយ បង្ហាញលទ្ធផលករណី ជនត្រូវចោទ ថូ សំណាង និងគូកនឈ្មោះ ណុប រដ្ឋា និង យស់ រ៉ាណេ។

ប្រធានអង្គភាពប្រឆាំងអំពើពុករលួយ  ទេសរដ្ឋមន្រ្តី ឱម យ៉ិនទៀងបានថ្លែងថា «លោក ថូ សំណាង បានសារភាពលួចយកសន្លឹកទិដ្ឋាការប្រភេទ C និង Cex ប្រើប្រាស់ខុសច្បាប់ ជាង ៦០០០សន្លឹក ហើយចំណែកសន្លឹកនៅសល់ ៤ពាន់សន្លឹក ACU កំពុងតាមរកដែលគាត់ថាបានកំទេចចោល។ យើងរកឃើញ សន្លឹកទិដ្ឋាការរបស់ដែលគាត់បានបញ្ចេញដោយខុសច្បាប់ត្រូវបានជនបរទេស Online Scams ប្រើបាស់»។

សូមរំលឹកដែរថា លោក ថូ សំណាង ត្រូវសម្តេចតេជោ ហ៊ុន សែន ប្រមុខរដ្ឋស្តីទី កាលពីថ្ងៃទី២៨ ខែមេសា ឆ្នាំ២០២៦ ចេញព្រះរាជក្រឹត្យបញ្ចប់មុខតំណែងពី អគ្គនាយក នៃអគ្គនាយកដ្ឋានកិច្ចការច្បាប់ កុងស៊ុល និងព្រំដែន នៃក្រសួងការបរទេស និងសហប្រតិបត្តិការអន្តរជាតិ ហើយតែងតាំងលោកជាទីប្រឹក្សាក្រសួងជំនួសវិញ មានឋានៈស្មើអគ្គនាយក៕

ដោយ មករា