AKP ភ្នំពេញ ថ្ងៃទី២៦ ខែសីហា ឆ្នាំ២០២៦-- ក្រសួងផែនការបានរៀបចំកិច្ចប្រជុំអន្តរក្រសួងកម្រិតនយោបាយ ដើម្បីពិនិត្យ និងពិភាក្សាលើសេចក្តីព្រាងក្របខ័ណ្ឌវាយតម្លៃពាក់កណ្តាលអាណត្តិនៃការអនុវត្តផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) របស់រាជរដ្ឋាភិបាល នីតិកាលទី៧នៃរដ្ឋសភា នៅទីស្តីការក្រសួង នាព្រឹកថ្ងៃទី២៦ ខែសីហា ឆ្នាំ២០២៦ ក្រោមអធិបតីភាពឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ ដោយមានការអញ្ជើញចូលរួមពីឯកឧត្តម លោកជំទាវ ជាថ្នាក់ដឹកនាំ រដ្ឋលេខាធិការ អនុរដ្ឋលេខាធិការ តំណាងក្រសួង ស្ថាប័ននៃរាជរដ្ឋាភិបាលកម្ពុជា។

ឯកឧត្តមរដ្ឋមន្ត្រីបានមានប្រសាសន៍ថា ក្របខ័ណ្ឌវាយតម្លៃពាក់កណ្តាលអាណត្តិនៃការអនុវត្តផែនការយុទ្ធសាស្ត្រអភិវឌ្ឍន៍ជាតិ (ផ.យ.អ.ជ.) គឺជាឧបករណ៍មួយសម្រាប់ ពិនិត្យ វិភាគ និងវាយតម្លៃលើវឌ្ឍនភាព សមិទ្ធផល បញ្ហាប្រឈម និងគម្លាតនៃការអនុវត្ត ផ.យ.អ.ជ. ពាក់កណ្តាលអាណត្តិ ហើយក្របខ័ណ្ឌវាយតម្លៃនេះ នឹងប្រើប្រាស់ជាមូលដ្ឋានសម្រាប់ធ្វើសេចក្តីសម្រេចចិត្ត កែសម្រួលទិសដៅ និងដាក់ចេញវិធានការអនុវត្តសម្រាប់ពាក់កណ្តាលអាណត្តិចុងក្រោយ។

ឯកឧត្តមរដ្ឋមន្ត្រីបានបន្ថែមថា ឈរលើមូលដ្ឋាននៃការវាយតម្លៃនេះ រាជរដ្ឋាភិបាលអាចកែសម្រួលនិងតម្រង់ទិសការអនុវត្តគោលនយោបាយសម្រាប់ពាក់កណ្តាលអាណត្តិចុងក្រោយ ដើម្បីធានាសង្គតិភាព និងភាពប្រទាក់ក្រឡាគ្នាជាមួយយុទ្ធសាស្ត្របញ្ចកោណដំណាក់កាលទី១ គោលដៅអភិវឌ្ឍន៍ជាតិ គោលដៅអភិវឌ្ឍន៍ប្រកបដោយចីរភាពកម្ពុជា និងបរិបទសង្គម សេដ្ឋកិច្ចដែលកំពុងប្រែប្រួលយ៉ាងឆាប់រហ័ស។

ចំពោះការរៀបចំការវាយតម្លៃពាក់កណ្តាលអាណត្តិនេះ ឯកឧត្តមរដ្ឋមន្ត្រីបានបញ្ជាក់ពីគោលបំណងសំខាន់ៗដូចខាងក្រោម៖ ទី១. ដើម្បីវាយតម្លៃវឌ្ឍនភាពនៃការអនុវត្ត ផ.យ.អ.ជ. ធៀបនឹងចំណុចដៅដែលបានកំណត់។ ទី២. ដើម្បីពិនិត្យភាពស៊ីចង្វាក់គ្នារវាងគោលនយោបាយអាទិភាពដែលមានចែងក្នុង ផ.យ.អ.ជ. ជាមួយយុទ្ធសាស្រ្តបញ្ចកោណដំណាក់កាលទី១ ផែនការអភិវឌ្ឍតាមវិស័យ និងផែនការសកម្មភាពរបស់ក្រសួង ស្ថាប័ន។ ទី៣. ដើម្បីពិនិត្យប្រសិទ្ធភាពនៃការអនុវត្តសកម្មភាពនិងកម្មវិធីអាទិភាពរបស់ក្រសួង ស្ថាប័ន ក្នុងការគាំទ្រដល់ការអនុវត្ត ផ.យ.អ.ជ.។ ទី៤. ដើម្បីពិនិត្យឡើងវិញលើសូចនាករសមិទ្ធកម្ម និងចំណុចដៅដែលបានកំណត់ក្នុង ផ.យ.អ.ជ.។ ទី៥. ដើម្បីកំណត់បញ្ហាប្រឈម ហានិភ័យ និងផ្តល់អនុសាសន៍តម្រង់ទិសសម្រាប់ការអនុវត្ត ផ.យ.អ.ជ. ពាក់កណ្ដាលអាណត្តិចុងក្រោយ៕

ដោយ៖ ពេជ្រ សំអឿន (ប្រភព៖ ក្រសួងផែនការ)