AKP កំពង់ធំ ថ្ងៃទី១៥ ខែសីហា ឆ្នាំ ២០២៦--

នៅទីបញ្ជាការតំបន់ប្រតិបត្តិការសឹករងកំពង់ធំ យោធភូមិភាគទី៤កាលពីរសៀលថ្ងៃទី១៤ ខែសីហា ឆ្នាំ២០២៦បានរៀបចំពិធីបំពាក់គ្រឿងឥស្សរិយយសហមេត្រី ថ្នាក់ធិបឌិន្ទ ជូនលោកវរសេនីយ៍ឯក វ៉ក ថាញ់ហ្សាញ់ មេបញ្ជាការយោធាទីក្រុងដុងណាយ យោធភូមិភាគទី៧ កងទ័ពប្រជាជនវៀតណាមដែលមានស្នាដៃល្អក្នុងការសហការការងារស្រាវជ្រាវរុករក ជីកគាស់លើក នឹងធ្វើមាតុភូមិនិវត្តន៍អដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅកម្ពុជា នៅខេត្តកំពង់ធំក្រោមអធិបតីភាពឧត្តមសេនីយ៍ទោ លៀង ឡេង មេបញ្ជាការរងនិងជាតំណាងឯកឧត្តមឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ដោយមានការអញ្ជើញចូលរួមពីនាយកាល័យទី១ កងទ័ពជើងគោក អភិបាលរងខេត្តកំពង់ធំ ព្រមទាំងនាយទាហាន នាយទាហានរងជាច្រើនរូប។

ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង អនុប្រធានអចិន្ត្រៃយ៍នៃគណៈកម្មការជីករុករក គាស់លើកអដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតក្នុងសម័យសង្គ្រាមនៅខេត្តកំពង់ធំបានឡើងធ្វើរបាយការណ៍ស្វាគមន៍ នឹងបានរាយការណ៍ជូនអំពីលទ្ធផលនៃការជីករុករកអដ្ឋិធាតុកងទ័ពស្ម័គ្រចិត្តវៀតណាម ក្នុងរយៈពេលជាង ២០ឆ្នាំកន្លងទៅ គិតពីឆ្នាំ២០០៣ ដល់ឆ្នាំ២០២៦ ដោយទទួលបានលទ្ធផលចំនួន១១៩៧អដ្ឋិធាតុ ហើយបានធ្វើមាតុភូមិនិវត្តន៍ទៅកាន់ប្រទេសកំណើតវិញរួចហើយ ។ជាមួយគ្នានេះឧត្តមសេនីយ៍ទោ សោម ស៊ុន ក៏បានគូសបញ្ជាក់អំពីសមិទ្ធផលមួយចំនួនទៀត ដែលគណៈបញ្ជាការយោធាខេត្តដុងណាយ បានជួយឧបត្ថម្ភដល់បញ្ជាការដ្ឋានតំបន់ប្រតិបត្តិការសឹករងកំពង់ធំរួមមាន÷អគារធ្វើការងារ អគារគិលានដ្ឋាន ផ្លូវបេតុង សម្ភារៈបរិក្ខារពេទ្យការពារជំងឺកូវីដ-១៩ និងអនុញ្ញាតឱ្យក្រុមគ្រូពេទ្យព្យាបាលជំងឺជូនកងទ័ព គ្រួសារកងទ័ព និងអតីតយុទ្ធជននាពេលកន្លងទៅផងដែរ។

បន្ទាប់ពីឧត្តមសេនីយ៍ត្រី ហេង​ សុខា​ នាយរងកាល័យទី១ កងទ័ពជើងគោក បានឡើងអានអនុក្រឹត្យលេខ ៣៥៧​ អ​ ន​ក្រ​ តត​ របស់​រដ្ឋាភិបាល​ស្ដីពីការបំពាក់គ្រឿងឥស្សរិយយសសហមេត្រី ថ្នាក់ធិបឌិន្ទ ដែល​បាន​ចុះហត្ថលេខា​ដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជារួចមកឧត្តមសេនីយ៍ទោ លៀង ឡេង មេបញ្ជាការរង តំណាងឧត្តមសេនីយ៍ឯក ពៅ ហេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៤ បានផ្ដល់កិត្តិយសបំពាក់គ្រឿងឥស្សរិយយសសហមេត្រី ថ្នាក់ធិបឌិន្ទ ជូនវរសេនីយ៍ឯក វ៉ក ថាញ់ហ្សាញ់ ជាផ្លូវការចាប់ពីពេលនេះតទៅនិងបានលើកឡើងនូវការកោតសរសើរចំពោះមេបញ្ជាការតំបន់ប្រតិបត្តិការសឹករងកំពង់ធំ ដែលបានសហការល្អជាមួយភាគីមិត្ត ក្នុងការស្រាវជ្រាវរុករក និងជីកគាស់លើកអដ្ឋិធាតុកងទ័ពស្ម័គ្រចិត្តវៀតណាម បានធ្វើមាតុភូមិនិវត្តន៍ទៅកាន់ប្រទេសកំណើតវិញ។ ហើយ​ត្រូវ​បន្ត​សហការ​ជាមួយ​ភាគី​មិត្ត​ក្នុង​ធ្វើ​សកម្មភាព​មនុស្សធម៌​នេះឱ្យទទួល​បាន​ជោគ​ជ័យ​បន្ថែម​ទៀត​។

លោកវរសេនីយ៍ឯក វ៉ក ថាញ់ហ្សាញ់ បានគោរពថ្លែងអំណរគុណដ៏ជ្រាលជ្រៅជាទីបំផុត ចំពោះសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងថ្នាក់ដឹកនាំគ្រប់លំដាប់ថ្នាក់នៃកងយោធពលខេមរភូមិន្ទ ដែលបានផ្ដល់កិត្តិយសបំពាក់គ្រឿងឥស្សរិយយសសហមេត្រី ថ្នាក់ធិបឌិន្ទ ជូនគាត់នៅពេលនេះ និងសូមគោរពថ្លែងអំណរគុណចំពោះកងកម្លាំងប្រដាប់អាវុធទាំងបី អាជ្ញាធរដែនដីគ្រប់លំដាប់ថ្នាក់​ និង​ប្រជាពលរដ្ឋ​នៅខេត្តកំពង់ធំ ដែលបានសហការល្អជាមួយក្រុមបច្ចេកទេស កា៧២ ទី​ក្រុង​ដុង​ណា​យ​ ក្នុងការជីករុករកអដ្ឋិធាតុកងទ័ពស្ម័គ្រចិត្តវៀតណាម ដែលបានពលីជីវិតនៅលើទឹកដីខេត្តកំពង់ធំ បានទៅកាន់ប្រទេសកំណើតវិញនិងសូមជូនពរឱ្យចំណងសាមគ្គីភាព មិត្តភាព សហប្រតិបត្តិការរវាងកម្ពុជានិងវៀតណាម ឋិតថេរជេរកាល៕

ដោយ ស៊ុម វណ្ណា