AKP ភ្នំពេញ ថ្ងៃទី១៨ ខែសីហា ឆ្នាំ២០២៦ -- លោក ចារ៉េដ គូស្ន័រ កូនប្រសាររបស់ប្រធានាធិបតីសហរដ្ឋអាមេរិក លោក ដូណាល់ ត្រាំ ត្រូវបានគេរំពឹងថានឹងទៅទស្សនកិច្ចនៅប្រទេសអ៊ីស្រាអែលក្នុងរយៈពេលប៉ុន្មានថ្ងៃខាងមុខនេះ។ នេះបើយោងតាមប្រភពព័ត៌មានពីរដ្ឋាភិបាលអ៊ីស្រាអែលបានប្រាប់សារព័ត៌មានតាសស៍ (TASS)។

លោក គូស្ន័រ មានគម្រោងពិភាក្សាជាមួយនាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ អំពីការអនុវត្តដំណាក់កាលបន្ទាប់នៃការដោះស្រាយស្ថានការណ៍នៅតំបន់ហ្គាហ្សា។ នេះបើយោងតាមការចុះផ្សាយរបស់សារព័ត៌មាន Axios ដោយដកស្រង់ប្រភពព័ត៌មានរបស់ខ្លួន។

ប៉ុស្តិ៍ទូរទស្សន៍អាល់ ហាដាដ បាននិយាយកាលពីមុនថា លោក គូស្ន័រ បានរៀបចំកិច្ចប្រជុំជាបន្តបន្ទាប់នៅក្នុងទីក្រុងអ៊ែល អាឡាមែន របស់ប្រទេសអេហ្ស៊ីប ដោយផ្តោតសំខាន់ទៅលើស្ថានភាពនៅតំបន់ហ្គាហ្សា។ យោងតាមប្រភពព័ត៌មាននោះ បានឱ្យដឹងថា លោកបានជួបជាមួយអ្នកសម្របសម្រួលក្នុងកិច្ចចរចាដោយប្រយោលរវាងអ៊ីស្រាអែល និងក្រុមហាម៉ាស ជាមួយមេដឹកនាំក្រុមហាម៉ាស និងជាមួយលោក នីកូឡាយ ម្ល៉ាដេណូវ តំណាងជាន់ខ្ពស់នៃក្រុមប្រឹក្សាសន្តិភាពហ្គាហ្សា។ មិនមានព័ត៌មានលម្អិតបន្ថែមត្រូវបានផ្តល់ឱ្យទេ។ សេវាសារព័ត៌មានរបស់ប្រធានាធិបតីអេហ្ស៊ីប បាននិយាយនៅពេលមុននេះថា ក្នុងអំឡុងពេលជួបជាមួយលោក គូស្ន័រ លោកប្រធានាធិបតី អាប់ឌែលហ្វាតា អ៊ែល-ស៊ីស៊ី បានអំពាវនាវដល់គ្រប់ភាគីទាំងអស់នៃជម្លោះហ្គាហ្សា ឱ្យគោរពកិច្ចព្រមព្រៀងដែលបានចុះហត្ថលេខានៅក្នុងខែតុលា ឆ្នាំ២០២៥ នៅទីក្រុងស្សាម អ៊ែល-ស្សេក របស់ប្រទេសអេហ្ស៊ីប។

នៅក្នុងខែតុលា ឆ្នាំ២០២៥ អ៊ីស្រាអែល និងក្រុមហាម៉ាសបានឈានដល់កិច្ចព្រមព្រៀងបទឈប់បាញ់នៅក្នុងតំបន់ហ្គាហ្សា ដោយមានការចូលរួមសម្របសម្រួលពីសហរដ្ឋអាមេរិក អេហ្ស៊ីប និងកាតា។ គំនិតផ្តួចផ្តើមនេះមានបីដំណាក់កាល ដោយដំណាក់កាលទីមួយរួមមានការបញ្ឈប់អរិភាព ការដោះលែងអ្នកដែលត្រូវបានឃុំខ្លួន ការពង្រីកការផ្តល់ជំនួយមនុស្សធម៌ទៅកាន់តំបន់នោះ និងការដកកងកម្លាំងអ៊ីស្រាអែលមួយផ្នែក។ ដំណាក់កាលជាបន្តបន្ទាប់ដែលបានគ្រោងទុក គឺការបញ្ចប់ជម្លោះ ការដកកងកម្លាំងអ៊ីស្រាអែល និងការកសាងតំបន់ហ្គាហ្សាឡើងវិញ៕

ដោយ៖ យា ចិន្ដាខន្ដី (ប្រភព៖ តាសស៍)