AKP ភ្នំពេញ ថ្ងៃទី២០ ខែសីហា ឆ្នាំ២០២៦ -- មន្ត្រីចិនបាននិយាយកាលពីពេលថ្មីៗនេះថា ទីក្រុងសៀងហៃបានចេញផ្សាយផែនការប្រាំឆ្នាំដ៏ទូលំទូលាយលើកដំបូងរបស់ខ្លួន ដែលមានគោលបំណងផ្លាស់ប្តូរទីក្រុងនេះទៅជាគំរូនៃទីក្រុងសុវត្ថិភាព និងភាពធន់ ដោយមានគោលដៅសម្រាប់ចំណាត់ថ្នាក់ក្នុងចំណោមទីក្រុងដែលមានសុវត្ថិភាពបំផុតរបស់ពិភពលោកនៅត្រឹមឆ្នាំ២០៣០។

លោក ចាង ឡី អគ្គលេខាធិការរងនៃរដ្ឋាភិបាលក្រុង និងជានាយកមជ្ឈមណ្ឌលគ្រប់គ្រងប្រតិបត្តិការទីក្រុងសៀងហៃ បាននិយាយថា «ការកសាងទីក្រុងដែលមានភាពធន់ និងមានសុវត្ថិភាព មិនត្រឹមតែជាតម្រូវការដើមសម្រាប់ការអភិវឌ្ឍទីក្រុងប៉ុណ្ណោះទេ ប៉ុន្តែវាក៏ទាក់ទងនឹងផលប្រយោជន៍សំខាន់ៗរបស់ប្រជាពលរដ្ឋគ្រប់រូបផងដែរ»។

ក្នុងរយៈពេលផែនការប្រាំឆ្នាំលើកទី១៥ (ឆ្នាំ២០២៦-២០៣០) គំរូនេះបង្កើតក្របខ័ណ្ឌមួយដែលផ្តោតលើសសរស្តម្ភយុទ្ធសាស្ត្រចំនួនប្រាំមួយ ដែលរួមមាន សមត្ថភាពលំហ ភាពធន់នៃហេដ្ឋារចនាសម្ព័ន្ធ កិច្ចសហការសហគមន៍ក្នុងការគ្រប់គ្រង ការបង្ការហានិភ័យ ការឆ្លើយតបក្នុងគ្រាអាសន្ននិងការរួមបញ្ចូលបច្ចេកវិទ្យា។

ផែនការនេះអំពាវនាវឱ្យមានការធ្វើឱ្យប្រសើរឡើងនូវប្លង់លំហសន្តិសុខរបស់ទីក្រុង និងការធ្វើឱ្យប្រសើរឡើងនូវហេដ្ឋារចនាសម្ព័ន្ធ រួមទាំងបណ្តាញអគ្គិសនី និងប្រព័ន្ធបង្ហូរទឹក។

ទីក្រុងសៀងហៃក៏មានគម្រោងពង្រីកកន្លែងសាធារណៈ «ប្រើប្រាស់បានពីរ» ផងដែរ ដែលជាកន្លែងស៊ីវិលប្រចាំថ្ងៃដែលអាចប្តូរទៅជាជម្រកសង្គ្រោះបន្ទាន់ ឬមជ្ឈមណ្ឌលផ្គត់ផ្គង់យ៉ាងឆាប់រហ័សនៅក្នុងគ្រាមានវិបត្តិ។

ដើម្បីពង្រឹងភាពធន់ក្នុងសង្គម ទីក្រុងនេះនឹងពង្រីកបណ្តាញសុវត្ថិភាពថ្នាក់សង្កាត់ លើកទឹកចិត្តដល់ការរាយការណ៍ជាសាធារណៈអំពីគ្រោះថ្នាក់និងធ្វើឱ្យយន្តការផ្តល់ជំនួយសង្គ្រោះបន្ទាន់មានភាពប្រសើរឡើង។ វាក៏នឹងធ្វើឱ្យការសម្របសម្រួលឆ្លងតំបន់កាន់តែស៊ីជម្រៅនៅក្នុងតំបន់ដីសណ្តទន្លេយ៉ាងសេ តាមរយៈការរួមបញ្ចូលការអនុវត្តច្បាប់រួមគ្នា ការគ្រប់គ្រងជំងឺ និងកិច្ចខិតខំប្រឹងប្រែងគ្រប់គ្រងគ្រោះមហន្តរាយផងដែរ។

ផែនការនេះសង្កត់ធ្ងន់ទៅលើការផ្លាស់ប្តូរពីការឆ្លើយតបវិបត្តិដោយប្រតិកម្មទៅជាការបង្ការជាមុន តាមរយៈការគ្រប់គ្រងហានិភ័យពីដើមដល់ចប់ ការឆ្លើយតបក្នុងគ្រាអាសន្នភ្លាមៗ ក៏ដូចជាដំណោះស្រាយដែលជំរុញដោយបច្ចេកវិទ្យា។ គំនិតផ្តួចផ្តើមនេះបង្កើតឡើងដោយផ្អែកលើវឌ្ឍនភាពជាលំដាប់ដែលបានធ្វើឡើងក្នុងរយៈពេលប្រាំឆ្នាំកន្លងមក។

យោងតាមលោក ចាង បានឱ្យដឹងថា ទីក្រុងសៀងហៃបានពង្រឹងការត្រៀមខ្លួនជាប្រព័ន្ធដើម្បីកាត់បន្ថយគ្រោះមហន្តរាយធម្មជាតិ លើកកម្ពស់ស្តង់ដារសុវត្ថិភាពកន្លែងធ្វើការ បង្កើនការឃ្លាំមើលសុខភាពសាធារណៈ និងពង្រីកបណ្តាញបង្ការឧក្រិដ្ឋកម្ម ដោយសម្រេចបានការកើនឡើង ១៣ឆ្នាំជាប់ៗគ្នានៃចំណាត់ថ្នាក់សុវត្ថិភាពសាធារណៈ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)