AKP ភ្នំពេញ ថ្ងៃទី២៨ ខែសីហា ឆ្នាំ២០២៦ -- អាជ្ញាធរបាននិយាយកាលពីថ្ងៃព្រហស្បតិ៍ថា មនុស្សជិត ១.៥០០នាក់ រួមទាំងជនបរទេសជាង ៧០០នាក់ផង កំពុងបាត់ខ្លួននៅទូទាំងប្រទេសនេប៉ាល់ និងតំបន់ទីបេរបស់ប្រទេសចិនបន្ទាប់ពីជញ្ជាំងភក់ និងថ្មបានបាក់ចូលទៅក្នុងទន្លេហិម៉ាល័យ ដែលបណ្តាលឱ្យមានទឹកជំនន់ភ្លាមៗដ៏មហន្តរាយ។

ក្រុមអ្នកជួយសង្គ្រោះនៅក្នុងប្រទេសនេប៉ាល់ បានប្រើប្រាស់ឧទ្ធម្ភាគចក្រដើម្បីស្វែងរកអ្នកនៅរស់រានមានជីវិត និងទម្លាក់សម្ភារៈសង្គ្រោះបន្ទាន់ទៅកាន់មនុស្សរាប់ពាន់នាក់ដែលត្រូវបានកាត់ផ្តាច់នៅក្នុងទីក្រុង និងជ្រលងភ្នំ បន្ទាប់ពីគ្រោះមហន្តរាយកាលពីថ្ងៃពុធបានបោកបក់ផ្លូវមួយដែលពោរពេញទៅដោយអ្នកដើរលេង និងអ្នកធ្វើធម្មយាត្រា ដែលភ្ជាប់ទីក្រុងកដ្ឋមណ្ឌូជាមួយទីក្រុងឡាសានៅតំបន់ទីបេ។

អ្នកនាំពាក្យប៉ូលិសនេប៉ាល់ លោក អាប៊ី ណារ៉ាយ៉ាន កាហ្វល បាននិយាយថា «ចំនួននេះនឹងកើនឡើង ដោយសារយើងបានបន្តការស្វែងរកហើយសាកសពជាច្រើនទៀតត្រូវបានគេរំពឹងថានឹងត្រូវបានរកឃើញ»។

មន្ត្រីប៉ូលិស និងទេសចរណ៍បាននិយាយថា ជនបរទេសជិត ៥០០នាក់ស្ថិតក្នុងចំណោមមនុស្ស ៨២៦នាក់ដែលបាត់ខ្លួននៅក្នុងប្រទេសនេប៉ាល់។

ក្នុងចំណោមអ្នកទេសចរដែលបាត់ខ្លួនមកពីប្រទេសជាង ២៤ប្រទេសដោយក្នុងនោះ មាន ១៧៧នាក់មកពីប្រទេសឥណ្ឌា ៦៣នាក់មកពីសហរដ្ឋអាមេរិក ៣៤នាក់មកពីអូស្ត្រាលី ៣៣នាក់មកពីចក្រភពអង់គ្លេសនិង ២៥នាក់មកពីកាណាដា៕

ដោយ៖ យា ចិន្ដាខន្ដី (ប្រភព៖ កូរ៉េថាមស៍)