AKP ភ្នំពេញ ថ្ងៃទី២២ ខែសីហា ឆ្នាំ ២០២៦--
ឯកឧត្តម នាយឧត្តមសេនីយ៍ មាស វិរិទ្ធ អគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀនបានស្នើដល់អ្នកពាក់ព័ន្ធនៃវិស័យអាកាសចរណ៍ បន្តពង្រឹងការប្រយុទ្ធប្រឆាំងគ្រឿងញៀនឆ្លងកាត់អាកាសយានដ្ឋាន ដើម្បីពង្រឹងសមត្ថភាពបង្ការទប់ស្កាត់លំហូរគ្រឿងញៀនឆ្លងកាត់។ ការលើកឡើងរបស់ឯកឧត្តម នាយឧត្តមសេនីយ៍បែបនេះ ក្នុងឱកាសពិធីបិទវគ្គបណ្ដុះបណ្ដាលចំណេះដឹងស្តីពីការយល់ដឹងពីគ្រោះថ្នាក់នៃគ្រឿងញៀននិងពង្រឹងការចូលរួមទប់ស្កាត់ការចរាចរណ៍គ្រឿងញៀនធ្លាប់កាត់អាកាសយានដ្ឋាន ដែលមានអ្នកចូលរួមជាមន្ត្រីរាជការនៃរដ្ឋលេខាធិការដ្ឋានអាកាសចរណ៍ស៊ីវិល និងប្រតិបត្តិករពាក់ព័ន្ធនឹងវិស័យអាកាសចរណ៍ កាលពីថ្ងៃទី២១ ខែសីហា ឆ្នាំ២០២៦។

ថ្លែងក្នុងនាម ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីរដ្ឋលេខាធិការដ្ឋានអាកាសចរណ៍ស៊ីវិល ឯកឧត្តម ផាន់ ចាន់ធុច បានថ្លែងអំណរគុណពីអាជ្ញាធរជាតិប្រយុទ្ធប្រឆាំងគ្រឿងញៀន ដែលបានផ្ដល់កិច្ចសហការល្អតាមរយៈការផ្ដល់ចំណេះដឹងនិងបទពិសោធន៍នានាដើម្បីឱ្យវិស័យអាកាសចរណ៍អាចចូលរួមសកម្មភាពប្រយុទ្ធប្រឆាំងគ្រឿងញៀន។

ក្នុងឱកាសនោះដែរ ឯកឧត្តម នាយឧត្តមសេនីយ៍ មាស វិរិទ្ធ បានកោតសរសើរដល់រដ្ឋលេខាធិការដ្ឋានអាកាសចរណ៍ស៊ីវិល និងគ្រប់ភាគីពាក់ព័ន្ធទាំងអស់នៃវិស័យអាកាសចរណ៍ដែលបានចូលរួមសហការក្នុងការងារប្រយុទ្ធប្រឆាំងគ្រឿងញៀននាពេលកន្លងមក ដោយបានចូលរួមសហការបង្ការ បង្ក្រាបបទល្មើសគ្រឿងញៀនឆ្លងកាត់អាកាសយានដ្ឋានរក្សាបាននូវបរិស្ថានល្អក្នុងវិស័យអាកាសចរណ៍កម្ពុជា ។ ឯកឧត្តម នាយឧត្តមសេនីយ៍ក៏បានសំណូមពរដល់អ្នកពាក់ព័ន្ធនៃវិស័យអាកាសចរណ៍ សូមបន្តចូលរួមប្រយុទ្ធប្រឆាំងគ្រឿងញៀនឆ្លងកាត់អាកាសយានដ្ឋាន ដោយត្រូវរូមគ្នាប្រើប្រាស់ App NoDrug ពង្រឹងសមត្ថភាពបង្ការទប់ស្កាត់លំហូរគ្រឿងញៀនឆ្លងកាត់អាកាសយានដ្ឋាន ។ ឯកឧត្តម នាយឧត្តមសេនីយ៍បានបន្ថែមថា៖ «យើងបានគិតគូរនូវបញ្ហាមួយចំនួនមានជាអាទិ៍ការគិតគូរបំពេញបន្ថែមនូវឧបករណ៍សម្ភារៈទំនើបសម្រាប់ត្រួតពិនិត្យគ្រឿងញៀន ភាពស្អាតស្អំរបស់មន្ត្រីរួមទាំងគ្មានវត្តមានគ្រឿងញៀន ពង្រឹងសមត្ថភាពមន្រ្តីក្នុងការត្រួតពិនិត្យបទល្មើសគ្រឿងញៀនឆ្លងកាត់អាកាសយានដ្ឋានដែលកន្លងមក យើងបង្ក្រាបបាននូវករណីចរាចរគ្រឿងញៀនដោយលេបចូលក្នុងពោះជាដើម។ល។»៕

ដោយ៖ រិទ្ធី, ប្រភព៖ អាជ្ញាធរជាតិប្រយុទ្ធប្រឆាំងគ្រឿងញៀន