AKP ហាណូយ, វៀតណាម ថ្ងៃទី២៤ ខែសីហា ឆ្នាំ២០២៦--

កម្ពុជា និងវៀតណាម បានប្តេជ្ញាចិត្តរួមគ្នាក្នុងការបន្តពង្រឹងការផ្លាស់ប្តូរ និងកិច្ចសហប្រតិបត្តិការលើវិស័យព័ត៌មានបន្ថែមទៀត ដើម្បីធានាបាននូវផលប្រយោជន៍ទៅវិញទៅមក ព្រមទាំងរួមចំណែកលើកកម្ពស់ទំនាក់ទំនងមិត្តភាពប្រពៃណីរវាងប្រទេសទាំងពីរ។ ការលើកឡើងរវាងភាគីទាំងពីរបែបនេះ ក្នុងកិច្ចពិភាក្សាការងារ និងការចែករំលែកបទពិសោធន៍រវាងគណៈប្រតិភូសារព័ត៌មានកម្ពុជា ដឹកនាំដោយលោក ជ្រីម ឆេងលីម អគ្គលេខាធិការរង នៃអគ្គលេខាធិការដ្ឋានក្រសួងព័ត៌មាន ជាមួយលោកស្រី នីញ ហុងង៉ា (Mrs. NINH HONG NGA) អគ្គនិពន្ធនាយកកាសែត «ដំណឹង និងជនជាតិ» (Bao Tin Tuc va Dan Toc) នាព្រឹកថ្ងៃទី២៤ ខែសីហា ឆ្នាំ២០២៦ នៅសាធារណរដ្ឋសង្គមនិយមវៀតណាម។

ក្នុងឱកាសនោះ លោក ជ្រីម ឆេងលីម បានសម្តែងនូវការអរគុណយ៉ាងជ្រាលជ្រៅចំពោះការទទួលស្វាគមន៍​យ៉ាងកក់ក្តៅពីភាគីវៀតណាម ដែលបានផ្តល់ឱកាសដ៏សំខាន់សម្រាប់គណៈប្រតិភូកម្ពុជា ក្នុងការសិក្សាស្វែងយល់ពីបទពិសោធន៍នៃការគ្រប់គ្រងស្ថាប័ន ការបណ្តុះបណ្តាលអ្នកយកព័ត៌មានឱ្យមានភាពបត់បែន និងការរៀបចំយុទ្ធសាស្ត្របង្កើនការប្រកួតប្រជែងក្នុងយុគសម័យឌីជីថល។

លោកអគ្គលេខាធិការរងក៏បានសម្តែងនូវការកោតសរសើរចំពោះកាសែត «ដំណឹង និងជនជាតិ» ដែលបានចែករំលែកបទពិសោធន៍លើការថែរក្សា និងអភិវឌ្ឍន៍ប្រព័ន្ធផ្សព្វផ្សាយបោះពុម្ព (កាសែតបោះពុម្ព) ក្នុងពេលដែលប្រព័ន្ធផ្សព្វផ្សាយប្រភេទនេះភាគច្រើនបានបាត់វត្តមាន ដោយសារការរីកចម្រើននៃកាសែតអេឡិចត្រូនិក។

លោកប្រធានគណៈប្រតិភូបានជម្រាបជូនផងដែរថា ក្នុងអាណត្តិទី៧ នៃរាជរដ្ឋាភិបាលកម្ពុជា ក្រោមការដឹកនាំរបស់ឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន ក្រសួងបានតាំងចិត្តយ៉ាងមុតមាំក្នុងការរៀបចំឡើងវិញនូវកាសែតបោះពុម្ព ហើយបច្ចុប្បន្នដំណើរការផ្សាយត្រូវបានអនុវត្តន៍ជាប្រចាំ។

ក្នុងជំនួបនេះដែរ សមាជិកគណៈប្រតិភូបានពិភាក្សា និងលើកជាសំណួរយ៉ាងផុសផុលលើប្រធានបទសំខាន់ៗ រួមមាន៖ ការគ្រប់គ្រងស្ថាប័ន និងហិរញ្ញវត្ថុ ការអនុវត្តបច្ចេកវិទ្យាទាក់ទងនឹកការនាំយកបច្ចេកវិទ្យាថ្មីៗ ដូចជាបញ្ញាសិប្បនិម្មិត (AI) មកប្រើប្រាស់ក្នុងដំណើរការផលិត និងផ្សព្វផ្សាយព័ត៌មាន និងការបណ្តុះបណ្តាលធនធានមនុស្សដើម្បីការកសាងសមត្ថភាពអ្នកសារព័ត៌មានឱ្យឆ្លើយតបទៅនឹងការប្រែប្រួលនៃបរិបទសកល។

លោក ជ្រីម ឆេងលីម បានបន្ថែមថា កិច្ចពិភាក្សានេះបានផ្តល់នូវចំណេះដឹងយ៉ាងជ្រាលជ្រៅ ទាំងលើការគ្រប់គ្រង ការអភិវឌ្ឍស្ថាប័ន និងការប្រើប្រាស់បច្ចេកវិទ្យាបញ្ញាសិប្បនិម្មិត(AI)។ លោកអគ្គលេខាធិការរងបានឱ្យដឹងទៀតថា ការទទួលបាននូវចំណេះដឹង មេរៀន និងបទពិសោធន៍ល្អៗទាំងនេះ នឹងត្រូវនាំយកទៅអនុវត្តន៍ដើម្បីអភិវឌ្ឍន៦ស្ថាប័នព័ត៌មានកម្ពុជាឱ្យកាន់តែរីកចម្រើន។

ជាការឆ្លើយតប លោកស្រី នីញ ហុងង៉ា បានសម្តែងនូវក្តីសោមនស្សរីករាយក្នុងការស្វាគមន៍គណៈប្រតិភូក្រសួងព័ត៌មានកម្ពុជា និងបានចែករំលែកបន្ថែមពីការផ្លាស់ប្តូរទម្រង់ទៅជាឌីជីថល (Digital Transformation) ព្រមទាំងការរក្សាការផ្សាយពុម្ពក្នុងបរិបទសម័យថ្មី។

ជាមួយគ្នានេះដែរ ភាគីទាំងពីរបានឯកភាពគ្នាក្នុងការបន្តពង្រីកកិច្ចសហប្រតិបត្តិការ លើកកម្ពស់ការផ្លាស់ប្តូរទស្សនកិច្ច និងបទពិសោធន៍រវាងអ្នកសារព័ត៌មានវិជ្ជាជីវៈនៃប្រទេសទាំងពីរនាពេលអនាគត ដើម្បីរឹតបន្តឹងចំណងមិត្តភាព និងកិច្ចសហប្រតិបត្តិការឱ្យកាន់តែជិតស្និទ្ធបន្ថែមទៀត៕

ដោយ៖ ទូច វលក័្ខណ