AKP ភ្នំពេញ ថ្ងៃទី១៨ ខែសីហា ឆ្នាំ២០២៦-- ឯកឧត្តម លី ធុជ បានបញ្ជាក់ថា យុវជនគឺ ជាកម្លាំងសំខាន់សម្រាប់អនាគតជាតិ និងជាអ្នកចូលរួមសំខាន់ក្នុងការកសាងសេដ្ឋកិច្ចសង្គម ការពារសន្តិភាព និងអធិបតេយ្យភាពជាតិ តាមរយៈការចូលរួមក្នុងជីវភាពប្រជាធិបតេយ្យ និងការបោះឆ្នោត។ ហើយត្រូវបន្តចូលរួម និងធ្វើឱ្យយុវជនចូលរួមក្នុងសកម្មភាពសាធារណៈ សង្គម វប្បធម៌ និងនយោបាយ ព្រមទាំងក្នុងព្រឹត្តិការណ៍ និងកិច្ចប្រជុំនានា ដើម្បីពង្រឹងស្មារតីសកម្ម និងការទទួល ខុសត្រូវ ចំពោះសង្គម ។

ឯកឧត្តមបណ្ឌិត លី ធុជ សមាជិក គណៈកម្មាធិការកណ្តាល និង ជាប្រធានក្រុមការងារគណបក្សចុះមូលដ្ឋានក្រុងបាវិត ខេត្តស្វាយរៀង បានបញ្ជាក់បែបនេះ នៅក្នុងកិច្ចប្រជុំត្រួតពិនិត្យវឌ្ឍនភាពការងារ និងការត្រៀមការបោះឆ្នោតជ្រើសរើសក្រុមប្រឹក្សាសង្កាត់ អាណត្តិទី៦ ឆ្នាំ២០២៧ ព្រមទាំងចែកប័ណ្ណសម្គាល់សមាជិកគណបក្សប្រជាជនកម្ពុជាផងដែរ។ កិច្ចប្រជុំផ្តោតលើការពង្រឹងការរៀបចំកម្លាំង និងអនុវត្តផែនការឱ្យមានប្រសិទ្ធភាព ដើម្បីធានាការបោះឆ្នោតប្រកបដោយសណ្តាប់ធ្នាប់ និងការចូលរួមទូលំទូលាយពីប្រជាពលរដ្ឋ ដែលប្រព្រឹត្ដទៅកាលពីថ្ងៃទី១៨ ខែសីហា ឆ្នាំ២០២៦ ។

ឯកឧត្តមបណ្ឌិតបានណែនាំ ដល់មន្ត្រី និងក្រុមការងារគណបក្សប្រជាជនកម្ពុជានៅក្រុងបាវិតឱ្យបន្តយកចិត្តទុកដាក់លើការបម្រើប្រជាពលរដ្ឋ និងការពង្រឹងសុវត្ថិភាព សន្តិសុខ និងសណ្តាប់ធ្នាប់សាធារណៈនៅគ្រប់សហគមន៍ កន្លែងសាធារណៈ និងតាមសាលារៀន។ ជាមួយគ្នានេះ ត្រូវបំពេញការងារ និងកាតព្វកិច្ចដោយសុជីវធម៌ ការគោរព សុភាពរាបសារ និងសុចរិតភាព ព្រមទាំងកាត់បន្ថយ និងបញ្ឈប់រាល់ឧបសគ្គរដ្ឋបាល ការពន្យាពេល និងការចំណាយមិនចាំបាច់ក្នុងការផ្តល់សេវាសាធារណៈជូនប្រជាពលរដ្ឋ។

ឯកឧត្តមបណ្ឌិតក៏បានជំរុញឱ្យបន្តនាំមកនូវការអភិវឌ្ឍន៍នៅមូលដ្ឋាន ពង្រឹងការគាំទ្រសហគមន៍ និងផ្តល់ជំនួយដល់គ្រួសារងាយរងគ្រោះបំផុត ដោយផ្តោតលើការបម្រើផលប្រយោជន៍ប្រជាជនជាចម្បង។

ឯកឧត្តមបណ្ឌិត លី ធុជ បានបញ្ជាក់ថា ការត្រៀមខ្លួនសម្រាប់ការបោះឆ្នោតឆ្នាំ២០២៧ គួរភ្ជាប់ជាមួយការបម្រើប្រជាពលរដ្ឋឱ្យបានល្អ ការពង្រឹងភាពជឿទុកចិត្តនៅមូលដ្ឋាន និងការបង្កើនការចូលរួមរបស់យុវជន។
យុវជនមានកម្លាំងបោះឆ្នោតមានការចូលរួម ប្រជាជនទទួលបានសេវាល្អ និងប្រទេសជាតិមានអនាគត គឺជាស្មារតីដែលត្រូវបន្តជំរុញឱ្យយុវជន និងសមាជិកគណបក្សទាំងអស់ រួមគ្នាកសាងសហគមន៍ឱ្យកាន់តែមានសុវត្ថិភាព រីកចម្រើន ថែរក្សាសន្តិភាព និងចូលរួមការពារមាតុភូមិ និងប្រជាជនកម្ពុជា ៕ 

ដោយ សួស សំរិត