AKP ភ្នំពេញ ថ្ងៃទី១៣ ខែសីហា ឆ្នាំ២០២៦--មុនព្រឹត្តិការណ៍ប្រកួតកីឡាវាយសីជ្រើសរើសជើងឯកអាស៊ីអាគ្នេយ៍លើកទី៣ ដែលកម្ពុជាទទួលធ្វើជាម្ចាស់ផ្ទះចូលមកដល់ សហព័ន្ធកីឡាវាយសីអាស៊ី (BA) បានបើកវគ្គបណ្តុះបណ្តាលមន្រ្តីជំនាញអាជ្ញាកណ្តាល-ចៅក្រមកីឡាវាយអន្តរជាតិដល់សិក្ខាកាម១៣នាកក់មកពី៩ប្រទេស នៅក្នុងពហុកីឡដ្ឋានមរតកតេជោ។

ឯកឧត្តម កែវ រស់ អគ្គលេខាធិការ សហព័ន្ធកីឡាវាយសីកម្ពុជាបានគូសបញ្ជាក់ថា វគ្គបណ្តុះបណ្តាលដែលរៀបចំដោយសហព័ន្ធកីឡាវាយសីអាស៊ីនេះ មានសិក្ខាកាមចូលរួមចំនួន១៣នាក់មកពី៩ប្រទេស មានដូចជាកម្ពុជាវៀតណាម ឥណ្ឌា មីយ៉ាន់ម៉ា ឡាវ ព្រុយណេ សិង្ហបុរី ថៃ និងហ្វីលីពីន ក្នុងចំណោមនោះមានមន្រ្តីកម្ពុជាពីររូប។ ក្រៅពីសិក្ខាកាមផ្លូវការ សហព័ន្ធកីឡាវាយសីកម្ពុជាក៏បានដាក់មន្រ្តីរបស់ខ្លួនចំនួន១០នាក់ឱ្យចូលរួមវគ្គបំប៉ននេះផងដែរ។ ការដាក់បន្ថែមមន្រ្តីចូលរួមក្រៅផ្លូវការនេះ ជាការបញ្ជ្រាបចំណេះដឹងឱ្យមន្រ្តីសហព័ន្ធកីឡាវាយសីបានឈ្វេងយល់អំពីជំនាញអាជ្ញាកណ្តាល ចៅក្រមវាយសីអន្តរជាតិ ជាការត្រៀមលក្ខណៈទុកជាមុន ដើម្បីត្រៀមចូលរួមវគ្គអន្តរជាតិនានា ដែលរៀបចំដោយសហព័ន្ធកីឡាវាយសីអាស៊ី។

ឯកឧត្តមអគ្គលេខាធិកាបានពន្យល់ថា មន្រ្តីអាជ្ញាកណ្តាល-ចៅក្រម ដែលទទួលបានការបណ្តុះបណ្តាល ដោយសហព័ន្ធកីឡាវាយសីអាស៊ី ដែលមានសិក្ខាកាមចំនួន១៣នាក់នេះ គឺបានរៀនតាមអនឡាញពីរលើករួចមកហើយៗក្នុងរយៈពេល៣ថ្ងៃនៃការបណ្តុះបណ្តាលចាប់ពីថ្ងៃទី១២-១៤ ខែសីហា ឆ្នាំ២០២៦ គឺរៀនទ្រឹស្តី ហើយចាប់ពីថ្ងៃទី១៥-២១ ខែសីហា ជាការអនុវត្តដោយផ្ទាល់នៅលើទីលាន។ ប្រសិនបើអាជ្ញាកណ្តាល-ចៅក្រមទាំង១៣នាក់ ត្រូវបានមន្រ្តីសហព័ន្ធកីឡាវាយសីអាស៊ីវាយតម្លៃមានពិន្ទុជាប់ក្នុងវគ្គនេះ គឺពួកគេនឹងជាប់ជាអាជ្ញាកណ្តាល-ចៅក្រមអន្តរជាតិទទួលស្គាល់ដោយសហព័ន្ធកីឡាវាយសីអាស៊ីទទួលបានឱកាសទៅចូលរួមកាត់សេចក្តីការប្រកួតអន្តរជាតិនានានៅក្រៅប្រទេស។

គួរបញ្ជាក់ថា ការប្រកួតកីឡាវាសីជ្រើសរើសជើងឯកអាស៊ីអាគ្នេយ៍លើកទី៣ ដែលកម្ពុជាទទួលធ្វើជាម្ចាស់ផ្ទះនេះ ដំណើរចាប់ពីថ្ងៃទី១៥-២១ ខែសីហា ឆ្នាំ២០២៦ នៅក្នុងពហុកីឡដ្ឋានជាតិមរតកតេជោ ខណៈប្រទេសចូលរួមចំនួន៧ រួមមានម្ចាស់ផ្ទះកម្ពុជា វៀតណាម ឡាវ ហ្វីលីពីន ទីម័រខាងកើត ព្រុយណេ និងមីយ៉ាន់ម៉ា៕

ដោយ ហេង ណាលីន