AKPកំពង់ធំថ្ងៃទី២៥ខែសីហាឆ្នាំ២០២៦--លោក ហ៊ីម លីម៉េង អភិបាលរងខេត្តកំពង់ធំ កាលពីថ្ងៃទី២៤ខែសីហាឆ្នាំ២ ០២៦បានដឹកនាំក្រុមការងារអនុគណៈកម្មការវិនិយោគខេត្ត ចុះពិនិត្យទីតាំងជាក់ស្តែង តាមការស្នើសុំរបស់ក្រុមហ៊ុន ស៊ី.អេ.អិល ២៦ ឯ.ក ក្នុងការបើករោងចក្រកែច្នៃដំណាប់ស្វាយ ស្ថិតនៅភូមិត្រាច ឃុំកំពង់ចិនជើង ស្រុកស្ទោង ខេត្តកំពង់ធំ។

ការចុះពិនិត្យទីតាំងជាក់ស្តែងនេះ ធ្វើឡើងក្នុងគោលបំណងសិក្សា និងវាយតម្លៃស្ថានភាពទីតាំងព្រមទាំងពិនិត្យលក្ខខណ្ឌពាក់ព័ន្ធ នឹងសំណើសុំវិនិយោគ និងបើករោងចក្រកែច្នៃដំណាប់ស្វាយរបស់ក្រុមហ៊ុន ដើម្បីជាមូលដ្ឋានសម្រាប់ការពិនិត្យ និងសម្រេចតាមនីតិវិធី។

ក្នុងអំឡុងពេលចុះពិនិត្យ លោក ហ៊ីម លីម៉េង និងក្រុមការងារ បានពិនិត្យស្ថាន ភាពជាក់ស្តែងនៅទីតាំង ព្រមទាំងពិភាក្សានិងស្តាប់ការបំភ្លឺពាក់ព័ន្ធនឹងគម្រោងរបស់ក្រុមហ៊ុន ដោយផ្តោតលើលទ្ធភាពអនុវត្តគម្រោង ស្របតាមលក្ខខណ្ឌ បច្ចេកទេស និងបទប្បញ្ញត្តិជាធរមាន។ការវិនិយោគបើករោងចក្រកែច្នៃដំណាប់ស្វាយនេះនឹងចូលរួមបង្កើនសកម្មភាពកែច្នៃផលកសិកម្មនៅក្នុងមូលដ្ឋាន ជាពិសេសផលិតផលស្វាយ ព្រមទាំងបង្កើតឱកាសការងារជូនប្រជាពលរដ្ឋក្នុងមូលដ្ឋានតាមរដូវកាលប្រមាណជិត២០០០នាក់។

គម្រោងនេះ ត្រូវបានរំពឹងថា នឹងចូលរួមផ្តល់ឱកាសការងារ និងប្រាក់ចំណូលដល់ប្រជាពលរដ្ឋក្នុងស្រុកស្ទោងនិងតំបន់ជុំវិញ ព្រមទាំងជួយលើកកម្ពស់ការកែច្នៃផលកសិកម្មក្នុងស្រុកនិងប ង្កើនតម្លៃបន្ថែមដល់ផលិតផលកសិក ម្មរបស់ប្រជាកសិករ។

លោក ហ៊ីម លីម៉េង បានយកចិត្តទុកដាក់ពិនិត្យនិងសម្របសម្រួលលើចំណុចពាក់ព័ន្ធ ដើម្បីឱ្យគម្រោងវិនិយោគអាចអនុវត្តទៅបានដោយរលូន ស្របតាមច្បាប់ និងនីតិវិធី ព្រមទាំងផ្តល់ផលប្រយោជន៍ដល់សេដ្ឋកិច្ចមូលដ្ឋាន និងប្រជាពលរដ្ឋ។នេះគឺជាផ្នែកមួយនៃការងាររបស់អនុគណៈកម្មការវិនិយោគខេត្ត ក្នុងការចុះសិក្សា ពិនិត្យ និងសម្របសម្រួលសំណើវិនិយោគនៅមូលដ្ឋានដើម្បីចូលរួមទាក់ទាញការវិនិយោគ និងជំរុញការបង្កើតការងារជូនប្រជាពលរដ្ឋនៅក្នុងខេត្តកំពង់ធំ៕

ដោយ៖ ស៊ុម វណ្ណា