AKP ភ្នំពេញ ថ្ងៃទី២០ ខែសីហា ឆ្នាំ២០២៦-- លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា អនុញ្ញាតក្រុមនិស្សិតជ័យលាភីអារូបករណ៍រដ្ឋាភិបាលសាធារណរដ្ឋឆែកឆ្នាំ២០២៦ ចំនួន១៨នាក់ ចូលជួបសម្តែងការគួរសម និងទទួលអនុសាសន៍ នៅទីស្នាក់ការកណ្តាលកាកបាទក្រហមកម្ពុជា នាថ្ងៃទី២០ ខែសិហា ឆ្នាំ២០២៦នេះ។

ក្នុងជំនួបនាឱកាសនោះ លោកជំទាវអគ្គលេខាធិការបាននាំយកនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនដល់និស្សិតជ័យលាភីទាំង១៨រូប។ ជាមួយគ្នានេះលោកជំទាវអគ្គលេខាធិកាបានជម្រាបជូនអំពីសកម្មភាពរបស់កាកបាទក្រហមកម្ពុជានូវវិស័យអាទិភាពនីមួយៗ ស្របទៅយុទ្ធសាស្ត្រ ២០២១-២០៣០ របស់កាកបាទក្រហមកម្ពុជា។

លោកជំទាវបានផ្តល់អនុសាសន៍ដល់និស្សិតជ័យលាភីអារូបករណ៍ទាំងអស់ ក្នុងពេលដែលបំពេញការសិក្សានៅសាធារណរដ្ឋឆែក សូមមានសុខសុវត្ថិភាពនិងទទួលបានជោគជ័យ ព្រមទាំងនាំមកវិញនូវចំណេះដឹងនិងជំនាញដែលទទួលបាន មកអភិវឌ្ឍប្រទេសជាតិយើងឱ្យមានការរីកចម្រើនជាបន្តបន្ទាប់។

តំណាងនិស្សិតជ័យលាភីអារូបករណ៍រទាំង១៨រូប បានគោរពថ្លែងអំណរគុណជ្រៅចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានអនុញ្ញាតឱ្យក្រុមជ័យលាភីទាំងអស់បានចូលជួបសម្តែងការគួរសមនាឱកាសនេះ។ ក្នុងឱកាសនោះ ក៏សូមគោរពថ្លែងអំណរគុណចំពោះលោកជំទាវអគ្គលេខាធិការ ដែលបានចំណាយពេលវេលាដ៏មានតម្លៃ ផ្តល់នូវមតិសំណេះសំណាល ព្រមទាំងផ្តល់អនុសាសន៍ណែនាំតម្រង់ទិសប្រកបដោយអត្ថន័យដ៏ថ្លៃថ្លាដល់ក្រុមនិស្សិតជ័យលាភីទាំងអស់ ដើម្បីទទួលបាននូវពុទ្ធិដ៏មានសារសំខាន់បន្ថែមទៀតក្នុងការត្រៀមខ្លួនទៅបន្តការសិក្សាប្រកបដោយជោគជ័យ។

និស្សិតជ័យលាភីអាហារូបករណ៍រទាំង១៨រូបបានប្តេជ្ញាចិត្តយ៉ាងមុតមាំថានឹងខិតខំប្រឹងប្រែងសិក្សារៀនសូត្រ ប្រកបដោយវិន័យ និងទទួលយកចំណេះដឹង ជំនាញ ឱ្យបានជ្រៅជ្រះ ដើម្បីត្រឡប់មកបម្រើជាតិមាតុភូមិវិញឱ្យស័ក្តិសម ជាយុវជនបន្តវេនជំនាន់ក្រោយ និងដើម្បីក្លាយខ្លួនជាសសរទ្រូងដ៏រឹងមាំរបស់ប្រទេសជាតិ។

សូមជម្រាបថា ក្រុមនិស្សិតជ័យលាភីរដ្ឋាភិបាលសាធារណៈរដ្ឋឆែកឆ្នាំ២០២៦ មានសមាជិកសរុប១៨រូប ស្ត្រីចំនួន៧រូប ក្នុងនោះ ថ្នាក់បណ្ឌិតចំនួន ៥រូប ស្ត្រី ២រូប និងថ្នាក់បរិញ្ញាបត្រជាន់ខ្ពស់ចំនួន១៣រូប ស្ត្រីចំនួន ៥រូប។ និស្សិតជយលាភីនីមួយៗ មានសមាសភាពជាមន្ត្រីរាជការក្រសួង-ស្ថាប័នរដ្ឋ បុគ្គលិកក្រុមហ៊ុនឯកជន និងមន្ត្រីអង្គការក្រៅរដ្ឋាភិបាល ដែលនឹងត្រៀមខ្លួនទៅបន្តការសិក្សានៅសាធារណរដ្ឋឆែក នាដើមខែកញ្ញាខាងមុខនេះ។

គួររំលឹកដែរថា ចាប់តាំងពីឆ្នាំ១៩៨១ មក អាហារូបករណ៍រដ្ឋាភិបាលសាធារណរដ្ឋឆែកបានគាំទ្រដល់និស្សិតកម្ពុជាប្រមាណជាង ៤០០នាក់ ទៅសិក្សាលើជំនាញសំខាន់ៗរួមមាន៖ វិស្វកម្ម, កសិកម្ម, វិទ្យាសាស្ត្របរិស្ថាន, វិទ្យាសាស្ត្រកុំព្យូទ័រ, សេដ្ឋកិច្ច-ហិរញ្ញវត្ថុ សុខាភិបាល និងស្ថាបត្យកម្ម ជាដើម៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)