AKP កណ្តាល ថ្ងៃទី២២ ខែសីហា ឆ្នាំ២០២៦--រដ្ឋបាលខេត្តកណ្តាល និងសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) នៅថ្ងៃទី២១ ខែសីហា ឆ្នាំ២០២៦ បានរៀបចំសិក្ខាសាលាស្តីពី ការត្រៀមខ្លួនទទួលបានហិរញ្ញប្បទានដើម្បីអភិវឌ្ឍន៍អាជីវកម្មសម្រាប់វិស័យ MSMEs តាមបែបឌីជីថល ក្រោមអធិបតីភាព លផក ប៊ុន ផេង អភិបាលរងខេត្តកណ្តាល និងលោកឧកញ៉ា តែ តាំងប៉ ប្រធានក្រុមប្រឹក្សាភិបាល នៃសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ។ 
មានប្រសាសន៍ក្នុងសិក្ខាសាលានេះ លោក ប៊ុន ផេង អភិបាលរងខេត្តកណ្តាល បានបញ្ជាក់ថា ខេត្តកណ្តាល មានសហគ្រាសធុនតូច-មធ្យម និងសិប្បកម្ម ដែលសុំប្រកាសពីក្រសួង ប្រកាសបង្កើតថ្មី ចំនួន ០៦មូលដ្ឋាន សុំវិញ្ញាបនបត្រដំណើរការថ្មីចំនួន ០៥មូលដ្ឋាន និងឈប់ដំណើរការចំនួន ០១មូលដ្ឋាន។ ក្នុងឆមាសទី១ ឆ្នាំ២០២៦ សហគ្រាសធុនតូច-មធ្យម និងសិប្បកម្ម ចុះបញ្ជីបង្កើតថ្មីចំនួន ៨០មូលដ្ឋាន សុំវិញ្ញាបនបត្រដំណើរការថ្មីចំនួន ៨០មូលដ្ឋាន បន្តវិញ្ញាបនបត្រដំណើរការចំនួន ១៣៧មូលដ្ឋាន សុំលិខិត អនុញ្ញាតិផ្សេងៗចំនួន ១១មូលដ្ឋាន និងឈប់ដំណើរការចំនួន ៨០មូលដ្ឋាន។ក្នុងនោះសហគ្រាសធុនតូច-មធ្យម និងសិប្បកម្មសរុបចំនួន ១ ៣៦៧ មូលដ្ឋាន ទុនអចល័តចំនួន ៦៥ ៣៣៨ ៧៨០ (ហុកសិបប្រាំលាន បីរយ សាមសិបប្រាំបីពាន់ ប្រាំពីររយប៉ែតសិប ដុល្លារអាមេរិក ទុនសរុបចំនួន ៨៥ ១៨២ ៣៤៦) ប៉ែតសិបប្រាំលាន មួយរយប៉ែតសិបពីរពាន់ បីរយសែសិបប្រាំមួយ ដុល្លារអាមេរិក។ 

ការទទួលបានហិរញ្ញប្បទាននៅតែជាកត្តាសំខាន់មួយសម្រាប់ការពង្រីក និងលើកកម្ពស់ អាជីវកម្ម។ ដើម្បីទទួលបានហិរញ្ញប្បទានប្រកបដោយប្រសិទ្ធភាព ម្ចាស់អាជីវកម្មមិនត្រឹមតែត្រូវការគំនិត អាជីវកម្មល្អប៉ុណ្ណោះទេ ប៉ុន្តែត្រូវមានការរៀបចំអាជីវកម្មឱ្យបានត្រឹមត្រូវ មានកំណត់ត្រាចំណូល-ចំណាយ មានផែនការអាជីវកម្មច្បាស់លាស់ មានព័ត៌មានហិរញ្ញវត្ថុដែលអាចទុកចិត្តបាន និងមានសមត្ថភាពបង្ហាញ ពីសក្តានុពលនៃអាជីវកម្មរបស់ខ្លួន។ ក្នុងបរិបទបច្ចុប្បន្ន បច្ចេកវិទ្យាឌីជីថលបានក្លាយជាឧបករណ៍ដ៏មានសារៈសំខាន់សម្រាប់ អាជីវកម្ម។ ការប្រើប្រាស់ប្រព័ន្ធឌីជីថល អាចជួយឱ្យសហគ្រាសគ្រប់គ្រងគណនេយ្យ និងហិរញ្ញវត្ថុបាន កាន់តែមានប្រសិទ្ធភាព កត់ត្រាទិន្នន័យអាជីវកម្មបានច្បាស់លាស់ ពង្រីកទីផ្សារតាមប្រព័ន្ធអនឡាញ ទំនាក់ទំនងជាមួយអតិថិជនបានកាន់តែទូលំទូលាយ និងបង្កើនភាពងាយស្រួលក្នុងការទទួលបានសេវាហិរញ្ញវត្ថុ។ ហេតុនេះ ការត្រៀមខ្លួនរបស់ម្ចាស់សហគ្រាស គួរតែផ្តោតលើការកែលម្អទាំងសមត្ថភាពគ្រប់គ្រង ការរៀបចំឯកសារអាជីវកម្ម ការគ្រប់គ្រងទិន្នន័យ និងការប្រើប្រាស់បច្ចេកវិទ្យាឌីជីថល ដើម្បីធ្វើឱ្យអាជីវកម្មមាន ភាពជឿទុកចិត្ត មានតម្លាភាព និងមានសមត្ថភាពប្រកួតប្រជែងកាន់តែខ្ពស់។ 

