AKP ភ្នំពេញ ថ្ងៃទី១៨ ខែសីហា ឆ្នាំ២០២៦—មជ្ឈមណ្ឌលអន្តេវាសិកនិស្សិតនារី នៃក្រសួងអប់រំ យុវជន និងកីឡា ដែលមានទីតាំងស្ថិតនៅជាប់វិទ្យាស្ថានបច្ចេកវិទ្យាកម្ពុជា នឹងធ្វើការជ្រើសរើសនិស្សិតនារីក្រីក្រ ឆ្នាំទី១ ក្នុងឆ្នាំសិក្សា ២០២៦-២០២៧ ឱ្យស្នាក់នៅបណ្តោះអាសន្នសរុបចំនួន ៩០នាក់។ នេះបើតាមសេចក្តីជូនដំណឹងរបស់ក្រសួងអប់រំ យុវជន និងកីឡា ។

ចំពោះនិស្សិតនារីក្រីក្រ ដែលកំពុងសិក្សានៅតាមគ្រឹះស្ថានឧត្តមសិក្សាសាធារណៈតាមរូបភាពអាហារូបករណ៍ និងបង់ថ្លៃសិក្សា ដោយមានលក្ខខណ្ឌដូចខាងក្រោម៖

១. លក្ខខណ្ឌជ្រើសរើស៖ ជានិស្សិតនារីក្រីក្រអាហារូបករណ៍ ឬបង់ថ្លៃសិក្សា ដែលកំពុងសិក្សាឆ្នាំទី១ នៅតាមបណ្តាគ្រឹះស្ថានឧត្តមសិក្សាសាធារណៈក្នុងរាជធានីភ្នំពេញ ជានិស្សិតនារីក្រីក្រ និងនិស្សិតនារីដែលមានពិការភាព(សូមភ្ជាប់លិខិតបញ្ជាក់ពីមេឃុំ) ជានិស្សិតនារីនៅលីវ មានវិន័យ និងសីលធម៌ល្អ។

២. កាលបរិច្ឆេទ និងទីកន្លែងដាក់ពាក្យ៖ បេក្ខជន ត្រូវយកពាក្យស្នើសុំមកដាក់ដោយខ្លួនឯងនៅតាមគ្រឹះស្ថានឧត្តមសិក្សារបស់ខ្លួន ចាប់ពីថ្ងៃជូនដំណឹងនេះ រហូតដល់ថ្ងៃទី១០ ខែតុលា ឆ្នាំ២០២៦។

៣. កាលបរិច្ឆេទប្រកាសលទ្ធផល៖ ការប្រកាសលទ្ធផលនឹងមានបិទផ្សាយនៅមជ្ឈមណ្ឌលអន្តេវាសិកនិស្សិតនារី និងតាមគេហទំព័រផ្លូវការរបស់ក្រសួង ក្រោយពីការសម្រេចរបស់គណៈកម្មការជ្រើសរើស នៃក្រសួងអប់រំ យុវជន និងកីឡា នៅថ្ងៃទី២៨ ខែតុលា ឆ្នាំ២០២៦។ ចំពោះព័ត៌មានបន្ថែមផ្សេងៗ សូមទំនាក់ទំនងលេខទូរសព្ទ ០៨៩ ៦៧៧ ៨៨៧ និង ០៧៧ ៤៨៦ ៧៨៧៕

ដោយ ចាន់ សុភឿន (ប្រភព៖ ក្រសួងអប់រំ)