AKP កំពង់ស្ពឺ ថ្ងៃទី២៥ ខែសីហា ឆ្នាំ២០២៦--ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ បានអញ្ជើញជាអធិបតីភាពក្នុងយុទ្ធនាការដង្ហែក្បួនជិះម៉ូតូពាក់មួកសុវត្ថិភាពចំនួន ៥០០គ្រឿង លើដងផ្លូវសាធារណៈក្នុងក្រុងច្បារមន ដើម្បីអប់រំ និងផ្សព្វផ្សាយច្បាប់ស្តីពីចរាចរណ៍ផ្លូវគោកដល់បងប្អូនប្រជាពលរដ្ឋ។ ពិធីនេះក៏មានការអញ្ជើញចូលរួមពីសំណាក់ លោកប្រធានមន្ទីរសាធារណការ និងដឹកជញ្ជូនខេត្តកំពង់ស្ពឺ ថ្នាក់ដឹកនាំរដ្ឋបាលខេត្ត មន្ត្រីរាជការ កងកម្លាំងប្រដាប់អាវុធ និងយុវជនយ៉ាងច្រើនកុះករ។

ក្នុងឱកាសនោះ លោក ហុង ចាន់សុខា ក៏បានសម្តែងនូវការដឹងគុណយ៉ាងជ្រាលជ្រៅជូនចំពោះ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន ដែលតែងតែផ្តល់អនុសាសន៍ណែនាំ និងតម្រង់ទិសយ៉ាងយកចិត្តទុកដាក់លើការងារសុវត្ថិភាពចរាចរណ៍។ កិច្ចខិតខំប្រឹងប្រែងនេះ គឺជាផ្នែកមួយនៃផែនការសកម្មភាពប្រចាំឆ្នាំ២០២៦ ដើម្បីចូលរួមគាំទ្រ «ផែនការជាតិទសវត្សសកម្មភាពសុវត្ថិភាពចរាចរណ៍ផ្លូវគោក ឆ្នាំ២០២១-២០៣០» ដោយផ្តោតលើគោលដៅយុទ្ធសាស្ត្រក្នុងការកាត់បន្ថយអត្រាអ្នកស្លាប់ និងរងរបួសដោយសារគ្រោះថ្នាក់ចរាចរណ៍ឱ្យបាន ៥០% នៅត្រឹមឆ្នាំ២០៣០។

លោកប្រធានមន្ទីរសាធារណការ និងដឹកជញ្ជូនខេត្ត បានលើកឡើងថា ការរៀបចំយុទ្ធនាការជិះម៉ូតូចំនួន ៥០០ម៉ូតូ ជាក្បួនដង្ហែក្នុងគោលបំណងពញ្ញាក់ស្មារតីដល់អ្នកប្រើប្រាស់ផ្លូវគ្រប់រូប ឱ្យមានការប្រុងប្រយ័ត្នខ្ពស់ និងលើកកម្ពស់ការ គោរពច្បាប់ចរាចរណ៍ផ្លូវគោក ស្របតាមទិស ស្លោក “ពលរដ្ឋល្អ បើកបរគោរពច្បាប់ ចរាចរណ៍” “មួកសុវត្ថិភាពមួយ ការពារជីវិតមួយ”។ 

ឆ្លៀតក្នុងឱកាសសំណេះសំណាល ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានលើកឡើងថា ការៀបចំយុទ្ធនាការនេះ មានគោលបំណង បានបង្ហាញពីការយកចិត្តទុកដាក់ និងការប្តេជ្ញាចិត្តរួមគ្នាក្នុងការលើកកម្ពស់ការយល់ដឹង ពង្រឹងវប្បធម៌នៃការគោរពច្បាប់ចរាចរណ៍ និងបំផុសស្មារតីទទួល ខុសត្រូវរបស់អ្នកប្រើប្រាស់ផ្លូវ ដើម្បីរួមគ្នាកាត់បន្ថយគ្រោះថ្នាក់ ការបាត់បង់អាយុជីវិត និងការខាត បង់ទ្រព្យសម្បត្តិ។

ឯកឧត្តមបណ្ឌិតអភិបាលខេត្ត បានគូសបញ្ជាក់យ៉ាងច្បាស់ៗថា ការពាក់មួកសុវត្ថិភាព មិនមែនធ្វើឡើងដើម្បីតែគេចវេះពីការផាកពិន័យរបស់សមត្ថកិច្ចនោះទេ ប៉ុន្តែគឺការពារអាយុជីវិតផ្ទាល់ខ្លួន និងកាត់បន្ថយហានិភ័យនៃរបួសក្បាលធ្ងន់ធ្ងរនៅពេលមានគ្រោះថ្នាក់ចៃដន្យកើតឡើង។ អ្នកបើកបរទោចក្រយានយន្តទាំងអស់ ត្រូវចូលរួមពាក់មួកសុវត្ថិភាពឱ្យបានគ្រប់ៗគ្នា ទាំងអ្នកបើកបរ និងអ្នករួមដំណើរ ជាពិសេសគឺកុមារតូចៗ ហើយត្រូវដាស់តឿនសមាជិកគ្រួសារឱ្យគោរពច្បាប់ជាប្រចាំ។ ការគោរពច្បាប់ចរាចរណ៍ គឺជាកាតព្វកិច្ចរបស់អ្នកប្រើប្រាស់ផ្លូវគ្រប់រូប ដើម្បីរួមចំណែកកាត់បន្ថយអត្រាស្លាប់ ពិការភាព និងការខាតបង់ទ្រព្យសម្បត្តិគ្រួសារ និងសង្គមជាតិ។

ជាមួយគ្នានេះដែរ ឯកឧត្តមបណ្ឌិត ជាម ច័ន្ទសោភ័ណ ក៏បានណែនាំ និងអំពាវនាវដល់មន្ទីរសាធារណការ និងដឹកជញ្ជូនខេត្ត អាជ្ញាធរដែនដីគ្រប់លំដាប់ថ្នាក់ និងកងកម្លាំងសមត្ថកិច្ច ពង្រឹងការអនុវត្តច្បាប់ និងបន្តចុះអប់រំផ្សព្វផ្សាយច្បាប់ចរាចរណ៍ផ្លូវគោកនេះឱ្យបានកាន់តែសកម្ម និងទូលំទូលាយបន្ថែមទៀត នៅតាមគ្រឹះស្ថានសិក្សា រោងចក្រ សហគ្រាស និងតាមមូលដ្ឋានប្រជាពលរដ្ឋក្នុងទូទាំងខេត្តកំពង់ស្ពឺផងដែរ៕

ដោយ ម៉ែន ប៊ុនធីម