ថ្លែងក្នុងឱកាសនោះ លោកឧកញ៉ា តែ តាំងប៉ ប្រធានក្រុមប្រឹក្សាភិបាល FASMEC បានគូសបញ្ជាក់ថា សហគ្រាសធុនមីក្រូ តូច និងមធ្យម ត្រូវការជាចាំបាច់នូវចំណេះដឹងថ្មីៗ និងធនធានហិរញ្ញវត្ថុ ដើម្បីជំរុញការរីកលូតលាស់របស់អាជីវកម្ម ពង្រឹងសមត្ថភាពប្រកួតប្រជែង និងចូលរួមចំណែកដល់ការអភិវឌ្ឍសេដ្ឋកិច្ចជាតិ។ លោកឧកញ៉ា ក៏បានថ្លែងអំណរគុណដល់រដ្ឋបាលខេត្តកណ្តាល និងអ្នកពាក់ព័ន្ធដែលបានចូលរួម និងគាំទ្រដល់កម្មវិធីនេះ និងបានថ្លែងអំណរគុណដល់ដៃគូសហការ ដែលបានចូលរួមគាំទ្រ និងរួមចំណែកធ្វើឱ្យសិក្ខាសាលានេះប្រព្រឹត្តទៅដោយជោគជ័យ។សិក្ខាសាលានេះ បានក្លាយជាវេទិកាដ៏សំខាន់មួយសម្រាប់ការផ្លាស់ប្តូរចំណេះដឹង បទពិសោធន៍ និងការភ្ជាប់ទំនាក់ទំនងរវាងស្ថាប័នរដ្ឋ វិស័យហិរញ្ញវត្ថុ និងម្ចាស់សហគ្រាស ដើម្បីរួមគ្នាជំរុញការទទួលបានហិរញ្ញប្បទាន ការធ្វើបរិវត្តកម្មឌីជីថល និងការអភិវឌ្ឍវិស័យ MSMEs នៅកម្ពុជាឱ្យកាន់តែរឹងមាំ និងមានចីរភាព ។

សូមបញ្ជាក់ដែរថា សិក្ខាសាលានេះ មានគោលបំណងសំខាន់ក្នុងការពង្រឹងសមត្ថភាពសហគ្រាសធុនមីក្រូតូច និងមធ្យម (MSMEs) ឱ្យមានការយល់ដឹងកាន់តែច្បាស់អំពីនីតិវិធីនៃការទទួលបានប្រាក់កម្ចី និងហិរញ្ញប្បទានពីធនាគារដៃគូ ព្រមទាំងការប្រើប្រាស់ប្រព័ន្ធឌីជីថល ដើម្បីគាំទ្រ និងពង្រីកអាជីវកម្មឱ្យកាន់តែមានប្រសិទ្ធភាព និងផ្តល់ចំណេះដឹងជាក់ស្តែងដល់ម្ចាស់សហគ្រាស ក្នុងការត្រៀមខ្លួនសម្រាប់ទីផ្សារក្នុងស្រុក និងការនាំចេញ ព្រមទាំងបង្កើនការយល់ដឹងអំពីបទប្បញ្ញត្តិ និងច្បាប់ពាក់ព័ន្ធនានា ៕

ដោយ ណយ នឿន (ប្រភព៖រដ្ឋបាលខេត្តកណ្តាល)