AKP តាកែវ ថ្ងៃទី២១ ខែសីហា ឆ្នាំ២០២៦--រដ្ឋបាលខេត្តតាកែវបានរៀបចំពិធីប្រកាសចូលកាន់មុខតំណែង ប្រធានទីស្នាក់ការត្រួតពិនិត្យច្រកទ្វារអន្តរជាតិភ្នំដិន ដោយលោក ព្រំ ប៊ុនថន ត្រូវបានប្រកាសតែងតាំងជាប្រធានទីស្នាក់ការត្រួតពិនិត្យច្រកទ្វារអន្តរជាតិភ្នំដិនថ្មី ជំនួសលោក នួន សារ៉ែន ដែលត្រូវបានផ្ទេរភារកិច្ច ឱ្យទៅបំពេញការងារនៅអង្គភាពដើម នៅក្នុងរដ្ឋបាលខេត្តតាកែវ។

អញ្ជើញជាអធិបតីក្នុងពិធីនោះ ដោយ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ ព្រមទាំងមានការអញ្ជើញចូលរួម ពីលោកអភិបាលរងខេត្តតាកែវ ប្រធាន អនុប្រធានមន្ទីរអង្គភាពជុំវិញខេត្ត អភិបាលក្រុង-ស្រុក មន្ត្រីរាជការ កងកម្លាំងប្រដាប់អាវុធទាំង៣ប្រភេទ និងអាជ្ញាធរមូលដ្ឋានស្រុក-ឃុំចូលរួមផងដែរ។ពិធីនេះរៀបចំឡើងនៅទីស្នាក់ការច្រកទ្វារព្រំដែនអន្តរជាតិភ្នំដិន កាលពីព្រឹកទី២០ ខែសីហា ឆ្នាំ២០២៦។

មានប្រសាសន៍សំណេះសំណាលក្នុងពិធីនោះ ឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ បានធ្វើការណែនាំដល់ប្រធានស្នាក់ការច្រកទ្វារអន្តរជាតិភ្នំដិនថ្មី ត្រូវតែសហការគ្នាជាមួយនឹងកងកម្លាំងប្រដាប់អាវុធ ដែលឈរជើងតាមបណ្តោយព្រំដែន ត្រូវទប់ស្កាត់ និងបង្រ្កាបបទល្មើសទំនិញគេចពន្ធឆ្លងដែន ជាពិសេសបទល្មើសជួញដូរមនុស្ស ជួញដូរអាវុធខុសច្បាប់គ្រប់ប្រភេទ។     

ឯកឧត្តម វ៉ី សំណាង បានមានប្រសាសន៍បន្តថា មន្ត្រីប្រចាំការទាំងអស់ ត្រូវរួមសហការគ្នាយ៉ាងម៉ឺងម៉ាត់ ជាមួយកងកម្លាំងប្រដាប់អាវុធ និងអាជ្ញាធរពាក់ព័ន្ធ ដើម្បីបង្ក្រាបបទល្មើសឆ្លងដែនគ្រប់ប្រភេទ ជាពិសេសគឺការទប់ស្កាត់ឱ្យបាន នូវរាល់សកម្មភាពនាំចូលទំនិញគេចពន្ធ ដែលនាំឱ្យបាត់បង់ចំណូលថវិកាជាតិ។

ឯកឧត្តមអភិបាលខេត្តតាកែវក៏បានធ្វើការវាយតម្លៃខ្ពស់ចំពោះលទ្ធផលការងារកន្លងមក ដែលប្រធានទីស្នាក់ការចាស់លោក នួន សារ៉ែន អនុវត្តការងារបានយ៉ាងល្អប្រសើរ និងបានណែនាំដល់លោកប្រធានទីស្នាក់ការថ្មី ដែលទើបទទួលការតែងតាំងនៅថ្ងៃនេះ ត្រូវបន្កការងារដឹកនាំច្រកទ្វាអន្តរជាតិនេះ ឱ្យបានល្អប្រសើរ។ដោយត្រូវមានសាមគ្គីភាពផ្ទៃក្នុង និងចេះសម្របសម្រួលបែងចែកភារកិច្ច តួនាទីទទួលខុសត្រូវឱ្យបានល្អ។ហើយត្រូវបន្តសហការជាមួយភាគីប្រទេសវៀតណាម ដើម្បីធ្វើយ៉ាងណាឱ្យការឆ្លងកាត់របស់ភ្ញៀវទេសចរជាតិ និងអន្តរជាតិ ជាពិសេសការដឹកទំនិញចេញចូលតាមច្រកទ្វារ បានប្រព្រឹត្តទៅយ៉ាងល្អប្រសើរ។

ឯកឧត្តម វ៉ី សំណាង បានមានប្រសាសន៍បន្ថែមថា ប្រធានទីស្នាក់ការដែលទើបតែងតាំងថ្មីត្រូវចូលរួមសហការពង្រឹងសាមគ្គីភាពឯកភាពផ្ទៃក្នុង និងពង្រឹងរបៀបរបបការងារ ត្រូវមានទំនាក់ទំនងការងារឱ្យបានល្អ នៅក្នុងអង្គភាពរបស់ខ្លួន ដោយឈរលើមូលដ្ឋាននៃការលើកកម្ពស់ប្រសិទ្ធភាព និងធានានិរន្តរភាពការងាររបស់ខ្លួន ឱ្យកាន់តែមានភាពល្អប្រសើរ៕     

តាកែវ អ៊ុច សៀង