AKP ព្រះវិហារ ថ្ងៃទី២២ ខែសីហា ឆ្នាំ២០២៦----

មន្ទីរសុខាភិបាលខេត្តព្រះវិហារ សហ ការជាមួយរដ្ឋបាលស្រុកជាំក្សាន្ត នៅថ្ងៃសុក្រទី២១ ខែសីហា ឆ្នាំ២០២៦ រៀបចំពិធីបើកយុទ្ធនាការប្រយុទ្ធប្រឆាំងនឹងជំងឺគ្រុនឈាម ក្រោមប្រធានបទ « ផ្ទះខ្ញុំ គ្រួសារខ្ញុំ ជាគ្រួសារគំរូ ព្រោះផ្ទះខ្ញុំ និងលំនៅឋានខ្ញុំ គ្មានដង្កូវទឹក គ្មានមូសខ្លា គ្មានជំងឺគ្រុនឈាម »។

ពិធីនេះមានការអញ្ជើញចូលរួមពីលោកជំទាវ ប៉ាង រ៉ាវី អភិបាលរងខេត្តព្រះវិហារ លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ លោក ចិន ខន្តី អភិបាលស្រុកជាំក្សាន្ត ព្រមទាំងមន្ត្រីរាជការ រដ្ឋបាលឃុំទាំង៨ លោកគ្រូ អ្នកគ្រូ អង្គការដៃគូអភិវឌ្ឍន៍ កម្លាំងប្រជាការពារភូមិ សិស្សានុសិស្ស និងប្រជាពលរដ្ឋ ជាច្រើនរូបទៀត។

លោកជំទាវ ប៉ាង រ៉ាវី មានប្រសាសន៍ថា ការប្រយុទ្ធប្រឆាំងជំងឺគ្រុនឈាម មានគោលបំណងលើកកម្ពស់ការយល់ដឹង និងជំរុញឧ្យមានការចូលរួមរបស់ប្រជាពលរដ្ឋក្នុងការបង្ការ និងទប់ស្កាត់ជំងឺគ្រុនឈាមនៅតាមសហគមន៍
មិនមែនជាកាតព្វកិច្ចរបស់មន្ត្រីសុខាភិបាល ឬអាជ្ញាធរមូលដ្ឋានតែមួយមុខនោះទេ ប៉ុន្តែត្រូវការការចូលរួមពីគ្រប់ក្រុមគ្រួសារ និងប្រជាពលរដ្ឋគ្រប់រូប ព្រោះការការពារដ៏មានប្រសិទ្ធភាពបំផុត គឺការចាប់ផ្តើមពីផ្ទះ និងលំនៅឋានរបស់ខ្លួន។

លោកជំទាវក្នុងនាមឯកឧត្តមអភិបាល ខេត្តព្រះវិហារ បានថ្លែងអំពាវនាវដល់ប្រជាពលរដ្ឋ ឱ្យបន្តយកចិត្តទុកដាក់សម្អាតបរិវេណជុំវិញផ្ទះ កម្ចាត់ប្រភពទឹកដក់ និងវត្ថុផ្សេងៗដែលអាចក្លាយជាកន្លែងដាក់ពងរបស់មូស ព្រមទាំងចូលរួមអនុវត្តវិធានការការពារជំងឺគ្រុនឈាមជាប្រចាំ។ ប្រសិនបើគ្រប់គ្រួសារអាចធានាថា «ផ្ទះខ្ញុំ គ្មានដង្កូវទឹក គ្មានមូសខ្លា» នោះការកាត់បន្ថយជំងឺគ្រុនឈាមនៅក្នុងសហគមន៍ក៏នឹងកាន់តែមានប្រសិទ្ធភាព ៕

ដោយ៖ ទិត ស្រ៊