AKP ភ្នំពេញ ថ្ងៃទី២៥ ខែសីហា ឆ្នាំ២០២៦ -- លោក ថូ ប៊ុនថន អគ្គនាយកស្តីទីនៃអគ្គនាយកដ្ឋានការងារ រួមជាមួយឧត្តមមន្រ្តីការងារកម្ពុជាចូលរួមកិច្ចប្រជុំឧត្តមមន្រ្តីការងារអាស៊ាន លើកទី២២ (22nd SLOM) និងកិច្ចប្រជុំឧត្តមមន្រ្តីការងារអាស៊ានបូកបី លើកទី២៤ (24th SLOM+3) ដែលប្រព្រឹត្តទៅនៅថ្ងៃទី២៤-២៥ ខែសីហា ឆ្នាំ២០២៦ តាមប្រព័ន្ធវីដេអូ។ កិច្ចប្រជុំទាំងពីរនេះ ត្រូវបានរៀបចំដោយក្រសួងការងារនៃប្រទេសថៃជាម្ចាស់ផ្ទះ ក្នុងនាមជាប្រធានប្តូរវេនឧត្តមមន្ត្រីការងារអាស៊ាន (SLOM) ឆ្នាំ២០២៦-២០២៨ ដោយមានការចូលរួមពីឧត្តមមន្រ្តីការងារនៃរដ្ឋសមាជិកអាស៊ាន រួម​ជាមួយប្រទេសបូកបី ព្រមទាំងលេខាធិការដ្ឋានអាស៊ាន អង្គភាពតាមវិស័យក្រោម SLOM អង្គការអន្តរជាតិ (ILO, IOM, RECOTwin) និងភាគីពាក់ព័ន្ធ សរុបប្រមាណ៦០នាក់។

នៅក្នុងកិច្ចប្រជុំឧត្តមមន្រ្តីការងារអាស៊ានលើកទី២២  អង្គប្រជុំបានពិនិត្យមើលវឌ្ឍនភាពការងាររបស់អង្គភាពតាមវិស័យក្រោម SLOM និងលទ្ធផលនៃកិច្ចប្រជុំអាស៊ានពាក់ព័ន្ធផ្សេងៗក្រោមសសរស្តម្ភសហគមន៍សង្គម-វប្បធម៌អាស៊ានផងដែរ។ អង្គប្រជុំបានពិនិត្យលើឯកសារអាស៊ានសំខាន់ៗក្នុងវិស័យការងារ ក៏ដូចជាពិភាក្សាលើមតិយោបល់ និងចំណុចអាទិភាព ដើម្បីលើកកម្ពស់ប្រសិទ្ធភាពការងារ ការការពារសិទ្ធិជនទេសន្តរ ប្រវេសន៍ការងារ ការលុបបំបាត់ពលកម្មកុមារ ការអភិវឌ្ឍជំនាញ ការលើកកម្ពស់លក្ខខណ្ឌការងារ និងសុខភាព និងសុវត្ថិភាពការងារក្នុងតំបន់អាស៊ាន។  ជាមួយគ្នានេះ អង្គប្រជុំក៏បានកំណត់ទិសដៅបន្តសម្រាប់ការអនុវត្តសកម្ម ភាពសំខាន់ៗក្រោមផែនការការងារ SLOM និងផែនការការងារក្រោមវិស័យ SLOM សម្រាប់ឆ្នាំ២០២៦-២០៣០។ 

តំណាងប្រធានឧត្តមមន្រ្តីការងារកម្ពុជា បានជម្រាបជូនអង្គប្រជុំអំពីវឌ្ឍនភាព និងទិសដៅបន្តនៃការអនុវត្តគោលកា រណ៍ណែនាំអាស៊ាន ស្តីពីចល័តភាពនៃអត្ថប្រយោជន៍របបសន្តិសុខសង្គមសម្រាប់ជនទេសន្តរប្រវេសន៍ការងារក្នុងអាស៊ាន ដែលជាគំនិតផ្តួចផ្តើមរបស់កម្ពុជា និងត្រូវបានអនុម័តក្នុងកិច្ចប្រជុំរដ្ឋមន្ត្រីការងារអាស៊ានលើកទី២៨ និងកត់សម្គាល់ដោយប្រមុខដឹកនាំអាស៊ានក្នុងឆ្នាំ២០២៤។ កម្ពុជាបានបន្តជំរុញឱ្យរដ្ឋសមាជិកអាស៊ាន ប្រើប្រាស់គោលការណ៍ណែនាំនេះ ជាមូលដ្ឋានសម្រាប់ការពិភាក្សា ចរចា និងការរៀបចំកិច្ចព្រមព្រៀងទ្វេភាគី ឬពហុភាគី ដើម្បីពង្រឹងការចល័តអត្ថប្រយោជន៍របបសន្តិសុខសង្គម និងធានាការទទួលបានការការពារពេញលេញសម្រាប់ជនទេសន្តរប្រវេសន៍ការងារអាស៊ាន។

សម្រាប់កិច្ចប្រជុំឧត្តមមន្រ្តីការងារអាស៊ានបូកបីលើកទី២៤ អង្គប្រជុំបានពិនិត្យលើវឌ្ឍនភាពនៃការបញ្ចប់ផែនការការងារនៃកិច្ចប្រជុំឧត្តមមន្រ្តីការងារអាស៊ានបូកបីឆ្នាំ២០២១-២០២៥ ជាពិសេសទៅលើគម្រោង និងសកម្មភាពដែលបានអនុវត្តក្នុងក្របខ័ណ្ឌអាស៊ានបូកបី ក៏ដូចជាបញ្ហាផ្សេងៗ ដែលជាអាទិភាពរបស់បណ្តារដ្ឋសមាជិកអាស៊ាន និងប្រទេសបូកបី។ អង្គប្រជុំបានបញ្ជាក់ការប្តេជ្ញាចិត្តបន្តពង្រឹងកិច្ចសហប្រតិបត្តិការ និងអនុវត្តសកម្មភាពអាទិភាពក្រោមផែនការការងារ SLOM+3 ឆ្នាំ ២០២៦–២០៣០៕ 

ដោយ៖ ប៊ុនរិទ្ធ,ប្រភព៖ ក្រសួងការងារ