AKP ភ្នំពេញ ថ្ងៃទី២៨ ខែសីហា ឆ្នាំ២០២៦ -- ប្រធានាធិបតីរុស្ស៊ី លោក វ្ល៉ាឌីមៀរ ពូទីន (Vladimir Putin) បានធ្វើការសន្ទនាតាមទូរស័ព្ទជាមួយមេដឹកនាំបណ្ដោះអាសន្នស៊ីរី លោក អាម៉េដ អាល់ សារ៉ាអា (Ahmed al-Sharaa) កាលពីថ្ងៃពុធ ដើម្បីពិភាក្សាអំពីការពង្រីកកិច្ចសន្ទនានយោបាយនិងកិច្ចសហការក្នុងវិស័យពាណិជ្ជកម្ម សេដ្ឋកិច្ច និងកិច្ចការមនុស្សធម៌។

វិមានក្រឹមឡាំងបាននិយាយថា «ភាគីទាំងពីរបានកត់សម្គាល់ពីសារៈសំខាន់នៃអនុស្សរណៈការយោគយល់គ្នាដែលបានចុះហត្ថលេខានៅថ្ងៃទី៩ខែសីហា ស្តីពីការរៀបចំឡើងវិញនូវមូលដ្ឋានទ័ពអាកាស Khmeimim និងចំណុចគាំទ្រភស្តុភារ Tartus »។

អនុស្សរណៈនេះបញ្ជាក់ថា សម្ភារៈស៊ីវិលនឹងត្រូវផ្ទេរទៅក្រោមការគ្រប់គ្រងរបស់ទីក្រុងដាម៉ាស់ ខណៈដែលមូលដ្ឋានយោធារុស្ស៊ីនឹងត្រូវផ្លាស់ប្តូរទៅជាមជ្ឈមណ្ឌលបណ្តុះបណ្តាលរួមគ្នា។ ការងាររៀបចំរចនាសម្ព័ន្ធឡើងវិញដែលពាក់ព័ន្ធនឹងត្រូវបញ្ចប់ក្នុងរយៈពេលបីខែ។

លោក ពូទីន បានបញ្ជាក់ជាថ្មីនូវការគាំទ្ររបស់រុស្ស៊ីចំពោះឯកភាពបូរណភាពទឹកដី និងអធិបតេយ្យភាពរបស់ស៊ីរី និងសម្រាប់ការបង្កើតលក្ខខណ្ឌសម្រាប់ការធ្វើឱ្យមានលក្ខណៈធម្មតារយៈពេលវែង និងការកសាងឡើងវិញក្រោយជម្លោះ៕

ដោយ៖ មូល មិនា (ប្រភព៖ ស៊ីនហួ)