AKP ភ្នំពេញ ថ្ងៃទី២៨ ខែសីហា ឆ្នាំ២០២៦--អង្គការ FAO បើកសិក្ខាសាលាផ្សព្វផ្សាយស្តីពីលទ្ធផលនៃការវាយតម្លៃហានិភ័យ និងភាពងាយរងគ្រោះផ្អែកបរិស្ថាន ដើម្បីរៀបចំផែនការបន្ស៊ាំថ្នាក់មូលដ្ឋាន (LAPs) និងការណែនាំស្តីពីកញ្ចប់វិនិយោគសហគមន៍ដើម្បីភាពធន់នឹងអាកាសធាតុ (CRIPs) ត្រូវបានធ្វើឡើងនៅខេត្តបាត់ដំបង និងខេត្តពោធិ៍សាត់។ 

 មន្រ្តីអង្គការ FAO  បានឱ្យឹងនៅថ្ងៃទី២៨ ខែសីហា ឆ្នាំ២០២៦ថា រាល់មតិយោបល់ និងធាតុចូលដ៏មានតម្លៃពីអ្នកចូលរួមទាំងអស់ នឹងក្លាយជាមូលដ្ឋានគ្រឹះសម្រាប់ពង្រឹង LAPs ឲ្យកាន់តែសមស្របនឹងជីវភាពជាក់ស្តែង ព្រមទាំងជួយកសាង CRIPs ដែលឆ្លើយតបទៅនឹងបញ្ហាប្រឈមផ្នែកអាកាសធាតុ និងតម្រូវការជាអាទិភាពរបស់កសិករ និងសហគមន៍ជាក់ស្តែង។ សិក្ខាសាលានេះជាយុទ្ធសាស្ត្រដ៏សំខាន់ដែលអាចជួយសហគមន៍នៅតំបន់បឹងទន្លេសាបកសាងភាពធន់ប្រកប ដោយចីរភាពក្នុងការប្រឈមមុខនឹងការប្រែប្រួលអាកាសធាតុ។

គម្រោង PCRL ជាការផ្តួចផ្តើមគំនិតរួមគ្នា រយៈពេលប្រាំឆ្នាំដោយ អង្គការស្បៀង និងកសិកម្មនៃសហប្រជាជាតិ អគ្គ នាយកដ្ឋានក្សេត្រសាស្រ្ត នៃក្រសួងកសិកម្ម រុក្ខាប្រមាញ់ និងនេសាទ និងអគ្គនាយកដ្ឋានសហគមន៍មូលដ្ឋាន (GDLC) នៃក្រសួងបរិស្ថាន ដែលទទួលបានការគាំទ្រហិរញ្ញប្បទានដោយ មូលនិធិបរិស្ថានសាកល ។

ក្នុងសិក្ខាសាលានេះ អាជ្ញាធរមូលដ្ឋាន ក្រុមប្រឹក្សាឃុំ មន្ទីរពាក់ព័ន្ធ តំណាងសហគមន៍ និងមន្រ្តីកសិកម្មឃុំ បានចូលរួមយ៉ាងសកម្ម និងផុសផុលក្នុងការពិភាក្សា ដោះស្រាយចម្ងល់ ផ្លាស់ប្តូរបទពិសោធន៍ និងកំណត់អាទិភាពសម្រាប់សកម្មភាពបន្ស៊ាំនឹងការប្រែប្រួលអាកាសធាតុនៅតាមឃុំរបស់ខ្លួន ដោយបង្ហាញពីស្មារតីទទួលខុសត្រូវចំពោះអនាគតសហគមន៍៕

ដោយ ៖ណយ នឿន (ប្រភព៖FAO)