AKP កំពង់ធំ ថ្ងៃទី២៥ ខែសីហា ឆ្នាំ២០២៦ --អនុវត្តន៍តាមប្រសាសន៍ណែនាំរបស់ឯកឧត្តមនាយឧត្តមសេនីយ៍ ម៉ៅ សុផាន់ អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោក និងជាប្រធានក្រុមការងាររបស់រាជរដ្ឋាភិបាលចុះមូលដ្ឋាន ស្រុកសណ្ដាន់ នាព្រឹកថ្ងៃទី២៥ ខែសីហា ឆ្នាំ២០២៦ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ បានដឹកនាំសហការីចុះទៅត្រួតពិនិត្យដំណើរការសាងសង់អាគារសិក្សា១ខ្នង ៦បន្ទប់ ជាអំណោយដ៏ថ្លៃថ្លារបស់សម្ដេចធិបតី ហ៊ុន ម៉ាណែត និងលោកជំទាវ សម្រាប់ក្មួយៗ និងចៅៗបានសិក្សារៀនសូត្រពីថ្នាក់ទី១ ដល់ថ្នាក់ទី៦ នៅសាលាបឋមសិក្សាសាមគ្គីមានជ័យ ក្នុងភូមិអង្គរសែនជ័យ ឃុំខ្លែង ស្រុកសណ្ដាន់ ខេត្តកំពង់ធំ។

លោក លុច ម៉ៃ ប្រធានក្រុមការងារសាងសង់ បានរាយការណ៍បញ្ជាក់ថា អាគារបឋមសិក្សានេះ បានចាប់ផ្ដើមដំណើរការនៅថ្ងៃទី១២ ខែសីហា ឆ្នាំ២០២៦ មានចំនួន ៦បន្ទប់ ដោយក្នុងបន្ទប់នីមួយៗមានទទឹងប្រវែង ៧,១២ម៉ែត្រ និងបណ្ដោយប្រវែង ៨,១២ម៉ែត្រ បច្ចុប្បន្នសាងសង់បាន ៣៥%ហើយ។ តាមគម្រោងផែនការដែលបានគ្រោងទុក្ខ នឹងត្រូវបញ្ចប់ការសាងសង់ឱ្យបានរួចរាល់ នៅពាក់កណ្ដាលខែតុលា ឆ្នាំ២០២៦ ខាងមុខនេះ ដើម្បីឱ្យសិស្សានុសិស្សបានចូលរៀនសូត្រនៅអាគារថ្មីនេះ បន្ទាប់ពីចប់វិសមកាលរួច។

ឧត្តមសេនីយ៍ទោ សោម ស៊ុន បានបញ្ជាក់ថា អគារសិក្សានេះ ជាអំណោយរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ ប្រធានក្រុមការងាររបស់រាជរដ្ឋាភិបាលចុះមូលដ្ឋានស្រុកសណ្ដាន់ ខេត្តកំពង់ធំ តាមសំណូមពររបស់នាយកសាលា ក៏ដូចជាអាជ្ញាធរដែនដីភូមិ ឃុំ ស្រុក និងប្រជាពលរដ្ឋ ដើម្បីឱ្យសិស្សានុសិស្សមានអគារសិក្សាបានសមរម្យ។ ដោយបច្ចុប្បន្ននេះ សិស្សានុសិស្សទាំងប្រាំមួយថ្នាក់ត្រូវបានរៀនសូត្រក្រោមដំបូលប្រក់ស័ង្កសី ជញ្ជាំងធ្លះធ្លាយ ហើយមួយបន្ទប់សិស្សត្រូវរៀនពីរថ្នាក់ ក្នុងពេលតែមួយ។

លោក លាម ធីនី នាយកសាលា និងលោកគ្រូអ្នកគ្រូ ព្រមទាំងសិស្សានុសិស្ស នៅសាលាបឋមសិក្សាសាមគ្គីមានជ័យ និងប្រជាពលរដ្ឋនៅក្នុងភូមិអង្គរសែនជ័យ ឃុំខ្លែង ស្រុកសណ្ដាន់ ខេត្តកំពង់ធំ សូមគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវ តាមរយៈឯកឧត្តមនាយឧត្តមសេនីយ៍ ម៉ៅ សុផាន់ ដែលបានសាងសង់អគារសិក្សាសម្រាប់ឱ្យសិស្សានុសិស្សទាំង ៦ថ្នាក់ ដែលមានចំនួន ៦បន្ទប់ បានរៀនសូត្រ។ យើងខ្ញុំទាំងអស់គ្នាមិនអាចបំភ្លេចនូវគុណូបការ:ដ៏ថ្លៃថ្លានេះបានឡើយ និងសូមគោរពជូនពរសម្ដេច លោកជំទាវ និងឯកឧត្តមនាយឧត្តមសេនីយ៍ ម៉ៅ សុផាន់ សូមទទួលបាននូវពុទ្ធពរទាំង ៤ប្រការ កុំបីឃ្លៀងឃ្លាតឡើយ៕

ដោយ ស៊ុម វណ្ណា