AKP បន្ទាយមានជ័យ ថ្ងៃទី១៥ ខែសីហា ឆ្នាំ២០២៦--

នៅក្នុងស្មារតីបម្រើប្រជាពលរដ្ឋដោយផ្ទាល់ និងតម្លាភាព រដ្ឋបាលក្រុងសិរីសោភ័ណ នៅថ្ងៃទី១៥ ខែសីហា ឆ្នាំ២០២៦ នេះ បានរៀបចំ «វេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាក្រុង» យ៉ាងផុសផុលនៅសង្កាត់ចំនួនពីរ គឺ សង្កាត់អូរអំបិល និងសង្កាត់ទឹកថ្លា។ ព្រឹត្តិការណ៍នេះធ្វើឡើងដើម្បីក្តាប់យកបញ្ហាប្រឈម ស្តាប់សំណូមពរផ្ទាល់ពីប្រជាពលរដ្ឋ និងផ្សព្វផ្សាយពីសមិទ្ធផលធំៗ ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាលនីតិកាលទី៧ នៃរដ្ឋសភា។

វេទិកានេះបានប្រព្រឹត្តទៅក្រោមអធិបតីភាព លោក ជាម សុខ ប្រធានក្រុមប្រឹក្សាក្រុងសិរីសោភ័ណ និង លោក ស្រេង សុផល អភិបាល នៃគណៈអភិបាលក្រុងសិរីសោភ័ណ ព្រមទាំងមានការចូលរួមយ៉ាងច្រើនកុះករពីសំណាក់តំណាងមន្ទីរ-អង្គភាពជុំវិញខេត្ត ការិយាល័យជំនាញ កងកម្លាំងប្រដាប់អាវុធ អាជ្ញាធរសង្កាត់ទាំងពីរ លោក-លោកស្រីមេភូមិ និងបងប្អូនប្រជាពលរដ្ឋក្នុងមូលដ្ឋាន។

នៅក្នុងអង្គវេទិកា លោក ជាម សុខ ប្រធានក្រុមប្រឹក្សាក្រុងសិរីសោភ័ណ បានគូសបញ្ជាក់អំពីអត្ថន័យ និងសារៈសំខាន់នៃការចុះជួបប្រជាពលរដ្ឋដល់មូលដ្ឋាន។ លោកបានលើកឡើងថា សមិទ្ធផលនានាដែលក្រុងសិរីសោភ័ណសម្រេចបាននាពេលកន្លងមក  រាប់ចាប់ពីហេដ្ឋារចនាសម្ព័ន្ធផ្លូវថ្នល់ ប្រព័ន្ធរំដោះទឹក សន្តិសុខសុវត្ថិភាព ដល់ការលើកកម្ពស់ជីវភាពរស់នៅ  គឺសុទ្ធសឹងជាផលផ្លែផ្កាកើតចេញពីគោលនយោបាយ និងការដឹកនាំប្រកបដោយចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។

លោកប្រធានក្រុមប្រឹក្សាក្រុង បានបន្ថែមថា រាជរដ្ឋាភិបាលនីតិកាលទី៧ តែងតែចាត់ទុក «ប្រជាពលរដ្ឋជាបេះដូង» ហើយវេទិកាសាធារណៈនេះ គឺជាស្ពានចងភ្ជាប់ទំនាក់ទំនងយ៉ាងរឹងមាំរវាងអាជ្ញាធរ និងប្រជាពលរដ្ឋ ដើម្បីធានាថា រាល់កង្វល់របស់ប្រជាជនត្រូវបានដោះស្រាយបានទាន់ពេលវេលា និងមានប្រសិទ្ធភាព។
   
ជាការឆ្លើយតបទៅនឹងមតិយោបល់ សំណូមពរ និងបញ្ហាប្រឈមផ្សេងៗដែលបងប្អូនប្រជាពលរដ្ឋនៅសង្កាត់អូរអំបិល និងសង្កាត់ទឹកថ្លា បានលើកឡើងក្នុងវេទិកា លោក ស្រេង សុផល អភិបាលក្រុងសិរីសោភ័ណ បានសម្តែងនូវការស្វាគមន៍យ៉ាងកក់ក្តៅ និងទទួលយកនូវរាល់កង្វល់ទាំងនោះមកពិនិត្យ និងដោះស្រាយ។

លោកអភិបាលក្រុង បានបញ្ជាក់យ៉ាងច្បាស់ថា «រដ្ឋបាលក្រុងសិរីសោភ័ណ មិនមើលរំលងរាល់បញ្ហាប្រឈមតូចធំរបស់បងប្អូនឡើយ។ ចំពោះសំណូមពរ ឬបញ្ហាណាដែលស្ថិតក្នុងដែនសមត្ថកិច្ចរបស់ក្រុង អាជ្ញាធរ និងមន្ទីរ-ការិយាល័យជំនាញនឹងចុះអន្តរាគមន៍ដោះស្រាយជូនភ្លាមៗ។ រីឯបញ្ហាណាដែលហួសពីសមត្ថកិច្ច រដ្ឋបាលក្រុងនឹងបូកសរុប រៀបចំជាសំណើផ្លូវការ ដើម្បីស្នើសុំការសម្រេច និងគាំទ្រពីថ្នាក់ដឹកនាំខេត្ត និងក្រសួង-ស្ថាប័នពាក់ព័ន្ធបន្តទៀត»។

វេទិកាផ្សព្វផ្សាយ និងពិគ្រោះយោបល់នាថ្ងៃនេះ ទទួលបានការកោតសរសើរយ៉ាងខ្លាំងពីសំណាក់ប្រជាពលរដ្ឋ។ ព្រឹត្តិការណ៍នេះ មិនត្រឹមតែបង្ហាញពីការទទួលខុសត្រូវរបស់អាជ្ញាធរក្រុងសិរីសោភ័ណប៉ុណ្ណោះទេ ប៉ុន្តែថែមទាំងជាសាក្សីបង្ហាញពីការប្តេជ្ញាចិត្តរួមគ្នារវាង រដ្ឋបាលថ្នាក់ក្រោមជាតិ និងប្រជាពលរដ្ឋ ក្នុងការចូលរួមចំណែកជាមួយ រាជរដ្ឋាភិបាលកម្ពុជា ដើម្បីប្រែក្លាយក្រុងសិរីសោភ័ណឱ្យកាន់តែមានការអភិវឌ្ឍ ស៊ីវិល័យ និងមានសុខសន្តិភាពយូរអង្វែង៕

ដោយ ឈុន សារ៉ាត