AKP បន្ទាយមានជ័យ ថ្ងៃទី២០ ខែសីហា ឆ្នាំ២០២៦-- សុខទុក្ខរបស់អតីតយុទ្ធជន និងក្រុមគ្រួសារ គឺជាអាទិភាពខ្ពស់បំផុតដែលរាជរដ្ឋាភិបាល ក៏ដូចជាអាជ្ញាធរមូលដ្ឋានតែងតែយកចិត្តទុកដាក់ខ្ពស់។ ជាក់ស្ដែងនៅរសៀលថ្ងៃទី១៩ ខែសីហា ឆ្នាំ២០២៦ ឯកឧត្តម អ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ និងជាប្រធានសមាគមអតីតយុទ្ធជន និងនិវត្តជនកម្ពុជាខេត្ត បានអមដំណើរដោយលោក ហ៊ឹល រ៉ាយ៉ា អភិបាលរងខេត្ត រួមទាំងក្រុមការងារសមាគមខេត្ត ស្រុក និងឃុំ-សង្កាត់ បានចុះផ្ទាល់ដើម្បីនាំយកថវិការបស់សមាគមខេត្ត ចូលរួមបុណ្យសពអតីតយុទ្ធជន និងនិវត្តជនចំនួន ៥សព ស្ថិតក្នុងក្រុង-ស្រុកចំនួន៣ គឺ ស្រុកអូរជ្រៅ ស្រុកស្វាយចេក និងក្រុងសិរីសោភ័ណ។

ឯកឧត្តម អ៊ុំ រាត្រី និងក្រុមការងារ បានអញ្ជើញចុះដល់ទីតាំងបុណ្យសពនីមួយៗ ដើម្បីបង្ហាញពីសាមគ្គីភាព និងការចូលរួមរំលែកទុក្ខដ៏ក្រៀមក្រំជាមួយក្រុមគ្រួសារនៃសព។ ថវិកាឧបត្ថម្ភរបស់សមាគមខេត្តត្រូវបានប្រគល់ជូនដល់ដៃគ្រួសារសព ដើម្បីជួយសម្រាលបន្ទុកផ្នែកហិរញ្ញវត្ថុក្នុងពិធីបុណ្យ និងបង្ហាញថាអតីតយុទ្ធជនមិនដែលត្រូវបានបំភ្លេចឡើយ។

ក្នុងឱកាសដ៏ក្រៀមក្រំនោះ ឯកឧត្ដម អ៊ុំ រាត្រី បានពាំនាំនូវប្រសាសន៍ផ្តាំផ្ញើសាកសួរសុខទុក្ខដោយក្តីអាល័យ និងក្តីនឹករលឹកពីសំណាក់ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជន និងនិវត្តជនកម្ពុជា។ "សម្តេចតេជោ ជានិច្ចកាលតែងតែយកចិត្តទុកដាក់ខ្ពស់បំផុតដល់សុខទុក្ខ និងជីវភាពរស់នៅរបស់បងប្អូនប្រជាពលរដ្ឋ ជាពិសេសអតីតយុទ្ធជន និងនិវត្តជន ក្រោមស្មារតីមិនទុកអ្នកណាម្នាក់ចោលឡើយ។"

សកម្មភាពនេះគឺជាការបញ្ជាក់បន្ថែមពីការប្តេជ្ញាចិត្តរបស់ថ្នាក់ដឹកនាំគ្រប់ជាន់ថ្នាក់ ក្នុងការបន្តឈរនៅលើការជួយ និងផ្តល់ការគាំទ្រយ៉ាងសកម្មដល់គ្រួសារអតីតយុទ្ធជនគ្រប់កាលៈទេសៈ ទាំងពេលមានសុខសប្បាយ និងពេលមានទុក្ខលំបាក៕

ដោយ ឈុន សារ៉ាត