AKP កំពង់ធំ ថ្ងៃទី១៥ ខែសីហា ឆ្នាំ២០២៦--

មន្ទីរកិច្ចការនារីខេត្តកំពង់ធំ បានសហការជាមួយនាយកដ្ឋានស្រ្តី និងសុខភាពនៃក្រសួងកិច្ចការនារី មន្ទីរសុខាភិបាលខេត្ត អាជ្ញាធរមូលដ្ឋានស្រុក/ឃុំ ភូមិ មណ្ឌលសុខភាពក្រោមការឧបត្ថម្ភគាំទ្រពីអង្គការមូលនិធិហ្វ្រេដហូឡូ បានរៀបចំវេទិការអប់រំផ្សព្វផ្សាយស្តីពី យេនឌ័រ សុខភាពភ្នែក ការពិនិត្យនិងព្យាបាលភ្នែកជូនប្រជាពលរដ្ឋដោយឥតគិតថ្លៃក្នុងសហគមន៍នៅវត្តក្របៅ ឃុំដូង ស្រុកប្រាសាទបល្ល័ង្កខេត្តកំពង់ធំកាលពីថ្ងៃទី១៤ខែសីហាឆ្នាំ២០២៦ក្រោមអធិបតីភាពលោកស្រី ស៊ូ ផារិន អនុប្រធានមន្ទីរកិច្ចការនារីខេត្តកំពង់ធំដោយមានការចូលរួមពីលោកស្រីអភិបាលរងស្រុក លោកស្រីមកពីក្រសួងកិច្ចការនារី លោក-លោស្រីតំណាងមន្ទីរពេទ្យបង្អែកខេត្តកំពង់ធំ មន្រ្តីមន្ទីរកិច្ចការនារីខេត្ត អនុប្រធានការិយាល័យសង្គមកិច្ច និងសុខុមាលភាពសង្គមស្រុក ប្រធានមណ្ឌលសុខភាពឃុំដូង លោកមេឃុំ សមាជិកក្រុមប្រឹក្សាឃុំ មេភូមិ/អនុភូមិ សមាជិកភូមិនិងប្រជាពលរដ្ឋសរុប២៤៨នាក់ (ស្រី១៥៩នាក់)។

វេទិកាអប់រំផ្សព្វផ្សាយនេះក្នុងគោលបំណង ផ្តល់ចំណេះដឹងដល់ប្រជាពលរដ្ឋឱ្យយល់ច្បាស់ពីយេនឌ័រ និងសុខភាពភ្នែក ការទទួលបានការពិនិត្យភ្នែក នៅនឹងកន្លែងនៅក្នុងសហគមន៍ ព្រមទាំងបានធ្វើការបញ្ជូនទៅទទួលការព្យាបាលភ្នែក ដូចជាការបកបាយភ្នែក ការបកកន្ទុយថ្លែនភ្នែក និងជំងឺភ្នែកផ្សេងៗទៀតដោយឥតគិតថ្លៃ។

លោកស្រី ស៊ូ ផារិន អនុប្រធានមន្ទីរកិច្ចការនារីខេត្តកំពង់ធំ បានលើកឡើងពីផ្នត់គំនិតយេនឌ័រនិងតួនាទីបុរសនិងស្រ្តី នៅក្នុងសង្គមបច្ចុប្បន្ន ក៍មានស្រី្តមានតួនាទីនៅក្នុងជួររដ្ឋាភិបាលដែរ តាំងពីថ្នាក់ក្រោមជាតិ រហូតដល់ថ្នាក់ជាតិ។

លោកស្រីបន្តទៀតថា ការពិនិត្យភ្នែកមានសារៈសំខាន់ណាស់ដើម្បីឱ្យយើងដឹងពីបញ្ហាជំងឺបាយភ្នែក ជំងឺកន្ទុយថ្លែន ជំងឺភែ្នកក្រហម ជំងឺកំហុសកំណុំ ជំងឺទឹកដក់ក្នុងភ្នែក និងជំងឺរលាកផ្សេងទៀត ដែលបង្ករមកពីមេរោគ យើងបានពិនិត្យនិងព្យាបាលឱ្យទាន់ពេលវេលា។ យើងត្រូវយកចិត្តទុកដាក់ថែទាំសុខភាពភ្នែក បើមានបញ្ហាត្រូវទៅជួបគ្រូពេទ្យដែលមានជំនាញថែទាំភ្នែក។

លោកស្រីអនុប្រធានមន្ទីរ ក៏បានបញ្រ្ជាបពីគ្រឿងញៀន និងបញ្ហាការកើតស្លាប់ នឹងស្លាប់កើតរបស់ទារកក្នុងឆ្នាំ២០២៥មានការកើនឡើង ដូច្នេះដើម្បីកាត់បន្ថយអត្រាស្លាប់កើតនិងកើតស្លាប់របស់ទារក លោកស្រីក៏បានជំរុញឱ្យស្រ្តីដែលមានផ្ទៃពោះទាំងអស់ទៅពិនិត្យផ្ទៃពោះឱ្យបានទៀងទាត់តាមការណាត់ជួបរបស់គ្រូពេទ្យ និងលើកទឹកចិត្តឱ្យស្រ្តីគ្រប់រូបថែទាំសុខភាពមានអនាម័យល្អ។

នៅរដូវវស្សានេះសូមឱ្យប្រជាពលរដ្ឋមានការប្រុងប្រយ័ត្ននិងមានវិធានការបង្ការ ការពារពីជំងឺគ្រុនឈាម រួមទាំងស្វែងរកការព្យាបាលឱ្យទាន់ពេលវេលា។សូមឱ្យអាណាព្យាបាលដែលមានកូនគ្រប់អាយុ១៨ឆ្នាំ ទៅចុះឈ្មោះបោះឆ្នោត,ទៅពិនិត្យបញ្ជីឈ្មោះបោះឆ្នោត នៅក្នុងឆ្នាំ២០២៧ខាងមុខនឹងមានការបោះឆ្នោតរើសរើសថ្នាក់ដឹកនាំឃុំ សង្កាត់និងបោះឆ្នោតរើសថ្នាក់ដឹកនាំប្រទេសឬតំណាងរាស្ត្រក្នុងឆ្នាំ២០២៨៕

ដោយ ស៊ុម វណ្ណា