AKP ភ្នំពេញ ថ្ងៃទី១៧ ខែសីហា ឆ្នាំ២០២៦ -- ជនជាតិប៉ាឡេស្ទីនម្នាក់ត្រូវបានសម្លាប់ និងប្រាំពីរនាក់ផ្សេងទៀតរងរបួសដោយសារការបាញ់ប្រហាររបស់កងទ័ពអ៊ីស្រាអែលនៅក្នុងឧប្បត្តិហេតុនានានៅក្នុងតំបន់ហ្គាហ្សាកាលពីយប់ថ្ងៃសៅរ៍សប្តាហ៍មុន ខណៈដែលការវាយប្រហារតាមអាកាស ការបាញ់ផ្លោងកាំភ្លើងធំ និងការវាយកម្ទេចរបស់អ៊ីស្រាអែលនៅតែបន្តនៅក្នុងតំបន់ផ្សេងៗគ្នានៃតំបន់ហ្គាហ្សា។

ប្រភពមួយនៅមន្ទីរពេទ្យអាល់-អាវដា បានប្រាប់សារព័ត៌មានអាណាដូលូថា លោក ម៉ូហាំម៉េដ បាស្សៀ អាប៊ូ អាម៉ាណា ត្រូវបានសម្លាប់បន្ទាប់ពីត្រូវបានបាញ់ដោយកងកម្លាំងអ៊ីស្រាអែលនៅលើផ្លូវទី២០ ក្នុងជំរុំជនភៀសខ្លួននូសេរ៉ាត់ នៅកណ្តាលតំបន់ហ្គាហ្សា។

នៅក្នុងទីក្រុងខាន់យូនីស នៅភាគខាងត្បូង មនុស្សពីរនាក់ដែលរងរបួសដោយសារការបាញ់ប្រហាររបស់អ៊ីស្រាអែល ដែលត្រូវបានបញ្ជូនទៅមន្ទីរពេទ្យណាស់សឺរ បន្ទាប់ពីមានឧប្បត្តិហេតុដាច់ដោយឡែកពីគ្នាមួយនៅជិតមន្ទីរពេទ្យចូដានីអាន់ ក្នុងជំរុំជនភៀសខ្លួនខាន់យូនីស និងរង្វង់មូលអាប៊ូ ហាមីដ។ នេះបើយោងតាមប្រភពព័ត៌មានផ្នែកវេជ្ជសាស្ត្របានប្រាប់សារព័ត៌មានអាណាដូលូ។

សាក្សីបាននិយាយថា យន្តហោះចម្បាំងអ៊ីស្រាអែលបានធ្វើការវាយប្រហារតាមអាកាស ខណៈដែលការបាញ់ផ្លោងកាំភ្លើងធំ និងការបាញ់ប្រហារយ៉ាងធ្ងន់ធ្ងរបានកំណត់គោលដៅទៅលើភាគកណ្តាលនៃទីក្រុងខាន់យូនីស។ ការវាយប្រហារទាំងនោះក៏បានវាយប្រហារផ្ទះដែលត្រូវបានជម្លៀសចេញនៅក្នុងតំបន់ចូរ៉ាត់ អាល់-ឡុត នៅភាគខាងត្បូងនៃទីក្រុងនោះផងដែរ។

នៅក្នុងតំបន់ហ្គាហ្សា ប្រភពព័ត៌មានផ្នែកវេជ្ជសាស្ត្របាននិយាយថា ជនជាតិប៉ាឡេស្ទីនរងរបួសពីរនាក់បានទៅដល់មន្ទីរពេទ្យអាល់-អាលី បាបទីសត៍ បន្ទាប់ពីរថយន្តយោធាអ៊ីស្រាអែលបានបើកការបាញ់ប្រហារនៅក្នុងតំបន់ដាលូល នៃសង្កាត់ហ្សីទូន នៅភាគអាគ្នេយ៍នៃទីក្រុង។

រថយន្តយោធាអ៊ីស្រាអែលក៏បានបាញ់ប្រហារយ៉ាងខ្លាំងនៅភាគខាងកើតនៃជំរុំជនភៀសខ្លួនបូរេច នៅកណ្តាលតំបន់ហ្គាហ្សាផងដែរ។

ជនជាតិប៉ាឡេស្ទីនបីនាក់បានរងរបួសនៅព្រឹកថ្ងៃសៅរ៍ នៅក្នុងការវាយប្រហាររបស់អ៊ីស្រាអែលដែលកំណត់គោលដៅលើម៉ូតូមួយគ្រឿង នៅភាគកណ្តាលនៃតំបន់ហ្គាហ្សា៕

ដោយ៖ យា ចិន្ដាខន្ដី (ប្រភព៖ AA-AKP)