AKP ភ្នំពេញ ថ្ងៃទី១៥ ខែសីហា ឆ្នាំ២០២៦–

ឯកឧត្តម កៅ អ៊ីមរ៉ន រដ្ឋលេខាធិការក្រសួងព័ត៌មាន បានជួបពិភាក្សាការងារជាមួយឯកឧត្តម Mesut Özcan ឯកអគ្គរដ្ឋទូតតួកគីយ៉េប្រចាំកម្ពុជា អំពីការស្វែងរកវិធីពង្រឹងកិច្ចសហប្រតិបត្តិការលើវិស័យព័ត៌មានរវាងប្រទេសទាំងពីរ ដែលជំនួបនេះបានប្រព្រឹត្តទៅនៅស្ថានទូតតួកគីយ៉េ នៅរាជធានីភ្នំពេញ នាថ្ងៃទី១៤ ខែសីហា ឆ្នាំ២០២៦។

ជំនួបខាងលើនេះ ផ្តោតលើការពង្រីកកិច្ចសហប្រតិបត្តិការរវាងកម្ពុជា និងតួកគីយ៉េ លើវិស័យព័ត៌មាន ជាពិសេសការអភិវឌ្ឍសមត្ថភាពអ្នកសារព័ត៌មាន និងការផ្លាស់ប្តូរបទពិសោធន៍ និងចំណេះដឹងផ្នែកសារព័ត៌មានរវាងភាគីទាំងពីរ។

ក្នុងន័យនេះ ភាគីទាំងពីរបានលើកឡើងអំពីគំនិតផ្តួចផ្តើមរបស់រដ្ឋាភិបាលតួកគីយ៉េ ក្នុងការអញ្ជើញអ្នកសារព័ត៌មានកម្ពុជាចំនួន២រូប តាមរយៈក្រសួងព័ត៌មានកម្ពុជា ឱ្យចូលរួមវគ្គបណ្តុះបណ្តាលជំនាញស្តីពី «សារព័ត៌មានសង្គ្រាម» (War Journalism) ដែលនឹងរៀបចំឡើងដោយបណ្ឌិត្យសភានគរបាលជាតិតួកគីយ៉េ ដោយសហការជាមួយទីភ្នាក់ងារព័ត៌មានតួកគីយ៉េ Anadolu នាពេលខាងមុខឆាប់ៗនេះ។

ក្នុងជំនួបនេះ ឯកឧត្តមឯកអគ្គរដ្ឋទូតតួកគីយ៉េ ក៏បានលើកឡើងអំពីសមិទ្ធផល និងសកម្មភាពសំខាន់ៗមួយចំនួនដែលសម្រេចបានក្នុងក្របខណ្ឌកិច្ចសហប្រតិបត្តិការ រវាងរដ្ឋាភិបាលនៃប្រទេសទាំងពីរ ព្រមទាំងបានបញ្ជាក់ពីការយកចិត្តទុកដាក់របស់ប្រទេសតួកគីយ៉េ ក្នុងការបន្តអភិវឌ្ឍកិច្ចសហប្រតិបត្តិការជាមួយកម្ពុជា លើវិស័យព័ត៌មាន និងការពង្រឹងការផ្លាស់ប្តូរបទពិសោធន៍ និងការបណ្តុះបណ្តាលរវាងស្ថាប័នសារព័ត៌មាននៃប្រទេសទាំងពីរ។

ភាគីទាំងពីរក៏បានបញ្ជាក់ពីសារៈសំខាន់នៃការបន្តកិច្ចសហប្រតិបត្តិការរួមគ្នា ដើម្បីបើកទូលាយនូវទិសដៅថ្មីៗសម្រាប់កិច្ចសហប្រតិបត្តិការទ្វេភាគី មិនត្រឹមតែលើវិស័យព័ត៌មានប៉ុណ្ណោះទេ ប៉ុន្តែថែមទាំងលើវិស័យផ្សេងៗដែលមានផលប្រយោជន៍រួម ដើម្បីរួមចំណែកក្នុងការពង្រឹងទំនាក់ទំនងមិត្តភាពរវាងកម្ពុជា និងតួកគីយ៉េផងដែរ៕

ដោយ នីកា