AKP ភ្នំពេញ ថ្ងៃទី២៦ ខែសីហា ឆ្នាំ២០២៦--ដោយអនុវត្តតាមប្រសាសន៍ណែនាំរបស់ឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក ប្រធានក្រុមការងាររបស់រាជរដ្ឋាភិបាលចុះមូលដ្ឋាន ស្រុកសណ្ដាន់ ខេត្ត កំពង់ ធំ នាថ្ងៃទី ២៥ ខែសីហា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់  បានដឹកនាំសហការីចុះទៅត្រួតពិនិត្យដំណើរការសាងសង់សាលាបឋមសិក្សាមួយខ្នង ដែលមានចំនួន ៦បន្ទប់ សម្រាប់ក្មួយៗ និងចៅៗ បានសិក្សារៀនសូត្រពីថ្នាក់ទី១ ដល់ថ្នាក់ទី៦ ស្ថិតនៅសាលាបឋមសិក្សាសាមគ្គីមានជ័យ ក្នុងភូមិអង្គរសែនជ័យ ឃុំខ្លែង ស្រុកសណ្ដាន់ ខេត្តកំពង់ធំ ។

លោកវិស្វករ លុច ម៉ៃ ប្រធានក្រុមការងារសាងសង់ បានរាយការណ៍បញ្ជាក់ថា អាគារបឋមសិក្សានេះ បានចាប់ផ្ដើមដំណើរការនៅថ្ងៃទី១២ ខែសីហា ឆ្នាំ២០២៦ មានចំនួន ៦បន្ទប់ ដោយក្នុងបន្ទប់នីមួយៗមានទទឹងប្រវែង ៧,១២ ម៉ែត្រ និងបណ្ដោយប្រវែង ៨,១២ម៉ែត្រ បច្ចុប្បន្ន សាងសង់ បាន ៣៥% ហើយ ។ តាមគម្រោងផែនការដែលបានគ្រោងទុក ការសាងសង់នឹងត្រូវបញ្ចប់ឱ្យបានរួចរាល់នៅពាក់កណ្ដាលខែតុលា ឆ្នាំ២០២៦ ខាងមុខនេះ ដើម្បីឱ្យសិស្សានុសិស្សបានចូលរៀនសូត្រនៅអាគារថ្មីនេះ បន្ទាប់ពីចប់វិស្សមកាល។

ឧត្តមសេនីយ៍ទោ សោម ស៊ុន បានបញ្ជាក់ថា អគារសិក្សានេះ ជាអំណោយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ ប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ តាមសំណូមពររបស់នាយកសាលា ក៏ដូចជាអាជ្ញាធរដែនដីភូមិ ឃុំ ស្រុក និង ប្រជាពលរដ្ឋ ដើម្បីឱ្យសិស្សានុសិស្សមានអគារសិក្សាបានសមរម្យ។ ដោយបច្ចុប្បន្ននេះ សិស្សានុសិស្សទាំងប្រាំមួយថ្នាក់ បាននិងកំពុងរៀនសូត្រក្រោមដំបូលប្រក់ស័ង្កសី ជញ្ជាំងធ្លះធ្លាយ ហើយមួយបន្ទប់សិស្សត្រូវរៀនពីរថ្នាក់ ក្នុងពេលតែមួយ។ 

លោក លាម ធីនី នាយកសាលា និងលោកគ្រូអ្នកគ្រូ ព្រមទាំងសិស្សានុសិស្សនៅសាលាបឋមសិក្សាសាមគ្គីមានជ័យ ក្នុងភូមិអង្គរសែនជ័យ និង ប្រជាពលរដ្ឋ នៅក្នុងឃុំខ្លែង ស្រុកសណ្ដាន់ ខេត្តកំពង់ធំ សូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ ដែលបានសាងសង់អគារសិក្សាសម្រាប់ឱ្យសិស្សានុសិស្សទាំង ៦ថ្នាក់ ដែលមានចំនួន ៦បន្ទប់ បានរៀនសូត្រតាមថ្នាក់ នៅតាមបន្ទប់នីមួយៗ ដែលយើងខ្ញុំទាំងអស់គ្នាមិនអាចបំភ្លេចនូវគុណូបការ:ដ៍ ថ្លៃថ្លា នេះ បានឡើយ និងសូមគោរពជូនពរសម្ដេច លោកជំទាវ និងឯកឧត្តមនាយឧត្តមសេនីយ៍ ម៉ៅ សុផាន់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ៕

ដោយ៖ សំ សាម៉ន (ប្រភព៖ កងទ័ពជើងគោក)