AKP ភ្នំពេញ ថ្ងៃទី២៦ ខែសីហា ឆ្នាំ២០២៦--លោកស្រី Cate Dillion ឧបការីរដ្ឋមន្ត្រីការបរទេសសហរដ្ឋអាមេរិក ទទួលបន្ទុកកិច្ចការអប់រំ និងវប្បធម៌ នឹងអញ្ជើញចូលរួមជាកិត្តិយស និងឡើងថ្លែងសុន្ទរកថាក្នុងពិធីបើក «សារមន្ទីរស្ថាបនិក សេរីភាព ២៥០» ដែលនឹងប្រព្រឹត្ដទៅនៅថ្ងៃទី២៩ ខែសីហា ឆ្នាំ ២០២៦ វេលាម៉ោង ៣:៤៥ រសៀល នៅមជ្ឈមណ្ឌលអាម៉េរិក សាកលវិទ្យាល័យ សៅស៍អ៊ីសថ៍អេយសៀ (USEA) ដែលស្ថិតនៅភូមិវត្តបូព៌ សង្កាត់សាលាកំរើក ក្រុងសៀមរាប ខេត្តសៀមរាប(ទល់មុខវិទ្យាល័យអង្គរ)។ នេះបើយោងតាមសេចក្ដីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំនៅកម្ពុជា។ 

ក្នុងសេចក្ដីប្រកាសព័ត៌មានបានឱ្យដឹងថា “សារមន្ទីរស្ថាបនិក» គឺជាគំនិតផ្តួចផ្តើមរបស់សេតវិមាន រួមបញ្ចូលនូវការតាំងពិព័រណ៍អប់រំតាមបែបអន្តរកម្ម ដោយនាំយកប្រវត្តិសាស្ត្រ និងវប្បធម៌អាម៉េរិកមកបង្ហាញក្នុងលក្ខណៈរស់រវើក។ អ្នកចូលទស្សនាអាចស្វែងយល់បន្ថែម ពីក្រុមស្ថាបនិក ព្រឹត្តិការណ៍ប្រវត្តិសាស្ត្រសំខាន់ៗ និងវីរបុរសអាម៉េរិក ដែលភាពដឹកនាំ និងការបង្កើតថ្មីរបស់ពួកគាត់ នៅតែបន្តជំរុញការច្នៃប្រឌិតរបស់អាម៉េរិកមកទល់បច្ចុប្បន្ន។

ជាមួយគ្នានេះ ការប្រើប្រាស់បច្ចេកវិទ្យាទំនើបដើម្បីធ្វើឱ្យការនិទានរឿងកាន់តែសម្បូរបែប អ្នកទស្សនាអាចស្កែនកូដ QR លើទូរស័ព្ទ ដើម្បីមើលវីដេអូបែបគំនូរជីវចល និទានពីរឿងរ៉ាវផ្ទាល់ខ្លួនរបស់បុគ្គលល្បីៗរបស់អាម៉េរិក ទាំងនោះ។ អ្នកទស្សនាក៏នឹងមានឱកាសចូលរួមឆ្លើយសំណួរកម្សាន្ត អំពីសារមន្ទីរស្ថាបនិកនេះ ដើម្បីឈ្នះ រង្វាន់ពិសេសៗពីកម្មវិធីសេរីភាព២៥០។

សូមជម្រាបជូនថា សារមន្ទីរស្ថាបនិកនេះ នឹងបើកជូនសាធារណជនចូលរួមទស្សនាដោយឥតគិតថ្លៃ ចាប់ពីថ្ងៃទី ៣០ ខែសីហា ដល់ថ្ងៃទី ១២ ខែកញ្ញា ឆ្នាំ ២០២៦។ សម្រាប់ម៉ោងទស្សនា ឬការរៀបចំកាលវិភាគសម្រាប់ ក្រុមសិស្សសាលា សូមទាក់ទងទៅកាន់ប្រធានមជ្ឈមណ្ឌលអាម៉េរិកខេត្តសៀមរាប លោក ជា វិបុល តាមរយៈទូរស័ព្ទលេខ៖ ០៩៣ ៣៤៥ ៥៦៨ ឬអ៊ីមែល៖ vybol.chea@gmail.com ៕

ដោយ៖ រិទ្ធី