AKP ភ្នំពេញ ថ្ងៃទី២៨ ខែសីហា ឆ្នាំ២០២៦ -- ប្រទេសបង់ក្លាដែសបានរាយការណ៍ពីករណីជំងឺគ្រុនឈាមថ្មីចំនួន ៥៥០ករណីកាលពីថ្ងៃពុធ ដែលធ្វើឱ្យចំនួនសរុបកើនដល់ ៣១.៣៨០ករណីនៅឆ្នាំនេះ។

យោងតាមទិន្នន័យដែលចេញផ្សាយដោយអគ្គនាយកដ្ឋានសេវាសុខភាព (DGHS) បានឱ្យដឹងថា មានអ្នកជំងឺគ្រុនឈាមចំនួន ១៦.០៧០នាក់ត្រូវបានបញ្ជូនទៅមន្ទីរពេទ្យរហូតមកដល់ពេលនេះក្នុងខែសីហា បន្ទាប់ពីអ្នកជំងឺ ៩.២០៦នាក់ក្នុងខែកក្កដា។

ចំនួនអ្នកឆ្លងថ្មីបង្ហាញពីនិន្នាការកើនឡើងយ៉ាងឆាប់រហ័សនៃជំងឺដែលឆ្លងតាមសត្វមូសនៅក្នុងតំបន់មួយចំនួននៃប្រទេសក្នុងខែនេះ។

យោងតាមអគ្គនាយកដ្ឋាន ​​DGHS បានឱ្យដឹងថា ចំនួនអ្នកស្លាប់ដោយសារជំងឺគ្រុនឈាមរហូតមកដល់ពេលនេះក្នុងឆ្នាំនេះនៅក្នុងប្រទេសមានចំនួន ៨៨នាក់។

រដូវវស្សាចាប់ពីខែមិថុនា-កញ្ញា គឺជារដូវនៃជំងឺគ្រុនឈាមនៅក្នុងប្រទេសបង់ក្លាដែស ដែលត្រូវបានចាត់ទុកថាជាប្រទេសដែលមានហានិភ័យខ្ពស់ដែលងាយនឹងកើតជំងឺដែលឆ្លងតាមសត្វមូស។

ប្រទេសបង់ក្លាដែសបានកត់ត្រាករណីជំងឺគ្រុនឈាមចំនួន១០២.៨៦១ករណី និងអ្នកស្លាប់ចំនួន ៤១៣នាក់ក្នុងឆ្នាំ២០២៥។ ប្រទេសអាស៊ីខាងត្បូងនេះបានកត់ត្រាការស្លាប់ដែលទាក់ទងនឹងជំងឺគ្រុនឈាមចំនួន១៧០៥នាក់ក្នុងឆ្នាំ ២០២៣ ដែលជាចំនួនអ្នកស្លាប់ប្រចាំឆ្នាំខ្ពស់បំផុត៕

ដោយ៖ មូល មិនា (ប្រភព៖ ភីបផលដេលី)